ຢີ່ປຸ່ນຊ່ວຍເຫຼືອໂຄງການຈັດຕັ້ງການບໍລິການດ້ານສຸຂະພາບຜົ້ງປາກໃຫ້ລາວ
ລັດຖະບານຍີ່ປຸ່ນໄດ້ຕົກລົງໃຫ້ການຊ່ວຍເຫຼືອລ້າເປັນຈໍານວນເງິນ
268.910 ໂດລາສະຫະລັດ ເພື່ອຈັດຕັ້ງປະຕິບັດໂຄງການກໍ່ສ້າງຮາກຖານການສຶກສາໃຫ້ແກ່ການສົ່ງເສີມສຸຂະພາບຜົ້ງປາກ
ແລະ ສ້າງລະບົບພູມຄຸ້ມກັນໃຫ້ແກ່ບັນດາແຂວງຕ່າງໆໃນປະເທດລາວ.
ພິທີເຊັນສັນຍາໂຄງການດັ່ງກ່າວໄດ້ມີຂຶ້ນໃນວັນທີ 3 ມີນານີ້, ລະຫວ່າງ ທ່ານ ອິວາໂມໂຕະ ເຄອິຈິ ອຸປະທູດຢີ່ປຸ່ນປະຈຳລາວ ແລະ ທ່ານ ໂມຊິດະ ໂທຊິມິຊຶ ຕົວແທນຈາກອົງການຊ່ວຍເຫຼືອສາກົນດ້ານການສຶກສາທັນຕະກຳ ແຫ່ງປະເທດຍີ່ປຸ່ນ (OISDE), ເຊິ່ງເປັນອົງການບໍ່ຫວັງຜົນກຳໄລຂອງປະເທດຍີ່ປຸ່ນ.ເພື່ອຍົກລະດັບການຮັກສາທາງທັນຕະກຳ, ການປ້ອງກັນ, ການລົບລ້າງພະຍາດໃນຜົ້ງປາກ ແລະ ການຕິດເຊື້ອຂັ້ນຮຸນແຮງໃນລາວ. ການຝຶກອົບຮົມຈະຈັດຕັ້ງປະຕິບັດໃຫ້ຄວາມຮູ້ແກ່ນາງພະຍາບານ ແລະ ນັກຮຽນພະຍາບານ ເຊິ່ງຄາດວ່າ ພວກເຂົາເຫຼົ່ານັ້ນຈະເຮັດວຽກເປັນພະຍາບານທາງດ້ານທັນຕະກຳໃນອະນາຄົດ.
