ເຄລີກ ເລື່ອນເປີດລະດູການແບບບໍ່ມີກຳໜົດ ຫຼັງຈາກໄວຣັສ COVID-19 ຍັງລະບາດໜັກທີ່ ສ.ເກົາຫຼີ
ສ.ເກົາຫຼີ ກຳລັງປະເຊີນກັບການລະບາດຂອງເຊື້ອໄວຣັສ COVID-19 ເພີ່ມຂື້ນເປັນຈຳນວນຫຼາຍ ແລະ ມີຜູ້ເສຍຊີວິດໄປແລ້ວ 7 ຄົນ, ເຮັດໃຫ້ທາງການ ສ.ເກົາຫຼີ ຕ້ອງເຂັ້ມງວດໃນການຮັບມືກັບໄວຣັສດັ່ງກ່າວ. ໂດຍໜື່ງໃນມາດຕະການປ້ອງກັນຄື ການປິດສະຖານທີ່ສຳຄັນ ແລະ ຫ້າມປະຊາຊົນລວມຕົວກັນເຮັດກິດຈະກຳຈຳນວນຫຼາຍເພື່ອຄວບຄຸມບໍ່ໃຫ້ໄວຣັສລະບາດ.
ຫຼ້າສຸດ ເຄລີກ ລີກບານເຕະສູງສຸດຂອງ ສ.ເກົາຫຼີ ໄດ້ມີການປະຊຸມສຸກເສີນ ທີ່ນະຄອນຫຼວງເຊອູນ ເພື່ອຫາມາດຕະການປ້ອງກັນ ແລະ ຄວບຄຸມການລະບາດຂອງໄວຣັສ COVID-19, ກ່ອນທີ່ຈະເຫັນດີໃຫ້ເລື່ອນເປີດລະດູການບານເຕະ 2020 ອອກໄປແບບບໍ່ມີກຳໜົດ, ເພື່ອສະກັດກັ້ນການແຜ່ລະບາດຂອງເຊື້ອໄວຣັສດັ່ງກ່າວ , ສ່ວນວ່າສະໂມສອນທີ່ຈະຕ້ອງໄປແຂ່ງຂັນລາຍການ AFC champions league 2020 ທາງສະຫະພັນບານເຕະອາຊີ ຫຼື AFC ຈະຕັດສິນໃຈເລື່ອງນີ້ ໂດຍຄາດວ່າອາດຈະດຳເນີນການແຂ່ງຂັນຕາມໂປຼແກມການແຂ່ງຂັນເເບບເກົ່າທີ່ ສ.ເກົາຫຼີ, ແຕ່ຈະແຂ່ງຂັນແບບປິດ ໂດຍຫ້າມບໍ່ໃຫ້ແຟນບານເຂົ້າຊົມ
ເຖີງຢ່າງໃດກໍຕາມ ເຄລີກ ບໍ່ແມ່ນລີກທຳອິດໃນທະວີບອາຊີທີ່ປະກາດເລື່ອນເປີດລະດູການແບບບໍ່ມີກຳໜົດ ເພາະວ່າກ່ອນໜ້ານັ້ນ ໄຊນິດ ຊຸບເປີ້ລີກ (ລີກບານເຕະສູງສຸດຂອງຈີນ) ກໍ່ໄດ້ປະກາດເລື່ອນການແຂ່ງຂັນລະດູການ 2020 ອອກໄປເປັນທີ່ຮຽບຮ້ອຍແລ້ວ ຫຼັງຈາກທີ່ຈີນມີການລະບາດຂອງໄວຣັສ COVID-19 ຫຼາຍທີ່ສຸດໃນໂລກ.
