ຜົນກວດຢືນຢັນແລ້ວ ! ໝາຢູ່ຮົງກົງຕິດເຊື້ອໄວຣັສ “ໂຄວິດ-19
ໝາທີ່ລ້ຽງໄວ້ຂອງຜູ້ປ່ວຍຕິດເຊື້ອໄວຣັສໂຄວິດ-19
ກວດຢືນຢັນແລ້ວວ່າ: ຕິດເຊື້ອໄວຣັສແທ້ ຈຶ່ງເປັນໄປໄດ້ວ່າຈະເປັນກໍລະນີການຕິດເຊື້ອຈາກຄົນໄປຫາສັດໄດ້.
ສຳນັກຂ່າວເອເອັຟພີລາຍງານຈາກຮົງກົງໃນວັນທີ 4 ມີນາວ່າ: ໝາສາຍພັນປອມປາເຣນຽນໂຕໜຶ່ງຂອງຍິງໄວ 60 ປີ ຜູ້ປ່ວຍຕິດເຊື້ອໄວຣັສໂຄວິດ-19 ໄດ້ຮັບການກວດຊ້ຳອີກແລ້ວພົບວ່າຕິດເຊື້ອໄວຣັສແທ້ ນັບແຕ່ມັນຖືກກັກກັນພະຍາດເອົາໄວ້ຢູ່ສູນເບິ່ງແຍງສັດລ້ຽງ ໃນວັນທີ 28 ກຸມພາຜ່ານມາ.
ກະຊວງກະສິກຳ, ປ່າໄມ້ ແລະ ສິ່ງແວດລ້ອມຂອງຮົງກົງ ລາຍງານວ່າ: ການກວດຊ້ຳອີກພົບໝາໂຕນີ້ມີການຕິດເຊື້ອໄວຣັສໃນລະດັບຕໍ່າ. ເຖິງຢ່າງໃດກໍຕາມ, ຜູ້ຊ່ຽວຊານຈາກມະຫາວິທະຍາໄລ ແລະ ອົງການອະນາໄມໂລກ ມີຄວາມເຫັນກົງກັນວ່າ: ອາດຈະເປັນການຕິດເຊື້ອໄວຣັສ ເຊິ່ງສາມາດແຜ່ຈາກຄົນໄປຫາສັດໄດ້, ແຕ່ໝາໂຕນີ້ບໍ່ໄດ້ສະແດງອາການໃດໆຂອງເຊື້ອໄວຣັສໂຄວິດ-19 ແຕ່ຢ່າງໃດ.
ທັງນີ້, ສັດລ້ຽງທັງໝົດຂອງຊາວຮົງກົງທີ່ຕິດເຊື້ອໄວຣັສໂຄວິດ-19 ຈະຕ້ອງຖືກກັກກັນພະຍາດ ເພື່ອເບິ່ງອາການ 14 ວັນ ເລີ່ມແຕ່ວັນທີ 28 ກຸມພາຜ່ານມາ ແລະ ມີສັດລ້ຽງຄືໝາ 2 ໂຕແລ້ວທີ່ຖືກກັກກັນພະຍາດ ໂດຍອີກໂຕໜຶ່ງເປັນຂອງຜູ້ປ່ວຍຄົນໜຶ່ງ ເຊິ່ງໄດ້ຜົນກວດເປັນລົບ, ແຕ່ຈະຕ້ອງກວດຊ້ຳອີກ ກ່ອນຈະປ່ອຍກັບໄປ.
ຢູ່ຮົງກົງພົບຜູ້ຕິດເຊື້ອໄວຣັສໂຄວິດ-19 ຈຳນວນ 102 ຄົນ ແລະ ເສຍຊີວິດແລ້ວ 2 ຄົນ.
