IATA ເຕືອນຈຳນວນຜູ້ໂດຍສານທົ່ວໂລກອາດຫລຸດລົງໃນປີນີ້ຈາກຜົນກະທົບໄວຣັສໂຄວິດ-19
ສະມາຄົມຂົນສົ່ງທາງອາກາດສາກົນ (IATA) ອອກຖະແຫລງການຄາດກະວ່າ: ຈຳນວນຜູ້ໂດຍ ສານທົ່ວໂລກໃນປີນີ້ອາດຈະຫລຸດລົງເປັນຄັ້ງທຳອິດໃນຮອບ 11 ປີ ເນື່ອງຈາກຜົນກະທົບຈາກການແຜ່ລະບາດຂອງໄວຣັສໂຄໂຣນາສາຍພັນໃໝ່ (ໂຄວິດ-19) ໃນຈີນ ເຮັດໃຫ້ມີການຍົກເລີກຖ້ຽວບິນແລ້ວຫລາຍພັນຖ້ຽວບິນ.
ທັງນີ້ IATA ຄາດກະວ່າ: ຈຳນວນຜູ້ໂດຍສານທົ່ວໂລກຈະຫລຸດລົງ 0,6% ໃນປີນີ້ ເຊິ່ງເປັນການຫລຸດລົງຄັ້ງທຳອິດນັບແຕ່ວິກິດການເງິນໃນປີ 2008-2009 ໂດຍຕົວເລກຄາດກະຫລ້າສຸດນີ້ ສວນທາງກັບ IATA ໄດ້ຄາດກະໄວ້ໃນເດືອນທັນວາວ່າ: ຈຳນວນຜູ້ໂດຍສານປີ 2020 ຈະເພີ່ມຂຶ້ນ 4,1% ໂດຍໃນເວລານັ້ນ IATA ຄາດວ່າພາກພື້ນທີ່ໄດ້ຮັບຜົນກະທົບຮຸນແຮງທີ່ສຸດຄືອາຊີ-ປາຊີຟິກ ແລະ ຄາດວ່າຈະກະທົບພຽງປະເທດທີ່ມີຖ້ຽວບິນໄປຈີນເທົ່ານັ້ນ.
ນອກຈາກນີ້ IATA ຄາດກະວ່າ: ລາຍໄດ້ຂອງສາຍການບິນຈະຫລຸດລົງປະມານ 3 ໝື່ນລ້ານໂດລາສະຫະລັດ ເຊິ່ງສາຍການບິນໃນຈີນຈະໄດ້ຮັບຜົນກະທົບຮຸນແຮງທີ່ສຸດ ໂດຍປັດຈຸບັນ ສາຍການບິນຕ່າງໆໄດ້ຍົກເລີກຖ້ຽວບິນໄປຈີນ ແລະ ເຮືອບິນໃນຈີນປະມານ 80% ຖືກສັ່ງຫ້າມຂຶ້ນບິນ ເນື່ອງຈາກຄວາມກັງວົນກ່ຽວກັບຜົນກະທົບຂອງໄວຣັສໂຄວິດ-19 ເຊິ່ງມີສູນກາງການແຜ່ລະບາດຢູ່ມົນທົນຫູເປີຍ.
