ທີມນັກກີລາກອງທັບ ມີຄວາມພ້ອມເຕັມຮ້ອຍກຽມເຂົ້າຮ່ວມການແຂ່ງຂັນງານມະຫະກຳກິລາແຫ່ງຊາດ (ຊຽງຂວາງເກມ ຄັ້ງທີ XI)

ງານມະຫະກໍາກີລາແຫ່ງ ຊາດຈະເລີ່ມເປີດການແຂ່ງຂັນ ຂຶ້ນໃນວັນທີ 22 ມີນາ – 1 ເມສານີ້ ຢູ່ທີ່ແຂວງຊຽງຂວາງ, ການກະກຽມສົ່ງນັກກີລາຂອງກອງທັບເຂົ້າຮ່ວມແຂ່ງຂັນໃນຊຸດນີ້ກໍຄື ຄັ້ງທີ່ຜ່ານມາ ຍ້ອນຄວາມເອົາໃຈ   ໃສ່ເປັນຫ່ວງເປັນໃຍຖືເປັນສໍາຄັນຂອງຄະນະນໍາກະຊວງປ້ອງກັນປະເທດ   ເລີ່ມເຝິກຊ້ອມນັກກີລາແມ່ນໄດ້ເຄື່ອນໄຫວ ແຕ່ເດືອນຕຸລາ 2019 ເປັນຕົ້ນມາ ຈົນເຖິງປັດຈຸບັນນີ້.

ສະຫາຍ ພົນຈັດຕະວາ ພັນແສງ ບຸນພັນ ຫົວໜ້າກົມອົບຮົມກົມໃຫຍ່ເສນາທິການກອງທັບ ທັງເປັນຄະນະຊີ້ນຳຮັບຜິດຊອບ ວຽກງານລະດົມທຶນຂອງກະຊວງປ້ອງກັນປະເທດໄດ້ໃຫ້ຮູ້ວ່າ: ກອງທັບໄດ້ສົ່ງນັກກີລາແຂ່ງຂັນຊີງໄຊທັງໝົດ 15 ປະເພດກີລາ ແລະ ແມ່ນເລີ່ມເຂົ້າສູນ ເຝິກຊ້ອມແຕ່ເດືອນກຸມພາ ຫາວັນທີ 10 ມີນານີ້ ເຊິ່ງໄລຍະນີ້ແມ່ນຈັດຕັ້ງເຝິກຊ້ອມເຂົ້າສູນລວມທັງໝົດທຸກໆປະເພດກີລາທີ່ກອງກີລາກອງທັບ,

ສ່ວນສະໜາມເຝິກຊ້ອມແມ່ນ ຢູ່ໃນກອງກີລາກອງທັບ, ສໍາລັບນັກກີລາກອງທັບຈະກຽມ ອອກເດີນທາງໃນລະຫວ່າງວັນທີ 15 ມີນາ ເພື່ອຈະເລີ່ມລົງແຂ່ງຂັນໃນວັນທີ 18 ມີນານີ້     ມີນັກກີລາ ແລະ ຄູເຝິກທັງໝົດ 224 ຄົນ, ຍິງ 78 ຄົນ

ທີມນັກກີລາກອງທັບໄດ້ຕັ້ງເປົ້າໝາຍໃຫ້ໄດ້ຫຼຽນຄຳຫຼາຍກວ່າໝູ່ແມ່ນ   ກີລາແລ່ນ-ລານ ຊາຍ-ຍິງ 7 ຫຼຽນ, ຍິງປືນຍາວກີລາສາກົນອັດລົມ ຊາຍ-ຍິງ 6 ຫຼຽນ, ຍິງປືນສັ້ນອັດລົມຊາຍ-ຍິງ 6 ຫຼຽນ. ນອກນັ້ນຍັງມີຟ້ອນປະເພດຕ່າງໆອີກ 25 ລາຍ ການ,

ເຊິ່ງມາຮອດປັດຈຸບັນ ຄວາມພ້ອມຂອງນັກກີລາກອງທັບທີ່ຈະສົ່ງເຂົ້າຮ່ວມງານກີລາແຫ່ງຊາດຄັ້ງນີ້ ສາມາດຕີລາຄາໄດ້ປະມານ 75-80% ແຕ່ນີ້ຮອດມື້ແຂ່ງຂັນຈະສູ້ຊົນໃຫ້ໄດ້ຕາມຄາດໝາຍວາງໄວ້ໃນນີ້ຄາດວ່າຈະສູ້ຊົນໃຫ້ໄດ້ຫຼຽນຄໍາ 55 ຫຼຽນ, ເງິນ 47 ຫຼຽນ, ທອງ 42 ຫຼຽນ ລວມທັງໝົດ 144 ຫຼຽນ.