ສາທາຮຽກຮ້ອງສັງຄົມເປັນເຈົ້າການປ້ອງກັນພະຍາດ COVID-19

   ໃນໂອກາດຖະແຫລງຂ່າວຕໍ່ສື່ມວນຊົນ ກ່ຽວກັບສະພາບການລະບາດຂອງ ໄວຣັສ ໂຄໂຣນາ ຫລື covid-19, ໃນແລງວັນທີ 17 ກຸມພາ ນີ້, ຢູ່ ກະຊວງສາທາລະນະສຸກ ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງ ສາທາລະນະສຸກ ໃຫ້ຮູ້ວ່າ: ປັດຈຸບັນ ການລະບາດຂອງພະຍາດ ໄວຣັສ ໂຄໂຣນາ, ຢູ່ ສປ ຈີນ ມີທ່າອ່ຽງເພີ່ມຂຶ້ນ, ສະນັ້ນ ເພື່ອສະກັດກັ້ນພະຍາດ ນີ້, ເຮົາຄວນປະຕິບັດມາດຕະການ 3 ສະອາດຄື: ລ້າງມືໃຫ້ສະອາດທຸກຄັ້ງ ກ່ອນຈະຮັບປະທານອາຫານ ຫລື ສຳພັດກັບຄົນເຈັບທີ່ມີກໍລະນີສົງໄສ, ຄວນກິນອາຫານທີ່ສະອາດ ແລະ ສຸກດີ, ຄວນຫລີກລ່ຽງການຮັບປະທານສັດປ່າທຸກຊະນິດ ແລະ ການທຳຄວາມສະອາດ ສະຖານທີ່ພັກອາໄສ ເນື່ອງຈາກ ປັດຈຸບັນ ມີການຄົ້ນຄ້ວາ ພະຍາດດັ່ງກ່າວອາດແຜ່ລະບາດຜ່ານທາງອາກາດ ແລະ ຄວນໃຊ້ຜ້າອັດປາກ ຢູ່ ບ່ອນທີ່ມີຄວາມສ່ຽງເປັນປະຈຳ,  ຊຶ່ງມີລາຍງານຈາກ ສປ ຈີນ ວ່າ: ປັດຈຸບັນ ພົບຜູ້ຕິດເຊື້ອພະຍາດອັກເສບປອດ ມີທັງໝົດ 70.548 ກໍລະນີ, (1.933 ກໍລະນີຕິດເຊື້ອໃໝ່ຢູ່ແຂວງ ຫູເປີ່ຍ), ມີຜູ້ເສຍຊີວິດ 1.770 ກໍລະນີ ແລະ ຜູ້ສຳພັດໃກ້ຊິດທີ່ຢູ່ໃນການຕິດຕາມເຝົ້າລະວັງຂອງແພດໝໍ 150.539 ກໍລະນີ, ສຳລັບ ສປ ລາວ ພົບກໍລະນີສົງໄສ 33 ກໍລະນີ ແລະ ບໍ່ພົບເຊື້ອພະຍາດ 31 ຕົວຢ່າງ ແລະ ຍັງລໍຖ້າຜົນກວດຂອງແຂວງ ບໍ່ແກ້ວ 2 ຕົວຢ່າງ, ແນວໃດກໍດີ, ເພື່ອສະກັດກັ້ນພະຍາດ ນີ້, ກະຊວງ ສາທາລະນະສຸກ ໄດ້ເພີ່ມມາດຕະການຢ່າງເຂັ້ມງວດຄື: ກະກຽມຄວາມພ້ອມໃນການຕອບໂຕ້ຕໍ່ການລະບາດ ໂດຍໄດ້ເພີ່ມ ທີມເຝົ້າລະວັງ ຢູ່ ພາກສະໜາມ ແມ່ນມີຄວາມຕຽມພ້ອມຕະຫລອດ 24 ຊົ່ວໂມງ ຫລື ຫລາຍ ກ່ວານັ້ນ, ສ່ວນຢູ່  ໂຮງໝໍ ສູນກາງ ແລະ ໂຮງໝໍແຂວງ ໂດຍສະເພາະບັນດາໂຮງໝໍທີ່ມີຄວາມສ່ຽງຢູ່ເຂດຊາຍແດນ, ແມ່ນໄດ້ເພີ່ມມາດຕະການເຝົ້າລະວັງຢ່າງເຂັ້ມງວດ, ສຳລັບ ວັດຖຸອຸປະກອນເພື່ອຮັບໃຊ້ໃຫ້ແກ່ວຽກງານແມ່ນໄດ້ເລັ່ງດ່ວນ, ສະເພາະ ວຽກງານໃຫ້ຂໍ້ມູນຂ່າວສານ ກໍເຮັດປົກກະຕິ ທັງສື່ໂທລະພາບ-ວິທະຍຸ, ສື່ສິ່ງພິມ, ສື່ອອນລາຍ ແລະ ໂທສາຍດ່ວນກະຊວງ ສາທາລະນະສຸກ, ພ້ອມທັງການກັ່ນກອງການເຂົ້າອອກຢູ່ດ່ານຜ່ານແດນຕ່າງໆໃນທົ່ວປະເທດຢ່າງເຂັ້ມງວດ

    ຫົວໜ້າກົມຄວບຄຸມພະຍາດຕິດຕໍ່ ຍັງແນະນຳວ່າ: ເພື່ອສະກັດກັ້ນ ພະຍາດດັ່ງກ່າວເຮົາຄວນຫລີກລ່ຽງການເດີນທາງໄປເຂດທີ່ມີການລະບາດ ຫລື ຊຸມຊົນແອອັດ, ຖ້າຈຳເປັນຈະໄປຕ້ອງໄດ້ປະຕິບັດຄື: ປະຕິບັດມາລະຍາດໃນການໄອຈາມດ້ວຍການອັດປາກ ແລະ ດັງ, ໃຊ້ຜ້າອັດປາກ, ລ້າງມືຂອງທ່ານທຸກຄັ້ງດ້ວຍສະບູ ຫລື ນ້ຳຢາຂ້າເຊື້ອ, ຫລີກລ່ຽງການສຳພັດໃກ້ຊິດກັບຄົນທີ່ມີອາການຄ້າຍໄຂ້ຫວັດເຊັ່ນ: ໄຂ້, ໄອ, ເຈັບຄໍ ແລະ ຫາຍໃຈຍາກ, ຫາກທ່ານມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍ ຫລື ຫາຍໃຈຍາກ ບວກກັບໄດ້ເດີນທາງໄປໃນເຂດທີ່ມີການລະບາດກ່ອນ ຈາກ ສປ ຈີນ 14 ວັນຫລັງຈາກມີການສຳພັດໃກ້ຊິດກັບ ກໍລະນີຢັ້ງຢືນຕິດເຊື້ອ COVID-19 ກະລຸນາໄປພົບແພດໝໍໃກ້ບ້ານທ່ານ ແລະ ແຈ້ງປະຫວັດການເດີນທາງຂອງທ່ານໄດ້ໄປເຂດທີ່ມີການລະບາດພະຍາດດັ່ງກ່າວໃຫ້ເຈົ້າໜ້າທີ່ແພດໝໍຮັບຊາບ.