ກິນໝາກອຶທຸກມື້ໄດ້ປະໂຫຍດ
ໝາກອຶ ມີຄຸນປະໂຫຍດທາງໂພຊະນາການຫລາກຫລາຍ ຫາກທ່ານກິນໝາກອຶເປັນປະຈຳທຸກມື້ໄດ້ ທ່ານຈະໄດ້ຮັບສານຕ້ານອະນຸມູນອິດສະລະທີ່ດີໃນເລື່ອງຂອງການຊະລໍໄວຕ້ານຄວາມເຖົ້າ, ມີສ່ວນຊ່ວຍໃນການບຳລຸງສຸຂະພາບຜິວໃຫ້ມີຄວາມກ້ຽງງາມ, ນຽນນຸ້ມ, ມີຄໍລາເຈັນທີ່ຊ່ວຍໃນເລື່ອງຄວາມຂາວໃສເປັນທຳມະຊາດ ທັງຍັງບໍ່ເຮັດໃຫ້ຜິວຂອງເຮົາຫ່ຽວຍານໄວ.
ໝາກອຶ ມີວິຕາມິນຫລາຍຊະນິດ ສາມາດປ້ອງກັນ ແລະ ປິ່ນປົວພະຍາດໄດ້ຫລາຍພະຍາດ ສາມາດນຳໃຊ້ໄດ້ທັງຊີ້ນໝາກອຶ, ແກ່ນໝາກອຶ, ຮາກໝາກອຶ ລວມໄປເຖິງຍອດ ແລະ ເຄືອຂອງໝາກອຶ ເຊິ່ງທຸກພາກສ່ວນລ້ວນແຕ່ມີປະໂຫຍດ.
ກິນໝາກອຶເປັນປະຈຳຈະຊ່ວຍບຳລຸງຕັບໃຫ້ແຂງແຮງ, ບຳລຸງໝາກໄຂ່ຫລັງໃຫ້ເຮັດວຽກເປັນປົກກະຕິ ແລະ ມີສັບພະຄຸນຊ່ວຍຕໍ່ຕ້ານຄວາມເຖົ້າ ຫລື ຄວາມເສື່ອມສະມັດຕະພາບຂອງອະໄວຍະວະຕ່າງໆພາຍໃນຮ່າງກາຍໄດ້ ໂດຍສະເພາະແມ່ນແກ່ນໝາກອຶ ມີສັບພະຄຸນຊ່ວຍບຳລຸງສະໝອງ, ເສີມສ້າງຄວາມຈື່ຈຳ ແລະ ເສີມສະມັດຕະພາບທາງ ເພດໄດ້.
ນອກຈາກນີ້, ໝາກອຶຍັງມີເບຕ້າແຄໂຣທີນຫລາຍ ເຊິ່ງມີສ່ວນຊ່ວຍໃນການບຳລຸງສາຍຕາໃຫ້ມີການເບິ່ງເຫັນທີ່ກ້ວາງໄກ, ເບິ່ງເຫັນໄດ້ແຈ້ງຂຶ້ນ.
ໝາກອຶມີສານສຳຄັນທີ່ຈະຊ່ວຍຫລຸດລະດັບນຳ້ຕານໃນເລືອດໄດ້ ເໝາະສົມຫລາຍສຳລັບຜູ້ທີ່ເປັນພະຍາດເບົາຫວານ ສ່ວນໃຜທີ່ບໍ່ເປັນກໍສາມາດກິນໄດ້ ເພາະມີກົດໂປຣໄພໂອນິກ ເຊິ່ງມີສ່ວນເຮັດໃຫ້ພະຍາດມະເຮັງອ່ອນແອລົງ.
ໝາກອຶເປັນພືດຜັກສະໝຸນໄພທີ່ໃຫ້ພະລັງງານຕໍ່າ, ໄຂມັນໜ້ອຍ ຈຶ່ງເໝາະສົມແກ່ຄົນທີ່ຕ້ອງການຄວບຄຸມນຳ້ໜັກໄດ້ເປັນຢ່າງດີ.
ນອກຈາກນີ້, ສຳລັບໃຜທີ່ຢາກກິນໝາກອຶໄດ້ທຸກມື້ ກໍສາມາດເອົາໝາກອຶມາປຸງແຕ່ງເປັນອາຫານໄດ້ຫລາກຫລາຍຮູບແບບ ທັງອາຫານຫວານ ແລະ ອາຫານຄາວ, ບໍ່ວ່າຈະແມ່ນແກງໝາກອຶ, ໜຶ້ງໝາກອຶ ຫລື ຈະເຮັດເປັນຂອງຫວານ ເຊັ່ນ : ນຳ້ຫວານໝາກອຶ, ກວນໝາກອຶ, ໝາກອຶຍັດໄສ້ ຫລື ຈະເຮັດເປັນປະເພດເຄື່ອງດື່ມກໍໄດ້ຄືກັນ, ແຕ່ສຳລັບໃຜທີ່ມີລະດັບນຳ້ຕານໃນເລືອດສູງກໍໃຫ້ລະມັດລະວັງເລື່ອງການຕື່ມນຳ້ຕານ ຢ່າໃສ່ນຳ້ຕານຫລາຍເກີນ ໄປ.
ໝາກອຶ ເປັນໜຶ່ງໃນຜັກທີ່ມີສີເຫລືອງອົມສົ້ມທີ່ຊ່ວຍບຳລຸງ ແລະ ຮັກສາສາຍຕາ, ເສີມສ້າງລະບົບພູມຕ້ານທານໃຫ້ແກ່ຮ່າງກາຍ, ຫລຸດລະດັບນຳ້ຕານໃນເລືອດ, ຄວບຄຸມນຳ້ຕານໃນເລືອດ, ປ້ອງກັນພະຍາດເບົາຫວານ, ໄຂມັນ ໜ້ອຍ, ນຳ້ຕານໜ້ອຍ, ກາກໄຍອາຫານຫລາຍ, ພະລັງງານຕໍ່າ ຈຶ່ງບໍ່ເຮັດໃຫ້ຕຸ້ຍ, ປ້ອງກັນພະຍາດຫລອດເລືອດ ແລະ ຫົວໃຈ, ຊ່ວຍໃຫ້ລະບົບຂັບຖ່າຍເຮັດວຽກຢ່າງເປັນປົກກະຕິ ຈາກກາໄຍອາຫານທີ່ມີຢູ່ຫລາຍ, ຊ່ວຍຟື້ນຟູກ້າມຊີ້ນຫລັງອອກກຳລັງກາຍ, ປ້ອງກັນການເກີດພະຍາດໜິ້ວ. ນອກຈາກນີ້, ທ່ານຍັງສາມາດກິນໝາກອຶເພື່ອຊ່ວຍຫລຸດຄວາມເຄັ່ງຄຽດໄດ້ນຳ ເພາະໝາກອຶມີສ່ວນຊ່ວຍບຳລຸງປະສາດ.
