ຜົວໂອນເງິນໃຫ້ກິກຜິດເລກບັນຊີ

ຂ້ອຍເປັນຄົນໂຊກດີ ທີ່ໄດ້ເກີດຢູ່ໃນຄອບຄົວທີ່ມີຖານະເສດຖະກິດພຽງພໍ, ພໍ່ແມ່ລ້ຽງດູເປັນຢ່າງດີ. ພາຍຫຼັງຮຽນຈົບແພດຊັ້ນສູງແລ້ວ ຂ້ອຍໄດ້ໄປສະໝັກເຮັດວຽກຢູ່ໂຮງໝໍເອກະຊົນແຫ່ງໜຶ່ງ. ຂ້ອຍໄດ້ມີໂອກາດຮູ້ຈັກກັບຜູ້ຊາຍຄົນໜຶ່ງ, ລາວເຮັດວຽກຢູ່ບໍລິສັດຕອບສະໜອງອຸປະກອນການແພດ ແຕ່ລາວຜ່ານສອງເມຍມາແລ້ວ.

ຍ້ອນມີປະສົບການຜ່ານສອງເມຍມາແລ້ວ ຈຶ່ງຕື້ຂ້ອຍບໍ່ມີຄວາມຍາກຊາ ໃນທີ່ສຸດຂ້ອຍກໍຕົກຫຼຸມຮັກຂອງເຂົາ. ຮັກກັນໄດ້ 6 ເດືອນ ພວກຂ້ອຍໄດ້ປຶກສາກັນຈັດງານແຕ່ງ ແຕ່ພໍ່ແມ່ຂ້ອຍບໍ່ເຫັນດີໃຫ້ເອົາກັບເຂົາ ຍ້ອນວ່າເຂົາໄດ້ຜ່ານສອງເມຍມາແລ້ວ. ເຖິງແມ່ນພໍ່ແມ່ບໍເຫັນດີກໍຕາມ ແຕ່ຂ້ອຍໄດ້ຕັດສິນໃຈໄປກັບຊາຍຄົນນັ້ນ. ຫຼັງຈາກນັ້ນພວກຂ້ອຍໄດ້ມີພະຍານຮັກໜຶ່ງຄົນນຳກັນ, ເບື້ອງຕົ້ນຜົວຂອງຂ້ອຍເບິ່ງແຍງດູແລເປັນຢ່າງດີ, ບໍ່ມີຫຍັງຜົວກໍຫາມາໃຫ້ ບໍ່ໄດ້ກັງວົນເລື່ອງໃຊ້ຈ່າຍເງິນຄຳ ແຕ່ເຂົາບໍ່ໄດ້ເອົາໃຫ້ຂ້ອຍໂດຍກົງ ແຕ່ຫາກໃຫ້ແມ່ເອົາໄວ້ ຂ້ອຍຢາກໄດ້ຫຍັງ ຢາກຊື້ຫຍັງ ຕ້ອງໄດ້ແບມືຂໍ. ສາຍພົວພັນລະຫ່ວາງແມ່ຍ່າກັບລູກໄພ້ບໍ່ຄ່ອຍດີປານໃດ. ສະນັ້ນ, ຂ້ອຍຈຶ່ງຈັບຈ່າຍໃຊ້ສອຍເງິນຂອງຕົນເອງທີ່ປະຢັດໄດ້ກ່ອນບໍ່ທັນແຕ່ງງານ. ເມື່ອຕົກຢູ່ໃນສະພາບຍາກຈົນແບບນີ້ ຂ້ອຍແຮງຄຶດເຖິງພໍ່ແມ່ ຄຶດເຫັນຄຳເວົ້້າຂອງພວກເພິ່ນທີ່ວ່າ: ຖ້າຜູ້ຊາຍຜ່ານຜູ້ຍິງຄົນດຽວຍັງພໍຮັບໄດ້ ແຕ່ອັນນີ້ຜ່ານຕັ້ງສອງຄົນ ເປັນທີ່ຍອມຮັບບໍ່ໄດ້ ຕ້ອງເບິ່ງຄືນທາດແທ້ຂອງເຂົາ. ເມື່ອຕົກຢູ່ໃນສະພາບແບບນີ້ ຂ້ອຍກໍບໍ່ກ້າຈະໂທຫາພໍ່ກັບແມ່ເລີຍ ຍ້ອນຂ້ອຍບໍ່ຟັງຄວາມພວກເພິ່ນ. ພາຍຫຼັງລູກມີອາຍຸໄດ້ 8 ເດືອນ ຂ້ອຍກໍໄດ້ໄປສະໝັກເຮັດວຽກຢູ່ຫ້ອງກວດຂອງເອກະຊົນແຫ່ງໜຶ່ງ, ຈຶ່ງມີເງິນພໍຈັບຈ່າຍຂຶ້ນມາແດ່. ສ່ວນຜົວບໍ່ໄດ້ມີຄວາມເປັນຫ່ວງເປັນໄຍນຳລູກເມຍເລີຍ, ເຂົາຫລິ້ນກິນຟູມເຟືອຍ, ເຂົ້າເທັກເຂົ້າບາ, ຂ້ອຍເຕືອນຜົວຫຼາຍເທື່ອແຕ່ເຂົາກໍບໍ່ໄດ້ເອົາເຂົ້າຫູ ຊໍ້າບໍ່ໜຳຍັງຮ້າຍດ່າ ເວົ້າຄວາມຫຍາບຄາຍໃສ່ຂ້ອຍອີກ. ຢູ່ມາມື້ໜຶ່ງຂ້ອຍຮູ້ວ່າເຂົານອກໃຈ ໜີໄປມີຊູ້, ຂ້ອຍກໍຕັກເຕືອນເຂົາອີກ ແຕ່ເຂົາກໍຕອບວ່າ ຜູ້ຊາຍຫລິ້ນກິນ ມີຜູ້ສາວເປັນເລື່ອງທຳມະດາວ່າຊັ້ນ. ບັນຫາທີ່ໃຫ່ຍ

ກ່ວານັ້ນກໍຄື ເຂົາລັກໂອນເງິນໃຫ້ຊູູ້ ແຕ່ຫຼົງໂອນເຂົ້າເລກບັນຊີຂອງຂ້ອຍ ເປັນຈຳນວນເງິນ 100 ລ້ານກີບ. ເມື່ອເຫັນສຽງເຕືອນຈາກໂທລະສັບ ມາເປີດເບິ່ງແມ່ນຜົວໂອນເງິນໃຫ້, ຂ້ອຍຄິດວ່າ ຜົວໂອນເງິນໃຫ້ເພື່ອໃຫ້ຂ້ອຍເອົາໄປລົງທຶນເປີດຮ້ານອົບນວດກັບໝູ່ ເພາະກ່ອນໜ້ານັ້ນຂ້ອຍເຄີຍເລົ່າຄວາມຄິດນັ້ນສູ້ຜົວຟັງ. ແຕ່ຄວາມຈິງບໍ່ແມ່ນແນວນັ້ນ, ຂ້ອຍໄດ້ຍິນຜົວລົມກັບຊູ້ວ່າ “ອ້າຍໂອນເງິນໃຫ້ນ້ອງລະເດີ 100 ລ້ານກີບ”, ນ້ອງບໍ່ທັນເຫັນບໍ. ເມື່ອໄດ້ຍິນແນວນັ້ນ ຂ້ອບເກືອບເປັນລົມກັບທີ່.

ເວລານີ້ຂ້ອຍຕົກຢູ່ໃນສະພາບຂັບຂັນ ຈະກັບເມືອຫາພໍ່ແມ່ກໍບໍ່ກ້າ, ຈະຢູ່ນຳຜົວຕໍ່ໄປກໍບໍ່ໄດ້. ຂ້ອຍຄວນຕັດສິນໃຈແນວໃດດີ?