ໄວຣັດໂຄໂຣນາອາດມີຊີວິດຢູ່ໄດ້ 96 ຊົ່ວໂມງເທິງໜ້າຈໍສະມາດໂຟນ

ລູກເມືອງພວນ

ຜົນງານການຄົ້ນຄ້ວາໃໝ່ໆຜ່ານມາ ໃຫ້ຮູ້ວ່າ ໄວຣັດໂຄໂຣນາ ອາດມີຊີວິດຢູ່ດົນກວ່າ 4 ວັນເທິງໜ້າຈໍໂທລະສັບ ແລະ ສາມາດຕິດຕໍ່ເຊື້ອໄດ້ໂດຍບໍ່ຜ່ານການສຳພັດກັບຜູ້ປ່ວຍ.

ຖ້າຫາກມີຜູ້ຕິດເຊື້ອ nCoV ໂດຍບໍ່ຜ່ານການສຳພັດກັບຄົນປ່ວຍມາກ່ອນ ແມ່ນມີຄວາມເປັນໄປໄດ້ວ່າ ອາດຕິດເຊື້ອຈາກອຸປະກອນມືຖື. Rudra Barkappanavar ນັກລະບາດວິທະຍາ ຊຶ່ງເປັນຜູ້ຄົ້ນຄ້ວາໄວຣັດໂຄໂຣນາ ຢູ່ທີ່ສູນວິທະຍາສາດການແພດ ມະຫາວິທະນາໄລ Tennessee ສະຫະລັດໃຫ້ຮູ້ວ່າ: ຢູ່ບົນພື້ນຜິວຂອງເຄື່ອງແກ້ວ ໂດຍສະເພາະແມ່ນໜ້າຈໍໂທລະສັບອາດຈະເປັນບ່ອນລີ້ຊ່ອນຂອງເຊື້ືອໄວຣັດໂຄໂຣນາ ຊຶ່ງມັນສາມາດຢູ່ໄດ້ເຖິງ 96 ຊົ່ວໂມງ ດ້ວຍອຸນຫະພູມຢູ່ໃນຫ້ອງ.

ການສັນນິຖານດັ່ງກ່າວແມ່ນອີງໃສ່ຂໍ້ມູນທີ່ເກັບກຳໄດ້ຈາກພະຍາດSARS 2003 ແລະ Covid-19. ທັງສອງພະຍາດນີ້ມີເຄັດລັບແຜ່ເຊື້ອຄ້າຍຄືກັນເຖິງ 80%. ເຊື້ອພະຍາດອາດຈະແຜ່ເຊື້ອໂດຍຜ່ານຢອດນໍ້ານ້ອຍໆທີ່ກະເດັນອອກຈາກການໄອ, ຈາມໄປຕາມອາກາດ.

ໂດຍທາງທິດສະດີແລ້ວ, ຜູ້ນຳໃຊ້ໂທລະສັບອາດຈະຕິດເຊື້ອໄດ້ຈາກໜ້າຈໍໂທລະສັບຂອງຕົນເອງ. ຖ້າຫາກມີຜູ້ໄອ, ຈາມໃກ້ກັບໜ້າຈໍ ສະມາດໂຟນ ມັນກໍຈະກະເດັນໄປຕິດຢູ່ກັບໜ້າຈໍໂທລະສັບ ເມື່ອເຮົາເອົານິ້ວມືເຂ່ຍໜ້າຈໍໂທລະສັບ ມືຂອງເຮົາກໍຈະໄປຕິດເອົາເຊື້ອໄວຣັດທີ່ຕິດຢູ່ໜ້າຈໍສະມາດໂຟນນັ້ນ ແລະ ໃນຂະນະນັ້ນຖ້າທ່ານຫາກບໍ່ມີການອານາໄມຖືກວິທີ ແມ່ພະຍາດອາດຈະຜ່ານທາງດັງ, ທາງປາກ ແລ້ວເຂົ້າໄປສູ່ຮ່າງກາຍຂອງເຮົາ.

ການຄົ້ນຄ້ວາດັ່ງກ່າວຖືກຈັດຕັ້ງປະຕິບັດໂດຍອົງການຄົ້ນຄ້ວາການຕະຫຼາດ Dscoutສະຫະລັດອາເມລິກາ ແລະ ໃຫ້ຮູ້ວ່າ: ຕາມທຳມະດາແລ້ວ ຜູ້ໜຶ່ງໆ ອາດຈະຈັບໂທລະສັບຂຶ້ນລົງໃສ່ຫູໃນມື້ໜຶ່ງປະມານ 2.600 ເທື່ອ. ຫຼາຍໂຄງການຄົ້ນຄ້ວາກ່ອນໜ້ານັ້ນກໍຢືນຢັນວ່າ ໜ້າຈໍໂທລະສັບ ອາດມີເຊື້ອຈຸລະໂຣກ ແລະ ໄວຣັດຫຼາຍກວ່າຫົວຊັກໂຄກອີກດ້ວຍ.

ກະຊວງສາທາລະນະສຸກ ສິງກະໂປ ອອກຄຳເຕືອນວ່າ ຄວນທຳຄວາມສະອາດໂທລະສັບ ແລະ ລ້າງມື້ ເປັນປະຈຳ ອາດຈະສະກັດກັ້ນ ແລະ ຕ້ານໄວຣັດໂຄໂຣນາ ໄດ້ດີກວ່າການໃສ່ໜ້າກາກອານາໄມອີກດ້ວຍ. Apple ກໍອອກມາເຕືອນຜູ້ນຳໃຊ້ໂທລະສັບວ່າ ຄວນເຮັດອານາໄມໜ້າຈໍໂທລະສັບດ້ວຍຜ້າເຊັດ microfiber ປຽກຊຸ່ມທີ່ມີສະບູ ຫຼື ອາດຈະທຳຄວາມສະອາດໜ້າຈໍໂທລະສັບດ້ວຍຜ້ານຸ້ມໆຈຸບນໍ້າຢາລ້າງເຊື້ອ. ນອກຈາກນັ້ນ ອຸປະກອນອື່ນໆ ເຊັ່ນ ດອກໄຟ ຢູວີ(UV)ກໍອາດຈະທຳຄວາມສະອາດໜ້າຈໍໂທລະສັບໄດ້ເຊັ່ນກັນ.