ໂຄວິດ-19 ຍັງເດີນໜ້າເປັນເພັດຊະຄາດ
ທິດກໍ່າ:
ມາຮອດປັດຈຸບັນ ການລະບາດຂອງເຊື້ອໄວຣັສສາຍພັນໃໝ່ໂຄໂຣນາ ຫລື ມີຊື່ຫຍໍ້ວ່າ: “ໂຄວິດ-19” ຍັງເດີນໜ້າລາມພະລາມຈົວໄປໃນຫລາຍປະເທດ. ຫລ້າສຸດມາຮອດວັນທີ 24 ກຸມພາ 2020 ອົງການອະນາໄມໂລກໄດ້ແຈ້ງວ່າມີຜູ້ຕິດເຊື້ອໃນທົ່ວໂລກໄປແລ້ວ 79.331 ຄົນ, ມີຜູ້ເສຍຊີວິດເຖິງ 2.618 ຄົນ. ສະເພາະຢູ່ຈີນເອງມາຮອດປັດຈຸບັນມີຜູ້ຕິດເຊື້ອທັງໝົດ 77.262 ຄົນ, ເສຍຊີວິດ 2.595 ຄົນ. ໃນບັນດາປະເທດທີ່ມີການແຜ່ລະບາດກໍໄດ້ຂະຫຍາຍລາມໄປເຖິງ 20 ກວ່າປະເທດແລ້ວ. ສະເພາະເຂດອາຊີເຮົາ ປັດຈຸບັນຢູ່ປະເທດເກົາຫລີໃຕ້ພວມແຜ່ລະບາດໜັກຮອງຈາກຈີນລົງມາ. ນອກນັ້ນ ກໍມີຍີ່ປຸ່ນ, ສິງກະໂປ, ມາເລເຊຍ, ຫວຽດນາມ, ຟີລິບປິນ, ກຳປູເຈຍ ບ່ອນໜ້ອຍບ່ອນຫລາຍ.
ສະເພາະຢູ່ ສປປ ລາວເຮົາ ທີ່ມີຊາຍແດນຕິດກັບຈີນຍັງບໍ່ທັນມີຂ່າວຄາວຢ່າງເປັນທາງການວ່າມີຜູ້ຕິດເຊື້ອຊະນິດນີ້. ໃນຊ່ວງໄລຍະພະຍາດນີ້ເລີ່ມລະບາດຂຶ້ນມາໃໝ່ໆກໍມີການສົງໄສວ່າມີຜູ້ຕິດເຊື້ອຢູ່ແຂວງຜົ້ງສາລີ, ແຕ່ສຸດທ້າຍຜ່ານການກວດກາວິເຄາະຂອງແພດໝໍກໍຢັ້ງຢືນວ່າຍັງບໍ່ທັນມີໃຜຕິດເຊື້ອພະຍາດຊະນິດນີ້. ຫລ້າສຸດມີກະແສຂ່າວຮືຮາກັນວ່າ: ໄດ້ມີຄົນຈີນຕິດເຊື້ອໂຄໂຣນາຢູ່ຕະຫລາດຊັ່ງຈຽງ, ແຕ່ສຸດທ້າຍກໍເປັນພຽງຂ່າວຊ່າລື ເພາະທາງຄະນະບໍລິຫານຕະຫລາດດັ່ງກ່າວໄດ້ອອກມາແກ້ຂ່າວຢືນຢັນມັນເປັນພຽງກະແສຂ່າວປອມບໍ່ມີມູນຄວາມຈິງແຕ່ປະການໃດ.
ແນວໃດກໍດີ, ຕາມເຮົາຄິດ ເຖິງວ່າມັນບໍ່ທັນເກີດຂຶ້ນຢູ່ບ້ານເຮົາກໍຕາມ, ແຕ່ພວກເຮົາກໍຕ້ອງໄດ້ກຽມພ້ອມ ເພື່ອຮັບມືໃຫ້ທັນການຕາມແພດໝໍ ກໍຄືອົງການທີ່ກ່ຽວຂ້ອງເພິ່ນໄດ້ແນະນຳ. ຕາມທີ່ເຮົາໄດ້ຕິດຕາມແຫລ່ງຂ່າວຄາວກ່ຽວກັບການກຽມຄວາມພ້ອມຮັບມືກັບໂຣກລະບາດຊະນິດນີ້, ພັກ ແລະ ລັດຖະບານເຮົາ ກໍຄືຂະແໜງການກ່ຽວຂ້ອງ ໄດ້ກະກຽມສະຖານທີ່ໄວ້ຮອງຮັບ ໂດຍສະເພາະແມ່ນສະຖານທີ່ປິ່ນປົວ ໂດຍໄດ້ກຳນົດເອົາໂຮງໝໍມິດຕະພາບກັບໂຮງໝໍເສດຖາທິລາດ ແລະ ໂຮງໝໍ 103. ໄປພ້ອມໆກັນນັ້ນ ກໍໄດ້ກະກຽມກຳລັງແພດໝໍ ນັບທັງຢຸຢາທານັງໄວ້ເປັນຢ່າງດີ. ນອກຈາກທາງພາຍໃນເຮົາໄດ້ມີຄວາມພ້ອມແລ້ວ, ບັນດາປະເທດເພື່ອນມິດກໍໄດ້ໃຫ້ການຊ່ວຍເຫລືອຢ່າງເຕັມທີ່ ເປັນຕົ້ນສະຫະລັດອາເມລິກາກໍໄດ້ໃຫ້ທຶນຊ່ວຍເຫລືອ ເພື່ອຮັບມືຕອບໂຕ້ເຖິງ 100 ລ້ານໂດລາ, ລັດຖະບານປະເທດການາດາຊ່ວຍ 103.000 ໂດລາການາດາ. ກໍຂໍໃຫ້ຄົນລາວເຮົາ ກໍຄືປະເທດຊາດບ້ານເມືອງຈົ່ງໄດ້ຫລຸດພົ້ນອອກຈາກວິກິດມະຫັນຕະໄພຄັ້ງນີ້ໂດຍປາສະຈາກຄົນເຈັບຄົນຕາຍຫາຍຍານະຄັ້ງນີ້ຢ່າງມີຄວາມສະຫງົບປອດໄພດ້ວຍເຖີດ.
ເຊື້ອພະຍາດສາຍພັນໃໝ່ໂຄໂຣນາເປັນພະຍາດຊະນິດໜຶ່ງທີ່ມີການຕິດແປດໄວ ແລະ ຮຸນແຮງ. ຖ້າປິ່ນປົວບໍ່ທັນກໍເປັນອັນວ່າຕາຍໄປໃນທີ່ສຸດ. ຖ້າເກີດຢູ່ໃນປະເທດທີ່ທຸກຍາກຂາດຢຸຢາທານັງກໍຍິ່ງລ້າງຜານຄົນໃນປະເທດຢ່າງໜ້າວິຕົກ ເຊິ່ງບໍ່ຕ່າງຫຍັງກັບບູຮານເພິ່ນວ່າ: ຮ່າເຂົ້າບ້ານກິນເປັນກິນໄກ່, ກິນງົວກິນຄວາຍລາມໄປຮອດກິນຄົນຈົນໄດ້ຍ້າຍບ້ານ.
ແນວໃດກໍຕາມ, ເຖິງວ່າພະຍາດນີ້ເປັນເພັດຊະຄາດຂ້າຄົນ, ແຕ່ພວກເຮົາກໍສາມາດປ້ອງກັນເອົາໃຜເອົາມັນໄດ້ກວ່າມັນຈະມາເຖິງຕົວເຮົາ ເປັນຕົ້ນພາກັນຮັກສາຄວາມສະອາດຕົນໂຕ, ບ້ານເຮືອນຢູ່ເລື້ອຍໆ, ຊອກກິນອາຫານສົດປອດສານພິດ, ຢູ່ກິນຖືກໂມງຖືກເວລາ, ເຖິງຍາມນອນຕ້ອງນອນ, ເຖິງຍາມກິນກໍຕ້ອງກິນ, ເຖິງຍາມເມົາຈຶ່ງເມົາ, ລະເວັ້ນອະບາຍຍະມຸກທັງປວງ, ຢູ່ໃນສິນກິນໃນທຳ, ບໍ່ໄປອິດສາບັງບຽດຜູ້ອື່ນໃຫ້ເຂົາເປັນທຸກ. ຊາໃຈທິດກໍ່າ ຢາກໃຫ້ພະຍາດໂຄໂຣນາໄປເຂົ້າພວກສໍ້ລາດບັງຫລວງໃຫ້ໝົດໄປໃນສັງຄົມບ້ານເມືອງ ເພາະພວກນີ້ເປັນພະຍາດກົດໜ່ວງຄວາມຈະເລີນຂອງຊາດບ້ານເມືອງ. ຖ້າໂຈນ 500 ພວກນີ້ໝົດໄປຈາກບ້ານເມືອງ ເງິນຄຳ, ຊັບສິນທີ່ເກັບຫາມາໄດ້ທຸກກີບທຸກອັດຄົງໄດ້ມາຊ່ວຍສ້າງສາບ້ານເມືອງ ຖະໜົນຫົນທາງໄດ້ຫລາຍເຕີບ.
ເຖິງຢ່າງໃດກໍດີ, ທິດກໍ່າກໍຍັງໝັ້ນໃຈວ່າ: ພະຍາດໂຄໂຣນາຈະບໍ່ເກີດຢູ່ບ້ານເຮົາ ເພາະອີງຕາມຄວາມເຊື່ອໃນພຸດທະທຳນາຍວ່າ: ຄົນລາວຖືສາສະໜາພຸດເປັນສ່ວນຫລາຍ, ປະເທດລາວມີພົນລະເມືອງໜ້ອຍ, ປະເທດລາວຍັງມີທຳມະຊາດ, ພູຜາປ່າໄມ້ຫລາຍ, ມີເຈົ້າຖິ່ນເຈົ້າຖານ, ເທວະບຸດເທວະດາ, ສິ່ງສັກສິດຄຸ້ມຄອງຄອຍປົກປັກຮັກສາປະເທດລ້ານຊ້າງທີ່ຍັງເຫລືອໃຫ້ຈະເລີນຮຸ່ງເຮືອງຕໍ່ໄປພາຍໜ້າ.
