ລາວຍົກລະດັບການເຝົ້າລະວັງ ແລະ ປ້ອງກັນເຊື້ອໄວຣັສ ໂຄໂລນາ

ໃນວັນທີ 13-14 ກຸມພານີ້, ກະຊວງສາທາລະນະສຸກ ຮ່ວມກັບອົງການອະນາໄມໂລກ, ສູນຄວບຄຸມ ແລະ ປ້ອງກັນພະຍາດຂອງສະຫະຣັສອາເມລິກາ (USCDC) ໄດ້ຈັດສໍາມະນາຍົກສູງວຽກງານເຝົ້າລະວັງ ແລະ ການຕອບໂຕ້ ເຊື້ອພະຍາດສາຍພັນໃໝ່ນີ້ (Novel Corona Virus) ສໍາລັບທີມງານນຕອບໂຕ້ໄວ (RRT) ຂັ້ນແຂວງ ເຊິ່ງໄດ້ຈັດຂຶ້ນຢູ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ຫົວໜ້າສູນວິເຄາະ ແລະ ລະບາດວິທະຍາ, ກະຊວງສາທະລະນະສຸກ ແລະ ຜູ້ຕາງໜ້າວິຊາການໂຮງໝໍຕ່າງໆໃນທົ່ວປະເທດເຂົ້າຮ່ວມ.

ຫົວໜ້າສູນວິເຄາະ ແລະ ລະບາດວິທະຍາ ໃຫ້ຮູ້ວ່າ: ການຈັດສຳມະນາດັ່ງກ່າວ ເພື່ອແນໃສ່ຍົກລະດັບການເຝົ້າລະວັງໃຫ້ມີຄວາມພ້ອມ ແລະ ຕອບໂຕ້ຖ້າຫາກມີການລະບາດຂອງເຊື້ອພະຍາດດັ່ງກ່າວ, ພ້ອມນີ້ກໍເລັ່ງໃສ່ສ້າງຄວາມເຂັ້ມແຂງສະກັດກັ້ນຢູ່ແຕ່ລະດ່ານສາກົນຕ່າງໆ, ມາດຕະການການເກັບຕົວຢ່າງມາວິເຄາະໃຫ້ມີຄວາມຖືກຕ້ອງ ແລະ ປອດໄພ, ສ້າງຄວາມເຂົ້າໃຈເຖິງສະຖານະການຂອງໂລກ ແລະ ຍຸດທະສາດການຕອບໂຕ້ກັບເຊື້ອໄວຣັສດັ່ງກ່າວໃນລາວເຮົາ ແລະ  ໃຫ້ເຂົ້າໃຈຂຶ້ນຕື່ມອີກກ່ຽວກັບກົນໄກການປະສານງານທີ່ມີຢູ່ແລ້ວ (ສູນປະຕິບັດງານສຸກເສີນ) ແລະ ຂະບວນການຄັດກອງທີ່ດ່ານ ເຂົ້າ-ອອກເມືອງຕ່າງໆ, ເພີ່ມທະວີໃນການທົບທວນຄືນ ບັນດາຄໍາແນະນຳຕ່າງໆ ກ່ຽວກັບການນຳໃຊ້ນິຍາມກໍລະນີ ເພື່ອຄັດກອງ, ການສອບສວນ ແລະ ການຕິດຕາມກໍລະນີສົງໃສໃຫ້ແກ່ທີມງານຕອບໂຕ້ໄວຂັ້ນແຂວງ (RRT),  ພ້ອມທັງຍົກສູງສະຕິຕື່ນຕົວກ່ຽວກັບການຄຸ້ມຄອງກໍລະນີ, ການປ້ອງກັນ ແລະຄວບຄຸມການຕິດເຊື້ອ ແລະ ປະຕິບັດການນຸ່ງເຄື່ອງປ້ອງກັນຕົວເອງຢ່າງ ເໝາະສົມ (PPE). 

ປັດຈຸບັນ, ສູນວິເຄາະ ແລະ ລະບາດວິທະຍາໄດ້ຂະຫຍາຍອອກໃຫ້ສະຖາບັນມາສເຕີລາວ ແລະ ຫ້ອງວິເຄາະຈຸລິນຊີໂຮງໝໍມະໂຫສົດ ເຂົ້າມາຮ່ວມມືໃນການກະກຽມຄວາມພ້ອມຂອງການວິເຄາະຕົວຢ່າງກໍລະນີສົງໄສຕ້ອງໄດ້ກວດຜ່ານທັງ 3 ຫ້ອງວິເຄາະດັ່ງກ່າວ, ເພື່ອຮັບປະກັນຄຸນນະພາບ, ພ້ອມທັງໄດ້ສົ່ງຜົນກວດໄປທີ່ອົງການອະນາໄມໂລກຢູ່ອົດສະຕຣາລີກວດຄືນ ເພື່ອຢັ້ງຢືນໃຫ້ສັງຄົມເຊື່ອໝັ້ນວ່າຜົນກວດທີ່ອອກມາແມ່ນມີຄວາມຊັດເຈນຢ່າງແທ້ຈິງ.