ທະນາຄານພັດທະນາອາຊີຊ່ວຍສະມາຊິກສູ້ໄວຣັສໂຄໂຣນາ
ທະນາຄານພັດທະນາອາຊີ ຫລື ADB ອະນຸມັດງົບປະມານເພີ່ມອີກ 2 ລ້ານໂດລາ ຊ່ວຍສະມາຊິກ ເຊິ່ງເປັນປະເທດກຳລັງພັດທະນາໃນການຢັບຢັ້ງເຊື້ອໄວຣັສໂຄໂຣນາສາຍພັນໃໝ່ “ໂຄວິດ-19”.
ສຳນັກຂ່າວຕ່າງປະເທດລາຍງານວ່າ: ທະນາຄານພັດທະນາອາຊີ (ADB) ອອກຖະແຫລງການໃນວັນທີ 27 ກຸມພານີ້ ເລື່ອງການຈັດສັນງົບປະມານສຸກເສີນເພີ່ມອີກ 2 ລ້ານໂດລາສະຫະລັດ ເພື່ອສະໜັບສະໜູນພາລະກິດຂອງສະມາຊິກ ໂດຍສະເພາະກຸ່ມປະເທດກຳລັງພັດທະນາ ເພື່ອໃຊ້ສຳລັບພາລະກິດປ້ອງກັນ ແລະ ຕໍ່ສູ້ກັບເຊື້ອໄວຣັສໂຄໂຣນາສາຍພັນໃໝ່ “ໂຄວິດ-19”.
ADB ເຄີຍອະນຸມັດເງິນໄປແລ້ວ 2 ລ້ານໂດລາສະຫະລັດ ໃນຕົ້ນເດືອນນີ້ ເພື່ອຊ່ວຍເຫລືອສະເພາະເຈາະຈົງແກ່ຈີນ, ກຳປູເຈຍ, ລາວ, ມຽນມາ, ຫວຽດນາມ ແລະ ໄທ ໃນການຮັບມືກັບສະຖານະການໂຄວິດ-19 ໃນແຕ່ລະປະເທດ. ນອກຈາກນີ້ ADB ຢືນຢັນຄວາມພ້ອມໃນການຮ່ວມມືກັບອົງການອະນາໄມໂລກ (WHO) ເພື່ອຊ່ວຍເຫລືອກຸ່ມປະເທດໃນພາກພື້ນອາຊີ ແລະ ປາຊີຟິກ ໃນການຕໍ່ສູ້ກັບເຊື້ອໄວຣັສໂຄໂຣນາສາຍພັນໃໝ່ຕໍ່ໄປ.
