ໂຮງຮຽນ ມ.ສ ວຽງຈັນ ຈັດງານແຂ່ງຂັນກີລາ-ສີລະປະ ແລະ ຕ້ານປະກົດການຍໍ້ທໍ້ປະຈຳປີຄັ້ງທີ່ XXI ສົກຮຽນ 2019-2020
ໃນວັນທີ່ 20 ກຸມພານີ້ທີ່ ໂຮງຮຽນ ມ.ສ ວຽງຈັນ ໄດ້ມີການເປີດງານແຂ່ງຂັນກີລາ-ສິລະປະ
ແລະ ຕ້ານປະກົດການຍໍ້ທໍ້ປະຈຳປີຄັ້ງທີ່ XXI
ສົກຮຽນ
2019-2020 ເປັນກຽດເປັນປະທານໂດຍ ທ່ານ ວຽງສຸວັນ ພະໄຊສົມບັດ ຜູ້ອຳນວຍການໂຮງຮຽນ ມ.ສ
ວຽງຈັນ ພ້ອມດ້ວຍຄູອາຈານນ້ອງໆນັກຮຽນແລະ ແຂກຜູ້ມີກຽດເຂົ້າຮ່ວມ
ໃນງານດັ່ງກ່າວນີ້ຍັງໄດ້ກ່າວເຖີງ ທ່າມກາງຄົນທັງໂລກກຳລັງວິຕົກກັງວົນກັບການແຜ່ລະບາດຂອງເຊື້ອໄວຣັສ COVID-19 ເຊີ່ງອົງການອະນາໄມໂລກໄດ້ຢັ້ງຢືນວ່າມີແຕ່ຄົນທີ່ມີສຸຂະພາບອ່ອນເພຍເທົ່ານັ້ນທີ່ມີຄວາມສ່ຽງຕໍ່ການຕິດເຊື້ອໄວຣັສດັງກ່າວ ດັ່ງນັ້ນການຫຼີ້ນກີລາ-ສີລະປະ ເປັນປັດໃຈທີ່ສຳຄັນເພື່ອເສີມສ້າງໃຫ້ຄົນເຮົາມິີສຸຂະພາບແຂງແຮງ ມີຈິດໃຈເບີກບານເຮັດໃຫ້ຮ່າງກາຍຂອງເຮົາມີພູມຄຸ້ມກັນທີ່ດີ ແລະ ສາມາດຕ້ານເຊື້ອພະຍາດໄດ້
ສຳຫຼັບງານແຂ່ງຂັນກີລາ-ສີລະປະໃນຄັ້ງນີ້ໄດ້ຮັບການເອົາໃຈໃສ່ຊີ້ນຳພາຢ່າງໃກ້ຊິດຈາກຄະນະພັກ,ຄະນະອຳນວຍການໂຮງຮຽນ
ແລະ ໄດ້ຮັບການຊ່ວຍເຫຼືອຈາກຜູ້ປົກຄອງນ້ອງນັກຮຽນ,ບໍລິສັດຫ້າງຮ້ານຕ່າງໆເປັນຜູ້ອຸປະຖຳຫຼັກໃນກິດຈະກຳງານແຂ່ງຂັນກີລາ-ສີລະປະດັ່ງກ່າວ
ພ້ອມນີ້ສຳຫຼັບການແຂ່ງຂັນມີປະຫຼາຍປະເພດກີລາທີ່ໄດ້ຈັດການແຂ່ງຂັນຄື: ກີລາບານເຕະ,ບານສົ່ງໃນຮົ່ມ,ບານສົ່ງຫາດຊາຍ,ກະຕໍ້ຫວາຍ,ບ້ານບ້ວງ,ປິ່ງປອງ,ແລນລານ,ເປຕັງ,ຕີດອກປີກໄກ່,ດຶງເຊືອກ,ເບສບອນ ແລະ ກີລາ 31 ຂາສາມັກຄີ ໃນນີ້ສຳຫຼັບກີລາ ເບສບອນ ແລະ ກີລາ 31 ຂາສາມັກຄີ ຖືວ່ານັບເປັນກີລາໃໝ່ທີ່ໄດ້ເລືອກເອົາໂຮງຮຽນ ມ.ສ ວຽງຈັນເປັນໂຮງຮຽນທຳອິດແລະແຫ່ງດຽວຂອງລາວເຮົາທີ່ໄດ້ຈັດໃຫ້ມີການຝຶກອົບຮົມ ແລະ ແຂ່ງຂັນໃນລະດັບຊາດ.
ສ່ວນການແຂ່ງຂັນປະເພດສີລະປະກອບມີ 6 ປະເພດຄື: ຟ້ອນ,ຮ້ອງເພງ,ຂັບລໍາທ້ອງຖິ່ນ,ລະຄອນ,ດົນຕຣີພື້ນເມືອງ ແລະ ເຕັ້ນເພື່ອສຸຂະພາບ
