WHO ເປັນຫ່ວງສະຖານະການ 3 ປະເທດຈຳນວນຜູ້ຕິດເຊື້ອ “ໂຄວິດ-19” ເພີ່ມຂຶ້ນ
ອົງການອະນາໄມໂລກສະແດງຄວາມເປັນຫ່ວງສະຖານະການການແຜ່ລະບາດໂຄວິດ-19 ຢູ່ “ອິຕາລີ, ອີຣານ ແລະ ສ.ເກົາຫລີ” ພົບຜູ້ຕິດເຊື້ອເພີ່ມຂຶ້ນ.
ທ່ານ ທີໂດຣສ ອັດຮານອມ ກີບຣີເຍຊຸສ ຜູ້ອຳນວຍການໃຫຍ່ອົງການອະນາໄມໂລກ (WHO) ຖະແຫລງວ່າ: ທຸກປະເທດຈະຕ້ອງກຽມພ້ອມຫລາຍຂຶ້ນ ເພື່ອຮັບມືການແຜ່ລະບາດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19). ຂະນະຍັງເຊື່ອວ່າ: ໄວຣັສໂຄໂຣນາສາຍພັນໃໝ່ສາມາດຄວບຄຸມໄດ້ ແລະ ມີຫລາຍປະເທດເຮັດໄດ້, ຂະນະທີ່ສະຖານະການຢູ່ 3 ປະເທດຍັງໜ້າເປັນຫ່ວງ.
ອິຕາລີ ມີຜູ້ເສຍຊີວິດ 6 ຄົນ ແລະ ຕິດເຊື້ອ 230 ຄົນ ຫລາຍທີ່ສຸດໃນເອີຣົບ ຫລັງພົບການຕິດເຊື້ອແບບກຸ່ມກ້ອນ 2 ກຸ່ມ ໃນແຄວ້ນລອມບາຣດີ ຈຳນວນ 177 ຄົນ ກັບເວເນໂຕ ຈຳນວນ 33 ຄົນ ທາງພາກເໜືອ, ຕໍ່ມາພົບເພີ່ມໃນແຄວ້ນເພື່ອນບ້ານເອມເລຍ-ໂຣມັນຢາ ແລະ ປິເຍມອນເຕ ໂດຍມີຜູ້ປ່ວຍມີອາການ 101 ຄົນໃນໂຮງໝໍອີກ 27 ຄົນຢູ່ໃນການເບິ່ງແຍງໃກ້ຊິດ ແລະ ຢ່າງໜ້ອຍ 94 ຄົນໃຫ້ກັກຕົວຢູ່ໃນເຮືອນ, ທາງການປິດເມືອງ 10 ແຫ່ງ, ແຍກກັກກວ່າ 5 ໝື່ນຄົນ, ໂຮງຮຽນ, ພິພິທະພັນ ແລະ ມະຫາວິທະຍາໄລປິດເຮັດວຽກ.
ອີຣານ ທາງກະຊວງສາທາລະນະສຸກ ຢືນຢັນມີຜູ້ເສຍຊີວິດ 14 ຄົນ, ຕິດເຊື້ອ 61 ຄົນ, ແຕ່ຕົວເລກຈາກສ່ວນກາງ ຂັດກັບທີ່ ສະມາຊິກລັດຖະສະພາອີຣານຜູ້ແທນເມືອງກອມ ລະບຸວ່າ: ມີຜູ້ເສຍຊີວິດສູງເຖິງ 50 ຄົນ ໃນເມືອງສັດສິດທີ່ຢູ່ຫ່າງຈາກນະຄອນຫລວງເຕຮາລານໄປທາງໃຕ້ 120 ກິໂລແມັດ ແລະ ມີ 250 ຄົນຖືກແຍກກັກບໍລິເວນເບິ່ງອາການ.
ທັງນີ້ ເກືອບທຸກປະເທດອ້ອມອີຣານ ປະກາດປິດຊາຍແດນ ຫລື ຈຳກັດການເດີນທາງ ໂດຍໃນວັນທີ 24 ກຸມພາ ມີຫລາຍປະເທດທີ່ຢືນຢັນພົບຜູ້ຕິດເຊື້ອຄົນທຳອິດ ໂດຍສະເພາະໃນເຂດຕາເວັນອອກກາງເຊັ່ນ: ກູເວດ, ໂອມານ, ບາເຣນ ກັບອັບການິດສະຖານ ໂດຍທັງໝົດກ່ຽວຂ້ອງກັບຄົນທີ່ໄປອີຣານກັບມາ.
ສ.ເກົາຫລີ ມີຜູ້ເສຍຊີວິດ 8 ຄົນ, ສ່ວນຕິດເຊື້ອທີ່ປະກາດຫລັງສຸດໃນເວລາ 16:00 ໂມງ ວັນທີ 24 ກຸມພາ ມີ 893 ຄົນ ຈຳນວນນີ້ມີທະຫານລວມຢູ່ນຳ 13 ຄົນ, ກະຊວງປ້ອງກັນປະເທດສັ່ງໃຫ້ທະຫານ 7.500 ຄົນກັກຕົວເບິ່ງອາການ.
