ອຸຕຸເຕືອນໃຫ້ຍົກສູງສະຕິລະວັງຕໍ່ສະພາບ ການປ່ຽນແປງຂອງອາກາດ

     ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນປະຊາຊົນບັນດາເຜົ່າໃນທົ່ວປະເທດໃຫ້ຍົກສູງສະຕິລະວັງຕົວໃນດ້ານການຮັກສາສຸຂະພາບ ແລະ ອາຄານທີ່ຢູ່ອາ​ໄສ, ພາຍຫລັງເຫັນວ່າໄລຍະນີ້ສະພາບອາກາດມີການປ່ຽນແປງໄວວາແບບຜິດປົກກະຕິ, ຂະນະທີ່ ການຄາດຄະເນສະພາບອາກາດຢູ່ທົ່ວປະເທດໃນອາທິດນີ້ຈະມີຝົນ, ໝາກເຫັບຕົກ ແລະ ຟ້າຜ່າເນື່ອງຈາກຄວາມກົດດັນອາກາດຕໍ່າຂອງອາກາດຮ້ອນທີ່ມີກໍາລັງອ່ອນຍັງພັດປົກ

ຄຸມທົ່ວທຸກພາກຂອງປະເທດເຮົາ ສົມທົບກັບກະແສລົມຕາເວັນຕົກພັດປົກຄຸມ

ເປັນສ່ວນໃຫຍ່ ຊຶ່ງຈະເຮັດໃຫ້ອາກາດຮ້ອນ, ມີຝົນຕົກ ແລະ ລົມພັດແຮງຢູ່

ຫລາຍທ້ອງຖິ່ນໃນແຕ່ລະພາກ. ຕໍ່ສະພາບດັ່ງກ່າວ, ປະຊາຊົນບັນດາເຜົ່າຕ້ອງເອົາໃຈໃສ່ຮັກສາສຸຂະພາບໃຫ້ດີ ໂດຍສະເພາະແມ່ນເດັກນ້ອຍ ແລະ ຜູ້ສູງອາຍຸ ຕ້ອງໄດ້ເບິ່ງແຍງເປັນພິເສດ ເພື່ອບໍ່ໃຫ້ເຈັບປ່ວຍໄຂ້ໄດ້ງ່າຍ, ພ້ອມ

ນີ້ ຕ້ອງໝັ່ນກວດກາຄວາມແໜ້ນໜາຂອງອາຄານ, ເຮືອນຊານ ຫລື ສະຖານ ທີ່ຢູ່ອາໄສຂອງຕົນໃຫ້ແໜ້ນໜາຢູ່ສະເໝີ ເພື່ອໃຫ້ສາມາດຕ້ານທານກັບລົມພັດ

ແຮງທີ່ຈະຕາມມາ. ດັ່ງກໍລະນີມີຝົນຕົກໜັກ ແລະ ລົມພັດແຮງ, ພ້ອມທັງມີ

ໝາກເຫັບຕົກເປັນບໍລິເວນກວ້າງຢູ່ນະຄອນຫລວງວຽງຈັນ​ເມື່ອ​ມໍ່​ໆ​ມາ​ນີ້ ອັນໄດ້ສ້າງຄວາມເສຍຫາຍໃຫ້ແກ່ອາຄານ, ເຮືອນຊານບ້ານຊ່ອງຂອງປະຊາຊົນຢູ່ຫລາຍພື້ນທີ່ ຊຶ່ງບາງບ່ອນໄດ້ມີຕົ້ນໄມ້ໃຫຍ່ຫັກລົ້ມທັບເຮືອນ, ລົດໃຫຍ່, ລົດຈັກ ແລະ ຊັບສິນອື່ນໆຂອງປະຊາຊົນເປ່ເພເສຍຫາຍຈໍານວນຫລາຍ. ສະນັ້ນ ເພື່ອຫລີກລ່ຽງຄວາມອັນຕະລາຍດັ່ງກ່າວ ແມ່ນໃຫ້ຢູ່ຫ່າງໄກຈາກຕົ້ນໄມ້ໃຫຍ່ ຫລືສິ່ງປຸກສ້າງຕ່າງໆທີ່ບໍ່ທັນສໍາເລັດ ເພື່ອຮັບປະກັນຄວາມປອດໄພ ແລະ ໃຫ້ເອົາໃຈໃສ່ຕິດຕາມສະພາບອາກາດຈາກອຸຕຸນິຍົມ ແລະ ອຸທົກກະສາດເປັນປະຈໍາ.

      ສໍາລັບສະພາບອາກາດໃນແຕ່ລະພາກມີດັ່ງນີ້: ພາກເໜືອດ້ານຕາເວັນອອກ ແຂວງຜົ້ງສາລີ, ຫົວພັນ ແລະ ຊຽງຂວາງ ອາກາດຈະຮ້ອນ ພ້ອມມີລົມແຮງຢູ່ບາງທ້ອງຖິ່ນ, ອຸນຫະພູມແຕ່ 15-30 ອົງສາ. ພາກຕາເວັນຕົກແຂວງອຸດົມໄຊ, ບໍ່ແກ້ວ, ຫລວງພະບາງ ແລະ ໄຊຍະບູລີ ອາກາດຈະຮ້ອນອຸນຫະພູມແຕ່ 18-35 ອົງສາ. ພາກກາງ ແຂວງວຽງຈັນ, ນະຄອນຫລວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ອາກາດຈະຮ້ອນໃນຕອນກາງເວັນ ແລະ ຈະມີຝົນຕົກ ພ້ອມລົມແຮງ ອຸນຫະພູມແຕ່ 20-36 ອົງສາ ແລະ ພາກໃຕ້ ແຂວງຈໍາປາສັກ, ສາລະວັນ, ເຊກອງ ແລະ ອັດຕະປື ອາກາດຈະຮ້ອນ ແລະ ມີຝົນຕົກ ອຸນຫະພູມແຕ່ 20-36 ອົງສາ.