ຮຽນຮູ້ກົດຈະລາຈອນ: ຕອນ: ວ່າດ້ວຍການລ້ຽງສັດ ແລະ ການປ່ອຍສັດລ້ຽງ

ອີງຕາມດຳລັດວ່າດ້ວຍການປັບໃໝ ແລະ ມາດຕະການຕ່າງໆຕໍ່ຜູ້ລະເມີດລະບຽບກົດໝາຍວ່າດ້ວຍການຈະລາຈອນທາງບົກ, ການຂົນສົ່ງທາງບົກ ແລະ ການປົກປັກຮັກສາທາງຫລວງ ມາດຕາທີ 21 ວ່າດ້ວຍ ການລ້ຽງສັດ ແລະ ການປ່ອຍສັດລ້ຽງຢູ່ຕາມເສັ້ນທາງລະບຸວ່າ:

“ຫ້າມປ່ອຍສັດລ້ຽງ ຫລື ປ່ອຍສັດທຸກຊະນິດຕາມເສັ້ນທາງ ໂດຍສະເພາະຢູ່ໃນເຂດເທສະບານແຂວງ ແລະ ເທສະບານເມືອງ, ການເຄື່ອນຍ້າຍສັດຕາມເສັ້ນທາງ ຕ້ອງມີຜູ້ຄວບຄຸມ ແລະປະຕິບັດຕາມກົດຈະລາຈອນ.

ເຈົ້າຂອງ ຫລື ຜູ້ຄອບຄອງສັດຜູ້ໃດຫາກລະເມີດ ຈະຖືກປັບໃໝ 20 ພັນກີບ/ວັນ/ສັດລ້ຽງ 4​ ຕີນ 1 ໂຕ.

ໃນກໍລະນີສັດລ້ຽງຂາດການຮັກສາ ຫລື ຖືກປ່ອຍຕາມເສັ້ນທາງ ເຈົ້າໜ້າທີ່ຈະກັກສັດດັ່ງກ່າວໄວ້ ຈົນກວ່າຈະມີເຈົ້າຂອງສັດໄຖ່ຄືນ.

ໃນກໍລະນີສັດຫາກເປັນຕົ້ນເຫດຂອງການເກີດອຸບັດເຫດ ຫລື ໄດ້ສ້າງຄວາມເສຍຫາຍແກ່ສິ່ງປະກອບຕ່າງໆຂອງທາງ, ເຈົ້າຂອງສັດ ຫລື ຜູ້ຄອບຄອງສັດ ຕ້ອງຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ.