ອາເມລິກາ ພົບຜູ້ເສຍຊີວິດໃນປະເທດ ຄົນທີ 2 ຈາກ “ໂຄວິດ-19”
ລັດຖະບານອາເມລິກາຢືນຢັນການພົບຜູ້ເສຍຊີວິດໃນປະເທດຈາກເຊື້ອໄວຣັສໂຄໂຣນາສາຍພັນໃໝ່ເປັນຄົນທີ 2 ໂດຍພົບໃນລັດວໍຊິງຕັນເຊັ່ນດຽວກັບຜູ້ເສຍຊີວິດຄົນທຳອິດ.
ສູນຄວບຄຸມ ແລະ ປ້ອງກັນພະຍາດຂອງອາເມລິກາ (CDC) ອອກຖະແຫລງການໃນວັນທີ 1 ມີນາ ເລື່ອງການພົບຜູ້ເສຍຊີວິດໃນປະເທດຈາກເຊື້ອໄວຣັສໂຄໂຣນາສາຍພັນໃໝ່ “ໂຄວິດ-19” ຄົນທີ 2 ເປັນຊາຍອາຍຸປະມານ 70 ປີ ເຊິ່ງມີພະຍາດປະຈຳຕົວ ເປັນຜູ້ປ່ວຍຂອງສູນການແພດໄລແຄຣ ຢູ່ເມືອງເຄິກແລນ ໃນເຂດຄິງ ຂອງລັດວໍຊິງຕັນ.
ຂະນະທີ່ຜູ້ປ່ວຍຈາກໂຣກໂຄວິດ-19 ສະເພາະຢູ່ລັດວໍຊິງຕັນມີຢ່າງໜ້ອຍ 12 ຄົນ ໜຶ່ງໃນນັ້ນຄືຜູ້ປ່ວຍຄົນທຳອິດຂອງອາເມລິກາ ຊາຍອາຍຸປະມານ 30 ປີ ອາໄສຢູ່ເມືອງສະໂນໂຮມິດ ໃກ້ກັບເມືອງຊີແອດເທິລ ເດີນທາງກັບໄປຢ້ຽມຢາມບ້ານເກີດຢູ່ເມືອງອູ່ຮັ່ນ ແລະ ກັບມາອາເມລິກາໃນວັນທີ 15 ມັງກອນຜ່ານມາ.
