ສ.ສີຂຽວ ເວົ້າແລ້ວຕ້ອງເຮັດ
ລູກເມືອງພວນ
ສະບາຍດີ ເພື່ອນຜູ້ອ່ານທີ່ຮັກແພງ, ສ.ສີຂຽວ ມີຄວາມສຳຄັນຫຼາຍໃນການເຮັດໃຫ້ຕົວເມືອງມີທັດສະນີຍະພາບທີ່ງົດງາມ, ມີອາກາດທີ່ສົດຊື່ນແຈ່ມໃສໃນຕົວເມືອງ. ດັ່ງຫຼາຍປະເທດເພື່ອນບ້ານອ້ອມຂ້າງເຮົາເຊັ່ນ: ນະຄອນຫຼວງຮ່າໂນ້ຍ, ສິງກະໂປ, ບາງກອກ, ປັກກິ່ງ. ລຽບຕາມແຄມທາງແຕ່ລະເສັ້ນແຕ່ລະສາຍລ້ວນແຕ່ມີຕົ້ນໄມ້ນ້ອຍໃຫຍ່ສີຂຽວປົກຄຸມໃຫ້ຮົ່ມເຢັນ, ມີອາກາດສົດຊື່ນ ທັງຍັງເປັນການກັ່ນກອງຝຸ່ນລະອອງໄດ້ດີອີກດ້ວຍ.
ຕາມທີ່ເຄີຍສຳຜັດມາ ຢູ່ຫວຽດນາມເມື່ອເພິ່ນມີການກໍ່ສ້າງຖະໜົນຫົນທາງແຕ່ລະເສັ້ນ ເພິ່ນຈະມີແຜນການປູກຕົ້ນໄມ້ລຽບສອງຝາກທາງໄປພ້ອມ ເຊິ່ງຕົ້ນໄມ້ສ່ວນໃຫຍ່ທີ່ນຳມາປູກຈະເປັນຕົ້ນໄມ້ປະເພດໃຫ້ໃບໃຫ້ຄວາມຮົ່ມເຢັນ ແລະ ໃຫ້ດອກຫຼາຍສີ ແລະ ຢູ່ສິງກະໂປ ນອກຈາກປູກຕົ້ນໄມ້ລຽບຕາມສອງຟາກທາງແລ້ວ ເພິ່ນຍັງໃຫ້ມີສວນປ່າໃນຕົວເມືອງ, ສວນສາທາລະນະທີ່ເຕັມໄປດ້ວຍຕົ້ນໄມ້ນາໆຊະນິດໃຫ້ຮົ່ມເຢັນ, ມີສວນດອກໄມ້ທີ່ງົດງາມ. ນອກຈາກທີ່ຈະປະດັບເອ້ໃຫ້ຕົວເມືອງສວຍງາມແລ້ວ ມັນຍັງກາຍເປັນໃບປອດສີຂຽວຂອງຕົວເມືອງອີກດ້ວຍ. ນີ້ຄືການພັດທະນາເສດຖະກິດ-ສັງຄົມຕາມທິດຍືນຍົງ ແລະ ສີຂຽວຢ່າງແທ້ຈິງ.
ສຳລັບຢູ່ ສປປ ລາວຂອງພວກເຮົາ ໂດຍສະເພາະແມ່ນຢູ່ນະຄອນຫຼວງວຽງຈັນ ກໍໄດ້ມີຂໍ້ຕົກລົງຂອງເຈົ້າຄອງນະຄອນຫຼວງວ່າ: ສ້າງນະຄອນຫຼວງວຽງຈັນໄປຕາມທິດ 6.ສ ຄື: ສ.ສະຫງົບ, ສ.ສະອາດ, ສ.ສີຂຽວ, ສ.ສະເໜ່, ສ.ສະຫວ່າງ ແລະ ສ.ສີວິໄລ ແລະ ໜຶ່ງໃນນັ້ນກໍແມ່ນ ສ.ສີຂຽວ ແມ່ນໝາຍວ່າ: ການພັດທະນານະຄອນຫຼວງເຮົາຕ້ອງໄດ້ກຳນົດສະຖານທີ່ສີຂຽວຕິດພັນກັບການຮັກສາສິ່ງແວດລ້ອມປ່າໄມ້ທຳມະຊາດ, ຕົ້ນໄມ້ແຄມທາງ, ເດີ່ນຫຍ້າ, ສວນສາທາລະນະ, ຕົ້ນໄມ້ໃຫ້ໝາກ, ເຄຫາສະຖານສີຂຽວ ເພື່ອຄວາມຮົ່ມເຢັນ ແລະ ຫຼຸດຜ່ອນມົນລະພິດທາງອາກາດ.
ແຕ່ໃນຕົວຈິງ ພວກເຮົາບໍ່ທັນເຮັດໄດ້ດີເທົ່າທີ່ຄວນ ອັນເນື່ອງມາຈາກຫຼາຍສາເຫດ, ແຕ່ຫຼັກໆກໍອາດຈະແມ່ນຂາດງົບປະມານ ຫຼື ການວາງແຜນຜັງຂອງຕົວເມືອງນັ້ນເອງ, ຍິ່ງຮ້າຍແຮງໄປກວ່ານັ້ນ ບາງບ່ອນມີຕົ້ນໄມ້ສີຂຽວທີ່ງົດງາມແລ້ວ ແຕ່ຖືກຕັດອອກໄປ ໂດຍບໍ່ມີການປູກທົດແທນ, ມີຫຼາຍເສັ້ນທາງໃນເຂດເມືອງເກົ່າໄດ້ກາຍເປັນເມືອງຫົວໂຫຼ້ນ, ເປັນຖະໜົນທີ່ເປີດແປນ. ບັນດາເສັ້ນທາງທີ່ສ້າງໃໝ່ກໍໜ້ອຍໜັກທີ່ຈະເຫັນມີການປູກຕົ້ນໄມ້ໃສ່ສອງຟາກທາງ ດັ່ງເສັ້ນທາງ 450 ປີ, ເສັ້ນທາງເບຕົງຕານມີໄຊຕັດອອກສາມແຍກສີເກີດ ເຊິ່ງວມດຳເນີນການກໍ່ສ້າງຢູ່ໃນປັດຈຸບັນ ກໍບໍ່ຮູ້ວ່າເພິ່ນມີແຜນປູກໄມ້ບໍ່ ເພື່ອ ສ.ສີຂຽວ ແລະ ສວນສາທາລະນະຕ່າງໆກໍຄວນຄຳນຶງເຖິງບັນຫານີ້ ເພື່ອເມືອງຫຼວງເຮົາຈະສົດໃສ ແລະ ເປັນຕາໜ້າຢູ່ໜ້າຊົມກວ່ານີ້. ການກໍ່ສ້າງຖະໜົນຫົນທາງ ບໍ່ວ່າແຕ່ຢູ່ໃສເມືອງ ແລະ ນອກເມືອງ ຄວນປູກຕົ້ນໄມ້ໃສ່ຕາມສອງຟາກທາງ ເພື່ອສະພາບແວດລ້ອມທີ່ດີ, ສອງຟາກເສັ້ນທາງດ່ວນຈາກນະຄອນຫຼວງວຽງຈັນຫາວັງວຽງທີ່ຈະເກີດຂຶ້ນໃນໄວໆນີ້ກໍຄວນຄຳນຶງເຖິງການປູກດອກໄມ້ໃຫ້ງົດງາມ, ສ້າງນະຄອນຫຼວງ ກໍຄືປະເທດເຮົາຕາມທິດຍືນຍົງ ແລະ ສີຂຽວໃຫ້ເປັນຈິງ.
