ຈີນເລັ່ງທົດລອງຢາປິ່ນປົວໄວຣັສໂຄວິດ-19 ເພີ່ມອີກ 5 ຊະນິດ
ຈີນເລັ່ງທົດລອງຢາປະເພດໃໝ່ທີ່ໃຊ້ປິ່ນປົວພະຍາດປອດອັກເສບຈາກໄວຣັສໂຄໂຣນາສາຍພັນໃໝ່ (ໂຄວິດ-19) ຈຳນວນ 5 ລາຍການ ໂດຍມີຜູ້ຊ່ຽວຊານເປັນຜູ້ທົບທວນຢາດັ່ງກ່າວຢ່າງລະມັດລະວັງ.
ສຳນັກຂ່າວຊິນຮົວລາຍງານວ່າ: ທ່ານ ເສິນ ສີເຟຍ ຮອງຜູ້ອຳນວຍການສຳນັກງານຜະລິດຕະພັນຢາແຫ່ງຊາດ ກ່າວໃນການຖະແຫລງຂ່າວວ່າ: ໄດ້ມີການອະນຸມັດໃຫ້ເລັ່ງດຳເນີນການສຶກສາທາງວິທະຍາສາດຈົນສຳເລັດຮຽບຮ້ອຍ ເພື່ອການຈຳໜ່າຍຢາປິ່ນປົວໄວຣັສໂຄວິດ-19 ໃນຕະຫລາດ ເຊິ່ງການດຳເນີນການດັ່ງກ່າວຄວບຄຸມເຖິງໂຄງການວິໄຈພິເສດທີ່ກ່ຽວກັບໂຣກໂຄວິດ-19.
ທ່ານ ເສິນ ກ່າວວ່າ: ຢາທາງເຄມີບາງລາຍການນັ້ນ ມີຄວາມປອດໄພ ແລະ ມີປະສິດທິພາບ. ຂະນະທີ່ຢາຂອງຈີນກໍໄດ້ຖືກນັບລວມໄວ້ໃນລາຍການໃບສັ່ງຢາຂອງແພດທີ່ປະຕິບັດໜ້າທີ່ໃນພື້ນທີ່ຂອງການລະບາດຂອງໄວຣັສເຊັ່ນກັນ. ໜ່ວຍງານທາງການແພດກວ່າ 80 ແຫ່ງໄດ້ໃຊ້ສະໝຸນໄພຈີນໃນການປິ່ນປົວຜູ້ປ່ວຍໄວຣັສໂຄວິດ-19 ແລະ ໄດ້ຮັບການພິສູດແລ້ວວ່າມີປະສິດທິພາບ.
ທ່ານ ເສິນ ກ່າວອີກວ່າ: ທາງສຳນັກງານໄດ້ສົ່ງຄະນະຜູ້ຊ່ຽວຊານໄປພົບທີມວິໄຈວັກແຊງ ເພື່ອໃຫ້ຄຳແນະນຳ ແລະ ສ້າງຄວາມເຊື່ອໝັ້ນວ່າຈະໄດ້ມາເຊິ່ງວັກແຊງທີ່ມີຄວາມປອດໄພ ແລະ ມີປະສິດທິພາບໃນການຈັດການກັບໂຣກໂຄວິດ-19 ໂດຍໄວທີ່ສຸດເທົ່າທີ່ຈະເປັນໄປໄດ້.
