ສາທາວາງແຜນພັດທະນາຢາພື້ນເມືອງ ໃຫ້ມີຄຸນນະພາບສູງຂຶ້ນ

ໃນໂອກາດ, ເຂົ້າຮ່ວມກອງປະຊຸມຖອດຖອນບົດຮຽນວຽກງານຢາພື້ນເມືອງ, ທ່ານນາງ ຫົງບານ ໃນວົງສຸທິ ຫົວໜ້າພະແນກຄຸ້ມຄອງຢາພື້ນເມືອງ ແລະ ຜະລິດຕະພັນເສີມສຸຂະພາບ ກະຊວງສາທາລະນະສຸກ ໃຫ້ຮູ້ວ່າ: ປັດຈຸບັນການນຳໃຊ້ຢາພຶ້ນເມືອງ ເຂົ້າໃນການປິ່ນປົວສຸຂະພາບໃນສັງຄົມ ກຳລັງມີບົດບາດ ແລະ ແຜ່ຫລາຍ, ພາຍຫລັງທີ່ສັງຄົມເລີ່ມໃຫ້ຄວາມສົນຫັນມາປິ່ນປົວພະຍາດ ດ້ວຍຢາພື້ນເມືອງສົມທົບກັບຢາຫລວງຫລາຍຂື້ນ, ເຮັດໃຫ້ການຮັກສານະພາບມີປະສິດທິພາບດີຂຶ້ນ

ຫົວໜ້າພະແນກດັ່ງກ່າວຢືນຢັນວ່າ: ຢາພື້ນເມືອງລາວ ມີການຄົ້ນຄ້ວາ ແລະ ນຳໃຊ້ຮັກສາປິ່ນປົວພະຍາດມາແຕ່ດົນນານ, ຍ້ອນ ສປປ ລາວ ມີຊັບພະຍາກອນທຳມະຊາດ ແລະ ພຶດຫລາຍຊະນິດ ເຮັດໃຫ້ການນຳມາຜະລິດເປັນຢາພື້ນເມືອງປິ່ນປົວພະຍາດໄດ້ຫລາກຫລາຍ, ແຕ່ຄຽງຄູ່ກັນນັ້ນເຫັນວ່າ: ໃນປັດຈຸບັນ ການຊຸກຍູ້ສົ່ງເສີມຄົ້ນຄ້ວາ ແລະ ປຸງແຕ່ງຢາພື້ນເມືອງຍັງມີໜ້ອຍ, ໂດຍສະເພາະຂະແຫນງການຢາ ຍັງບໍ່ມີການຄົ້ນຄ້ວາທີ່ແຂງແຮງ ຊຶ່ງບາງຊະນິດຢາກໍເກືອບຈະສູນພັນໄປ.

       ທ່ານນາງ ສຸນາລີ ເທມີ ຮອງຫົວໜ້າສູນປິ່ນປົວດ້ວຍການແພດພື້ນເມືອງ, ສະຖາບັນການແພດການຢາ ພື້ນເມືອງ ໃຫ້ຮູ້ວ່າ:    ປັດຈຸບັນ ຢູ່ນະຄອນຫຼວງວຽງຈັນມີສວນຢາພື້ນເມືອງຢູ່ 2 ແຫ່ງຄື: ຢູ່ເມືອງສັງທອງ  ແຫ່ງ ແລະ ເມືອງໄຊທານີ, ຈຸດບໍລິການປິ່ນປົວດ້ວຍຢາພື້ນເມືອງມີຢູ່ 83 ແຫ່ງ ແລະ ຈຸດບໍລິການ ຮົມຢາພື້ນເມືອງມີ 26 ແຫ່ງ, ຂະນະທີ່ໃນອານາຄົດຍັງຈະວາງແຜນຂະຫຍາຍສວນຢາພື້ນເມືອງ ອອກສູ່ຕ່າງແຂວງ ໃຫ້ຫລາຍຂື້ນ ເພື່ອເປັນການສົ່ງເສີມອະນຸລັກພັນພຶດຢາພື້ນເມືອງລາວ, ທັງເປັນບ່ອນຄົ້ນຄວ້າ, ເພື່ອຮຽນຮູ້ຄຸນປະໂຫຍດຢາພື້ນເມືອງ ເພື່ອຮັກສາປິ່ນປົວພະຍາດ, ກອງປະຊຸມຄັ້ງນີ້ ໄດ້ຈັດຂຶ້ນເປັນຄັ້ງທຳອິດໃນກຸ່ມວຽກງານການຢາພື້ນເມືອງຂອງຂະແໜງອາຫານ ແລະ ຢາ ພະແນກສາທາລະນະສຸກຈັດຂຶ້ນ, ເຊິ່ງເປັນຂິດໝາຍອັນສຳຄັນໃນວຽກງານຄຸ້ມຄອງ ແລະ ສົ່ງເສີມ ການນຳໃຊ້ຢາພື້ນເມືອງສົມທົບກັບຢາຫຼວງ ເພື່ອຮັກສາສຸຂະພາບ, ສົ່ງເສີມໃຫ້ໝໍຢາ ແລະ ຜູ້ປະກອບການດ້ານຢາພື້ນເມືອງໄດ້ເຂົ້າໃຈກັບລະບຽບການຄຸ້ມຄອງ ແລະ ດຳລັດຊັບພະຍາກອນທຳມະ ຊາດທີ່ເປັນຢາເລກທີ 115/ນຍ ໃນການຂຸດຄົ້ນຊັບພະຍາກອນທຳມະຊາດທີ່ເປັນຢາ, ທີ່ມີຄຸນຄ່າບາງຢ່າງ ຊຶ່ງໄກ້ຈະສູນພັນ, ເພື່ອເຮັດໃຫ້ເຂົາເຈົ້າໄດ້ເຂົ້າໃຈຕື່ມກ່ຽວກັບຍຸດທະສາດການພັດທະນາວຽກງານຢາພື້ນເມືອງຂອງ ສປປ ລາວ ໃຫ້ນັບມື້ເຕີບໃຫຍ່ເຂັ້ມແຂງ, ສາມາດເຊື່ອມໂຍງເຂົ້າກັບພາກພື້ນ ແລະ ສາກົນເທື່ອລະກ້າວ.