ລາວກຳລັງພິຈາລະນາ ໂຈະຖ້ຽວບິນໄປ ສ. ເກົາຫລີ ຊົ່ວຄາວຍ້ອນການລະບາດຂອງ COVID-19

    ທາງການລາວຍັງຫາລືໃນການໂຈະຖ້ຽວບິນເດີນທາງລະຫວ່າງ ສປປ ລາວ ແລະ ສ. ເກົາຫລີ ເປັນການຊົ່ວຄາວ ເພື່ອສະກັດກັ້ນການລະບາດຂອງພະຍາດ COVID-19 ເພາະປັດຈຸບັນ ສ. ເກົາຫລີ ມີອັດຕາຜູ້ຕິດເຊື້ອຫລາຍຮອງຈາກຈີນ, ໄລ່ມາຮອດມື້ນີ້ ມີຜູ້ຕິດເຊື້ອ 1.146 ເພີ່ມຂຶ້ນ 253 ຄົນ, ເສຍຊິວິດແລ້ວ 10 ຄົນ.

    ໃນວັນທີ 26 ກຸມພາ ນີ້, ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ອອກມາຢືນຢັນວ່າ: ສຳລັບຂ່າວລືກ່ຽວກັບການໂຈະຖ້ຽວບິນຊົ່ວຄາວ ເດີນທາງລະຫວ່າງ ສປປ ລາວ ແລະ ສ. ເກົາຫລີ ນັ້ນ, ຮອດປັດຈຸບັນ ຍັງບໍ່ເຫັນມີແຈ້ງການຈາກລັດວິສາຫະກິດການບິນລາວເທື່ອ, ເຖິງຢ່າງໃດກໍຕາມ ທາງກະຊວງສາທາກໍໄດ້ກະກຽມຂໍ້ມູນເພື່ອລາຍງານໃຫ້ຄະນະສະເພາະກິດໃນການພິຈາລະນາຕໍ່ກໍລະນີດັ່ງກ່າວ ແລະ ອາດຈະມີຂຶ້ນໃນມໍ່ໆ

    ເພື່ອສະກັດກັ້ນພະຍາດ COVID-19, ລັດວິສາຫະກິດການບິນລາວ ໄດ້ຍົກເລີກຖ້ຽວບິນ ໄປຫາປະເທດທີ່ມີການລະບາດຄື: ສປ. ຈີນ, ໂດຍການບິນລາວ ໄດ້ອອກແຈ້ງການເປັນທາງການແລ້ວຄື: ຍົກເລີກຖ້ຽວບິນຊົ່ວຄາວ ຫຼາຍສາຍ ຈາກ ນະຄອນຫຼວງວຽງຈັນ ໄປ ຫາ ສປ ຈີນ ປະກອບມີ 3 ເສັ້ນທາງຄື: ວຽງຈັນ-ຊາງໂຈ (Vientiane-Changzhou) ເລີ່ມຕັ້ງແຕ່ວັນທີ 8 ກຸມພາ 2020, ວຽງຈັນ – ຫາງໂຈ ເລີ່ມວັນທີ 5 ກຸມພາ 2020 ແລະ ວຽງຈັນ – ຊຽງໄຮ ຍົກເລີກ ຕັ້ງແຕ່ວັນທີ 29 ມັງກອນ ເປັນຕົ້ນມາ. ສ່ວນເສັ້ນທາງ ວຽງຈັນ-ຄຸນໝິງ ແລະ ກວາງໂຈ ແມ່ນຍັງ ເປີດໃຫ້ບໍລິການຕາມປົກກະຕິ.