ສະຫຼຸບຜົນການປະຕິບັດວຽກງານຄຸ້ມຄອງອຸທິຍານແຫ່ງຊາດ ນໍ້າແອດ-ພູເລີຍ

ກອງປະຊຸມສະຫຼຸບຜົນວຽກງານຄຸ້ມຄອງອຸທິຍານແຫ່ງຊາດ ນໍ້າແອດ-ພູເລີຍ ໄດ້ຈັດຂຶ້ນໃນວັນທີ 19-20 ກຸມພານີ້  ຢູ່ເມືອງຮ້ຽມ ແຂວງຫົວພັນ, ໂດຍການເປັນປະທານຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ-ປ່າໄມ້ ແລະ ​ທ່ານ ພັນທອງ ເພັດໄຊສົມພັນ ຮອງເຈົ້າແຂວງຫົວພັນ, ຜູ້ຊີ້ນຳຂົງເຂດວຽກງານເສດຖະກິດ-ສັງຄົມ, ມີຜູ້ຕາງໜ້າເມືອງພູກູດ  ແຂວງຊຽງຂວາງ, ເມືອງຫົວເມືອງ, ຊຳເໜືອ, ເມືອງຊ່ອນ, ເມືອງຮ້ຽມ ແລະ ເມືອງແອດ ແຂວງ ຫົວພັນ ແລະ ເມືອງປາກແຊງ, ໂພນທອງ ແລະ ເມືອງໂພນໄຊ ແຂວງຫຼວງພະບາງ ເຂົ້າຮ່ວມ. ເພື່ອຕີລາຄາຜົນການປະຕິບັດວຽກງານຄຸ້ມຄອງອຸທິຍານແຫ່ງຊາດດັ່ງກ່າວ ໂດຍສະເພາະທົບທວນຄືນການດໍາເນີນກິດຈະກໍາຕ່າງໆ​ເຊັ່ນ: ວຽກງານບັງຄັບໃຊ້ກົດໝາຍ, ການທ່ອງທ່ຽວ, ການປັບປຸງຊີວິດການເປັນຢູ່ຂອງປະຊາຊົນໃນເຂດນັ້ນ ແລະ ວຽກງານອື່ນໆໃຫ້ມີຄວາມສອດຄ່ອງ.

ຫົວໜ້າກອງຄຸ້ມຄອງອຸທິຍານແຫ່ງຊາດດັ່ງກ່າວ ໃຫ້ຮູ້ວ່າ: ອຸທິຍານແຫ່ງຊາດນີ້ຕັ້ງຢູ່ພາກຕາເວັນອອກຂອງປະເທດລາວ, ມີເນື້ອທີ່ 410.720 ເຮັກຕາ ກວມເອົາ 10 ເມືອງ ໃນ 3 ແຂວງ ຄື: ຫົວພັນ, ຊຽງຂວາງ ແລະ ແຂວງຫຼວງພະບາງ, ມີບ້ານຢູ່ໃນ ແລະ ອ້ອມຂ້າງອຸທິຍານ 107 ບ້ານ, ມີປະຊາກອນປະມານ 53.971 ຄົນ. ຜ່ານມາຄະນະຄຸ້ມຄອງກໍໄດ້ເອົາໃຈໃສ່ປະຕິບັດວຽກງານຂອງຕົນຢ່າງຫ້າວຫັນ ໂດຍມີທີມລາດຕະເວນ 3 ປະເພດ, ທີມລາດຕະເວນເຄື່ອນທີ່ ແລະ ທີມກວດກາຕາມເສັ້ນທາງ ແລະ ຈຸດຫຼໍ່ແຫຼມ, ພົບໄພຂົ່ມຂູ່ທັງໝົດ 675 ກໍລະນີ, ໃນນັ້ນ ມີ 386 ກໍລະນີແມ່ນກ່ຽວກັບການລ່າສັດປ່າ ແລະ ສາມາດດຳເນີນຄະດີທັງໝົດ 180 ກໍລະນີ, ແກ້ໄຂແລ້ວ 84 ກໍລະນີ.

ຜູ້ລາຍງານໃຫ້ຮູ້ວ່າ: ແຕ່ເຖິງຢ່າງໃດໃນຕໍ່ໜ້ານີ້ຈະຕ້ອງໄດ້ສືບຕໍ່ສ້າງແຜນຄຸ້ມຄອງຕື່ມອີກໃຫ້ສຳເລັດ ແລະ ສືບຕໍ່ປັບປຸງຂອດປະສານງານກັບພາກສ່ວນກ່ຽວຂ້ອງ, ພັດທະນາຄວາມຮູ້ຄວາມສາມາດດ້ານການຄຸ້ມຄອງອຸທິຍານ, ວາງແຜນການນຳໃຊ້ທີ່ດິນໃຫ້ບ້ານເປົ້າໝາຍ ແນໃສ່ປັບປຸງຊີວິດການເປັນຢູ່ສົ່ງເສີມການອະນຸລັກ, ສ້າງແຜນດຳເນີນງານໃຫ້ຊຸມຊົນ ແລະ ສ້າງສັນຍາອະນຸລັກໃຫ້ແກ່ 43 ບ້ານ, ສືບຕໍ່ສົ່ງເສີມວຽກງານການທ່ອງທ່ຽວແບບອະນຸລັກໃຫ້ 26 ບ້ານ, ສົ່ງເສີມທຸລະກິດປູກກາເຟໃຫ້ 5 ບ້ານເປົ້າໝາຍ, ສົ່ງເສີມການພັດທະນາການນຳໃຊ້ເຄື່ອງປ່າຂອງດົງ ແລະ ວຽກຫັດຖະກຳໃຫ້ແກ່ 5 ບ້ານເປົ້າໝາຍ (ກຸ່ມຊ່ອນເໜືອ); ສືບຕໍ່ແກ້ໄຂຄະດີໃຫ້ມີຜົນສຳເລັດ, ກຳນົດມາດຕະການບັງຄັບໃຊ້ກົດໝາຍຢ່າງມີຍຸດທະສາດ, ແກ້ໄຂບັນຫາເສັ້ນທາງຜາຖີ່, ປັບປຸງການລາດຕະເວນໃຫ້ມີປະສິດທິພາບ ແລະ ອື່ນໆ.