IMF ໃຫ້ 5.000 ລ້ານໂດລາ ສະກັດ “ໂຄວິດ-19” ແຜ່ລາມ
ກອງທຶນການເງິນສາກົນ (IMF) ປະກາດໃຫ້ສິນເຊື່ອວົງເງິນ 5.000 ລ້ານໂດລາ ແກ່ປະເທດຕ່າງໆ ໃນການຕໍ່ສູ້ການແຜ່ລະບາດຂອງໂຣກໂຄວິດ-19.
ທ່ານ ນາງ ຄຣິສຕາລິນາ ຈໍຈີວາ ຜູ້ອຳນວຍການ IMF ກ່າວວ່າ: ເງິນຈຳນວນນີ້ຈະສາມາດເບີກຈ່າຍໄດ້ທັນທີ ເພື່ອໃຫ້ການຊ່ວຍເຫລືອປະເທດໃນຕະຫລາດເກີດໃໝ່ ແລະ ປະເທດທຸກຍາກ ໂດຍເງິນຊ່ວຍເຫລືອດັ່ງກ່າວຈະບໍ່ມີດອກເບ້ຍ ແລະ ປະເທດທີ່ຂໍຮັບການຊ່ວຍເຫລືອບໍ່ຈຳເປັນຕ້ອງເຄີຍມີໂຄງການກັບ IMF ເພື່ອໃຫ້ມີສິດໄດ້ຮັບການຊ່ວຍເຫລືອໃນຄັ້ງນີ້.
ການເຄື່ອນໄຫວຂອງ IMF ມີຂຶ້ນຫລັງຈາກທະນາຄານໂລກ (World Bank) ປະກາດຈະໃຫ້ງົບ 12.000 ລ້ານໂດລາ ເພື່ອຊ່ວຍເຫລືອປະເທດກຳລັງພັດທະນາຮັບມືການລະບາດຂອງໂຣກໂຄວິດ-19.
ທະນາຄານໂລກ ລະບຸວ່າ: ຈະຊ່ວຍເຫລືອປະເທດທຸກຍາກທີ່ສຸດ ແລະ ຢູ່ໃນຄວາມສ່ຽງຕໍ່ການລະບາດຂອງໄວຣັສຫລາຍທີ່ສຸດກ່ອນ ໂດຍການຊ່ວຍເຫລືອຈະມາໃນຮູບແບບເງິນກູ້ດອກເບ້ຍຕໍ່າ, ເງິນຊ່ວຍເຫລືອ ແລະ ການຊ່ວຍເຫລືອທາງດ້ານເຕັກນິກ.
ທັງນີ້ ການຊ່ວຍເຫລືອຫລາຍກວ່າເຄິ່ງໜຶ່ງຈະມາຈາກບໍລິສັດເງິນທຶນສາກົນ ເຊິ່ງເປັນອົງການໃນເຄືອຂ່າຍທະນາຄານໂລກ ທີ່ເຮັດວຽກກັບພາກເອກະຊົນ ໂດຍງົບປະມານ 4.000 ລ້ານໂດລາ ຈະຖືກຈັດສັນມາຈາກກອງທຶນທີ່ມີຢູ່ແລ້ວ.
