ກະຊວງສາທາລະນະສຸກໃຫ້ຂໍ້ມູນແກ່ສັງຄົມ ໃນການປ້ອງກັນພະຍາດ ໂຄວິດ-19
ໃນວັນທີ 4 ມີນາ ນີ້, ຄະນະໂຄສະນາອົບຮົມສູນກາງພັກ ຮ່ວມກັບກະຊວງສາທາລະນະສຸກ ຈັດປາຖະກະຖາກ່ຽວກັບການປ້ອງກັນ ສະກັດກັ້ນ ການລະບາດຂອງພະຍາດ COVID-19, ໂດຍການເຂົ້າຮ່ວມຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ.
ທ່ານ ບຸນກອງ ສີຫາວົງ ໃຫ້ຮູ້ວ່າ: ສປປ ລາວ ໄດ້ປ້ອງກັນ ແລະ ໂຕ້ຕອບພະຍາດ COVID-19 ເລີ່ມແຕ່ມີການລະບາດຢູ່ ສປ ຈີນ ເປັນຕົ້ນມາ ໂດຍລັດຖະບານໄດ້ແຕ່ງຕັ້ງຄະນະກຳມະການສະເພາະກິດປ້ອງກັນ ແລະ ຄວບຄຸມພະຍາດ COVID-19 ພ້ອມທັງໄດ້ເປີດສູນປະຕິບັດການສຸກເສີນດ້ານສາທາລະນະສຸກ ແລະ ເຝົ້າລະວັງກ່ຽວກັບພະຍາດດັ່ງກ່າວຕາມດ່ານຊາຍແດນຂາເຂົ້າ ແລະ ຂາອອກກັ່ນກອງຜູ້ເດີນທາງຜ່ານເຄື່ອງວັດແທກອຸນຫະພູມຕະຫຼອດ 24 ຊົ່ວໂມງ, ຕິດຕາມເຝົ້າລະວັງທຸກກໍລະນີສົງໃສ ໂດຍນຳເອົາເຊື້ອເຂົ້າກວດຜ່ານຫ້ອງວິເຄາະທີ່ໄດ້ມາດຕະຖານໄດ້ 47 ກໍລະນີ, ຜ່ານການກວດແມ່ນບໍ່ພົບເຊື້ອພະຍາດ, ເຖິງວ່າ ສປປ ລາວ ຍັງບໍ່ພົບເຊື້ອພະຍາດນີ້ ແຕ່ ກໍໄດ້ຍົກລະດັບຄວບຄຸມ ແລະ ປ້ອງກັນຂັ້ນສູງສຸດ ທັງໄດ້ກະກຽມໂຮງໝໍຮອງຮັບຖ້າເກີດກໍລະນີມີຜູ້ຕິດເຊື້ອພະຍາດດັ່ງກ່າວ ຄື: ຢູ່ໂຮງໝໍມິດຕະພາບ, ໂຮງໝໍມະໂຫສົດ ແລະ ໂຮງໝໍສູນກາງ 103 ທັງໄດ້ໃຫ້ເປັນຈຸດເປີດກວດສະເພາະກໍລະນີສົງໃສ ໂດຍບໍ່ເສຍຄ່າ, ພ້ອມໄດ້ກະກຽມລົດຮັບສົ່ງຄົນເຈັບເພື່ອຈັດສົ່ງກໍລະນີສົງໃສໄປບ່ອນແຍກປ່ຽວ ແລະ ຜູ້ຕິດເຊື້ອພະຍາດນີ້ ຢູ່ 4 ສູນ ແລະ ພ້ອມໄດ້ກະກຽມເຄື່ອງກວດວິເຄາະເຊື້ອພະຍາດ COVID-19 ແບບພົກພາ 4 ເຄື່ອງ, ເຄື່ອງແທກອຸນຫະພູມແບບມືຖື 207 ເຄື່ອງ, ກ້ອງວັດແທກອຸ່ນຫະພູມ 6 ເຄື່ອງ ແລະ ເຄື່ອງຊ່ວຍຫາຍໃຈ 10 ເຄື່ອງ, ຊຸດປ້ອງກັນໂຕຫລາຍກ່ວາ 1.000 ຊຸດ, ຜ້າອັດປາກ 226.250 ອັນ ແລະ ຍັງສັ່ງຊື້ອີກ 1.500.000 ແຜ່ນ ເຈວລ້າງມື 1.190 ກ່ອງ ແລະ ອື່ນໆ.
ໂອກາດນີ້ທ່ານ ລັດຖະມົນຕີ ຍັງໄດ້ຮຽກຮ້ອງໃຫ້ທຸກຄົນ ກໍຄືສັງຄົມເອົາໃຈໃສ່ປະຕິບັດຕາມມາດຕະການປ້ອງກັນ ພ້ອມທັງຮັກສາ ແລະ ປ້ອງກັນຕົນເອງຢ່າງເອົາໃຈໃສ່ ໂດຍສະເພາະມາດຕະການປ້ອງກັນ ແລະ ຄວບຄຸມຢ່າງຖືກວິທີ ເພາະລະຫວ່າງເດືອນມີນາ-ເມສານີ້ ເປັນເດືອນທີ່ມີຄວາມສ່ຽງສູງທີ່ຈະເກີດພະຍາດນີ້.
