7 ຄຸນປະໂຫຍດສູງສຸດຈາກການເຕັ້ນແອໂຣບິກ

     ການເຕັ້ນແອໂຣບິກ ເປັນໜຶ່ງກິດຈະກຳໃນການອອກກຳລັງກາຍທີ່ໃຫ້ປະໂຫຍດຫລວງຫລາຍຕໍ່ສຸຂະພາບຂອງທ່ານ.

     1. ສາມາດເພີ່ມປະສິດທິພາບການເຮັດວຽກຂອງຫົວໃຈ ແລະ ລະບົບໄຫລວຽນເລືອດ, ການຟອກເລືອດ, ເຮັດໃຫ້ຫົວໃຈມີຄວາມແຂງແຮງຫລາຍຂຶ້ນ ແລະ ມີຂະໜາດຂອງຫົວໃຈໃຫຍ່ຂຶ້ນໄປຕາມຄວາມແຂງແຮງ. ຫົວໃຈຂອງຄົນປົກກະຕິທົ່ວໄປມີຂະໜາດສະເລ່ຍ 10 cm3 ຕໍ່ນຳ້ໜັກໂຕ 1 ກິໂລກຣາມ, ແຕ່ຜູ້ທີ່ອອກກຳລັງກາຍເປັນປະຈຳສະໝໍ່າສະເໝີ ຫົວໃຈຈະມີຂະໜາດໃຫຍ່ຂຶ້ນສະເລ່ຍ 15 cm3 ຕໍ່ນຳ້ໜັກໂຕ 1 ກິໂລກຣາມ ເຮັດໃຫ້ຫົວໃຈມີເສັ້ນເລືອດຝອຍເພີ່ມຫລາຍຂຶ້ນ, ການໄຫລວຽນຂອງເລືອດທີ່ໄປລ້ຽງພາກສ່ວນຕ່າງໆຂອງຮ່າງກາຍກໍດີຂຶ້ນນຳ, ມີອັດຕາການເຕັ້ນຂອງຫົວໃຈຂະນະພັກຊ້າລົງ, ເມື່ອຍຊ້າລົງ ຈະຮູ້ສຶກວ່າຮ່າງກາຍຟິດ, ຈະອົດທົນຕໍ່ຄວາມໜັກຂອງການອອກກຳລັງກາຍໄດ້ຫລາຍຂຶ້ນ.

     2. ຊ່ວຍຫລຸດຜ່ອນລະດັບຄວາມດັນເລືອດ ທັງ 2 ຄ່າ ໄດ້ແກ່ : ຄ່າຄວາມດັນເລືອດຂະນະຫົວໃຈບີບໂຕ ແລະ ຄາຍໂຕ ຫລຸດຕໍ່າລົງໄດ້.

     3. ຊ່ວຍເຮັດໃຫ້ປະລິມານເມັດເລືອດແດງ ແລະ ຮີໂມໂກລບິນ ເພີ່ມຫລາຍຂຶ້ນ ຈາກການຫາຍໃຈທີ່ດີ, ປອດສາມາດຮັບອົກຊີແຊນທີ່ຫາຍໃຈເຂົ້າໄປໄດ້ຫລາຍຂຶ້ນ, ເລືອດຈຶ່ງໄດ້ຮັບອົກຊີແຊນຫລາຍຂຶ້ນນຳ ສົ່ງຜົນໃຫ້ການຈັບອົກຊີແຊນຂອງເມັດເລືອດແດງດີຂຶ້ນ ແລະ ພຽງພໍຕໍ່ຄວາມຕ້ອງການຂອງຮ່າກາຍ.

     4. ຊ່ວຍຫລຸດໄຂມັນໃນເລືອດຊະນິດ LDL (Low Density Lipoprotein) ແລະ ເພີ່ມປະລິມານໄຂມັນ HDL (High Density Lipoprotein) ໃຫ້ຫລາຍຂຶ້ນ ຈຶ່ງຊ່ວຍປ້ອງກັນພະຍາດຫລອດເລືອດຫົວໃຈອັດຕັນໄດ້ ແລະ ຫລຸດຄວາມສ່ຽງຂອງຫລອດເລືອດແຕກ, ຕີບ, ຕັນໄດ້.

     5. ຊ່ວຍໃຫ້ລະບົບຫາຍໃຈເຮັດວຽກໄດ້ຢ່າງຄ່ອງແຄ້ວຂຶ້ນ, ກ້າມຊີ້ນທີ່ເຮັດໜ້າທີ່ຫາຍໃຈແຂງແຮງ ແລະ ຄວາມຫົດຢືດຂອງປອດເພີ່ມຂຶ້ນ ເຮັດໃຫ້ສາມາດຫາຍໃຈໄດ້ເຕັມປອດ, ສືບອົກຊີແຊນເຂົ້າເຕັມທີ່.

     6. ຊ່ວຍໃຫ້ລະບົບກ້າມຊີ້ນ, ກະດູກ ແລະ ຂໍ້ຕໍ່ແຂງແຮງ, ມີກຳລັງ ແລະ ມີຄວາມຫົດຢືດໃນການເຄື່ອນໄຫວເພີ່ມຫລາຍຂຶ້ນ, ຊ່ວຍປ້ອງກັນການອັກເສບຂອງຂໍ້ຕໍ່, ຫລຸດອາການປວດຫລັງ, ປວດແອວ ແລະ ປວດຂໍ້ຕ່າງໆ, ຊ່ວຍໃຫ້ກະດູກມີຄວາມໜາແໜ້ນ.

     7. ຊ່ວຍໃນການເຮັດວຽກຂອງລະບົບປະສາດ ຈາກການຝຶກການເຮັດວຽກປະສານຄວາມສຳພັນຂອງອະໄວຍະວະຕ່າງໆຂອງຮ່າງກາຍຂະນະເຕັ້ນແອໂຣບິກ ເຮັດໃຫ້ການຊົງໂຕ ແລະ ການຄວບຄຸມຕົນເອງປະສານງານກັນດີຂຶ້ນ.