ບໍລິສັດ ສະຕາຟິນເທັກຈຳກັດຜູ້ດຽວ ໄດ້ຮັບການການບໍລິການ BCEL E-Commerce
ພິທີລົງນາມການຮ່ວມມືລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ(ທຄຕລ) ແລະ ບໍລິສັດ ສະຕາຟິນເທັກ ຈຳກັດຜູ້ດຽວ ວ່າດ້ວຍ ການບໍລິການ E-Commerce. ໄດ້ມີຂຶ້ນໃນວັນທີ 27 ກຸມພາຜ່ານມານີ້ ທີ່ສຳນັກງງານໃຫຍ່ ບໍລິສັດສະຕາໂທລະຄົມ ໂດຍ ທ່ານ ນັນທະລາດ ແກ້ວປະເສີດ ຮອງຜູ້ອຳນວຍການ ທະນາຄານການຄ້າຕ່າງປະເທດລາວ ມະຫາຊົນ ແລະ ທ່ານ ລີວ ມີງ ຮ່າ ຜູ້ອໍານວຍການໃຫຍ່ບໍລິສັດ ສະຕາຟິນເທັກ ຈໍາກັດຜູ້ດຽວ. ໂດຍການເຂົ້າຮ່ວມເປັນສັກຂີພະຍານຂອງທ່ານ ສຸລິສັກ ທຳນຸວົງ ຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານແຫ່ງ ສປປ ລາວ ຄະນະຜູ້ບໍລິຫານທັງສອງຝ່າຍ, ນຳດ້ວຍ.
ການຮ່ວມມືດັ່ງກ່າວແມ່ນເພື່ອສະໜອງການບໍລິການດ້ານ “BCEL E-Commerce” ກໍ່ຄືການຊຳລະສະສາງຄ່າສິນຄ້າ ແລະ ບໍລິການທີ່ສັ່ງຊື້ຜ່ານເວັບໄຊທ໌ຂອງບໍລິສັດ ສະຕາຟິນເທັກ ຈຳກັດຜູ້ດຽວ (ພາຍໃຕ້ເຄື່ອງໝາຍການຄ້າ ຢູມັນ ນີ). ເປັນການໝູນໃຊ້ເທັກໂນໂລຊີທີ່ທັນສະໄໝເຂົ້າໃນການອຳນວຍຄວາມສະດວກໃຫ້ແກ່ລູກຄ້າຂອງບໍລິສັດ ສະຕາຟິນເທັກ ແລະ ທຄຕລ ໃນການຊຳລະສະສາງ ບໍ່ວ່າຈະຢູ່ພາຍໃນ ແລະ ຕ່າງປະເທດກໍສາມາດສັ່ງຊື້ສິນຄ້າ ແລະ ບໍລິການແບບອອນລາຍ ຂອງບໍລິສັດ ສະຕາຟິນເທັກ ໄດ້ຕະຫຼອດ 24 ຊົ່ວໂມງ ໂດຍສາມາດຊຳລະຜ່ານບັດVISA, MasterCard, JCB,UnionPay, AliPay, WeChatPayແລະ UPI QR.ການບໍລິການດ້ານ “E-Commerce” ບໍ່ພຽງແຕ່ອຳນວຍຄວາມສະດວກໃຫ້ແກ່ລູກຄ້າໃນການຊຳລະຄ່າສິນຄ້າ ແລະ ບໍລິການທີ່ສາມາດກະຕຸ້ນການຕັດສິນໃຈຊື້ຂອງລູກຄ້າ ແລະ ສາມາດສ້າງຍອດຂາຍໄດ້ສູງໃນເວລາອັນສັ້ນໄດ້ເທົ່ານັ້ນ, ແຕ່ຍັງປະກອບສ່ວນໃຫ້ການຊື້-ຂາຍສິນຄ້າ ແລະ ບໍລິການຕ່າງໆເພີ່ມຂຶ້ນ, ຊ່ວຍໃຫ້ເສດຖະກິດຂະຫຍາຍຕົວຂຶ້ນໄປ ຄຽງຄູ່ກັບການພັດທະນາທີ່ຫັນປ່ຽນສູ່ຍຸກດີຈິຕໍ້ຕາມທິດທາງແຜນການຂອງລັດຖະບານວາງອອກ.
ທຄຕລ ເປັນທະນາຄານທຳອິດໃນສປປລາວທີ່ໃຫ້ບໍລິການ E-commerce
ເຊິ່ງໄດ້ເລີ່ມໃຫ້ບໍລິການມາຕັ້ງແຕ່ປີ 2013, ຮອດປະຈຸບັນມີ 24 ບໍລິສັດໄດ້ເຊັນສັນຍານຳໃຊ້ລະບົບການຊໍາລະອອນລາຍນີ້.ບໍລິສັດສະຕາຟິນເທັກກໍເປັນອີກໜື່ງບໍລິສັດທີ່ເຫັນໄດ້ເຖິງປະໂຫຍດຈາກການໃຊ້ລະບົບການຊຳລະອອນລາຍນີ້ແລະ ເຊື່ອໝັ້ນວ່າ BCEL E-Commerce ຈະສາມາດສົ່ງເສີມທຸລະກິດ,
ຊ່ວຍຂະຫຍາຍຕະຫຼາດ ຂອງບໍລິສັດສະຕາຟິນເທັກໄດ້ກວ້າງຂວາງຍິ່ງຂຶ້ນ.
ການຮ່ວມມືໃນຄັ້ງນີ້ຖືເປັນອີກໜຶ່ງຍຸດທະສາດການພັດທະນາຂອງ ທຄຕລ ເພື່ອຕອບສະໜອງຄວາມຕ້ອງການຂອງລູກຄ້າ ແລະ ມອບປະສົບການບໍລິການທາງດ້ານການເງິນແບບດິຈິຕໍ້ທີ່ມີຄວາມສະດວກ, ວ່ອງໄວ ທັງຮັບປະກັນດ້ານການຄຸ້ມຄອງຄວາມສ່ຽງໃຫ້ແກ່ລູກຄ້າທັງສອງຝ່າຍໄດ້ເປັນຢ່າງດີ.
ທະນາຄານການຄ້າຕ່າງປະເທດລາວ ມະຫາຊົນ ທັນສະໄໝ ວ່ອງໄວ ໝັ້ນໃຈ
ຊ່ອງທາງຕິດຕໍ່ Facebook: BCEL Bank, Website: www.bcel.com.la
