ມີເມຍທັງງາມທັງເກັ່ງ ແຕ່ຜົວເອົາຫົວໃຈໃຫ້ຍິງຮ່ວມຫ້ອງການ

ຂ້ອຍກັບນາງເຮັດວຽກຢູ່ບໍລິສັດດຽວກັນ, ພວກຂ້ອຍທັງສອງລ້ວນແຕ່ມີຄອບຄົວແລ້ວ ແຕ່ພວກຂ້ອຍຕົກຫຼຸມຮັກກັນເນື່ອງໃນໂອກາດບໍລິຈັດຕັ້ງສະເຫຼີມສະຫຼອງວັນສ້າງຕັ້ງບໍລິສັດ.

ນາງເປັນຄົນທີ່ມີຮູບຮ່າງໜ້າຕາດີ ມີສະເໜ່ ດຶງດູດຝ່າຍກົງກັນຂ້າມເປັນຢ່າງຍິ່ງ. ນາງເລົ່າສູ່ຂ້ອຍຟັງວ່າ ເຂົາແຕ່ງງານໄດ້ຫຼາຍປີແລ້ວ ແຕ່ຊີວິດຄູ່ຈະບໍ່ຄ່ອຍມີຄວາມສຸກ ເພາະຜົວຂອງເຂົາມີຮັກນອກບ້ານ ບໍ່ສົນໃຈນຳວຽກຢ້າວການເຮືອນ ແລະ ຜູ້ເປັນເມຍ. ຜົວເມຍຜິດຖຽງກັນຢູ່ເປັນປະຈຳ ແລະ ມີຫຼາຍເທື່ອທີ່ຜົວຂອງເຂົາລົງຕີນລົງມືໃສ່ເມຍ. ເຂົາຈຶ່ງມີຊີວິດຢູ່ດ້ວຍຄວາມອົດກັ້ນ ແລະ ທຸກໃຈຕະຫຼອດມາ.

ໃນຂະນະດຽວກັນຄອບຄົວຂອງຂ້ອຍແມ່ນມີຄວາມສຸກ ແລະ ອົບອຸ່ນດີ. ເມຍຂອງຂ້ອຍເປັນຍິງທີ່ໜ້າຕາສວຍງາມ ແລະ ຮັກຜົວ. ແຕ່ສິ່ງທີ່ຂ້ອຍກັງວົນທີ່ສຸດກໍຄື ພວກຂ້ອຍແຕ່ງງານກັນໄດ້ 3 ປີແລ້ວ ແຕ່ບໍ່ທັນມີພະຍານຮັກນຳກັນແມ່ນແຕ່ຄົນດຽວ.

ເມື່ອຂ້ອຍຮູ້ຈັກກັບແຟນສາວໃນບໍລິສັດດຽວກັນນັ້ນ ໃນເບື້ອງຕົ້ນຂ້ອຍກໍບໍ່ໄດ້ມີຄວາມຮູ້ສຶກອັນໃດທີ່ເປັນພິເສດ ນອກຈາກວ່າເຂົາເປັນເພື່ອນຮ່ວມງານເທົ່ານັ້ນ ແຕ່ປານໃດຮູບຮ່າງໜ້າຕາ ກິລິຍາມາລະຍາດຂອງເຂົາໄດ້ເຮັດໃຫ້ຂ້ອຍເກີດຄວາມປະທັບໃຈ ແລະ ໃສ່ໃຈຕໍ່ເຂົາ ແຕ່ມື້ທຳອິດທີ່ພົບເຫັນ.

ເຖິງແມ່ນວ່າໃນເບື້ອງຕົ້ນຮູ້ຈັກກັນກໍເປັນເລື່ອງທຳມະດາ ແຕ່ອານິຈາຢູ່ດົນໄປ ຫົວໃຈຢາກບອກຮັກກັບເຂົາ ໃນທີ່ສຸດພວກຂ້ອຍທັງສອງກໍຕັດແບ່ງຫົວໃຈໃຫ້ກັນຍາມໃດບໍ່ຮູ້ເມື່ອ ແລະ ໃຫ້ຄວາມສຸກຕໍ່ກັນດ້ວຍຫົວໃຈ.

ເຖິງພວກຂ້ອຍທັງສອງຮູ້ດີຢູ່ວ່າຄວາມຮັກແບບນີ້ແມ່ນບໍ່ຖືກຕ້ອງ ເພາະຕ່າງຄົນຕ່າງກໍມີຄອບຄົວແລ້ວ. ມີຫຼາຍເທື່ອພວກຂ້ອຍຄິດຢາກຕັດສິນໃຈແຍກທາງກັນ ແຕ່ກໍເປັນໄປບໍ່ໄດ້ ຍັງກັບມາໃຫ້ຄວາມສຸກຕໍ່ກັນຢູ່ຕະຫຼອດເວລາ. ນາງໄດ້ຕັດສິນໃຈແຍກທາງກັບຜົວ ເພື່ອໃຫ້ມີຄວາມເປັນອິດສະຫຼະພາບ. ເຂົາບອກກັບຂ້ອຍວ່າ ເຂົາຕັດສິນໃຈແຍກທາງກັບຜົວສ່ວນໜຶ່ງກໍແມ່ນຍ້ອນຢາກໄດ້ຢູ່ໃກ້ສິດກັບຂ້ອຍ.

ແຕ່ຂ້ອຍຊໍ້າພັດຍັງບໍ່ທັນພ້ອມໃນເລື່ອງນີ້ ແລະ ບໍ່ທັນກ້າຕັດສິນໃຈຈະເລີກກັບເມຍ, ເຖິງແມ່ນຂ້ອຍບໍ່ເກີດອາລົມຄວາມຮູ້ສຶກກັບເມຍແລ້ວກໍຕາມ ແຕ່ເລື່ອງຢ່າຮ້າງມັນກໍບໍ່ແມ່ນເລື່ອງງ່າຍປານໃດ.

ເລື່ອງຂອງເລື່ອງ ເມຍໄດ້ຮູ້ໄດ້ເຫັນ ເປັນເລື່ອງບານປາຍ, ເມຍບອກກັບຂ້ອຍວ່າ ໃຫ້ເຈົ້າເລືອກເອົາສອງເສັ້ນທາງ: ເລືອກນາງສາວບໍລິສັດ ກັບເສັ້ນທາງ ແຍກທາງກັນ. ເວລານີ້ຂ້ອຍຄວນຕັດສິນໃຈເຮັດແນວໃດດີ?