ການຄຸ້ມຄອງທຸລະກິດນໍ້າມັນເຊື້ອໄຟຢູ່ປະເທດເຮົາເຂັ້ມງວດຮັດກຸມຂຶ້ນ
ຫົວໜ້າກົມສ່ວຍສາອາກອນກະຊວງການເງິນໃຫ້ຮູ້ວ່າ: ປັດຈຸບັນ, ວຽກງານການຄຸ້ມຄອງທຸລະກິດສາງ, ນໍ້າມັນເຊື້ອໄຟແລະອາຍແກັສຢູ່ປະເທດເຮົາແມ່ນໄດ້ມີຫລາຍນິຕິກໍາເປັນບ່ອນອິງໃນການຈັດຕັ້ງປະຕິບັດເພື່ອຮັບປະກັນໃຫ້ການດໍາເນີນທຸລະກິດຂອງຜູ້ປະກອບການແລະການປະຕິບັດໜ້າທີ່ພະນັກງານກ່ຽວຂ້ອງສອດຄ່ອງຕາມລະບຽບກົດໝາຍແລະໃນເດືອນພຶດສະພາ 2019 ຜ່ານມາ, ລັດຖະມົນຕີກະຊວງການເງິນໄດ້ອອກແຈ້ງການເລກທີ 1626/ກງກ່ຽວກັບການຄຸ້ມຄອງ, ກວດກາສິນຄ້າ, ນໍ້າມັນເຊື້ອໄຟ ແລະ ອາຍແກັສແລະຄໍາແນະເລກທີ 5029/ກງລົງວັນທີ 18 ທັນວາ 2019ວ່າດ້ວຍການຄຸ້ມຄອງສາງສິນຄ້າ, ນໍ້າມັນເຊື້ອໄຟ ແລະ ອາຍແກັສຂອງບັນດາຫົວໜ່ວຍທຸລະກິດໃນຂອບເຂດທົ່ວປະເທດ, ໂດຍໄດ້ກໍານົດຫລັກການ, ວິທີການ ແລະມາດຕະການໃນການຄຸ້ມຄອງທຸລະກິດດັ່ງກ່າວ ໃຫ້ເປັນລະບົບຄົບຊຸດ.
ເພື່ອອໍານວຍໃຫ້ການຈັດເກັບລາຍຮັບຈາກພັນທະພາສີອາກອນ ແລະຄ່າທໍານຽມຕ່າງໆໃຫ້ໄດ້ຢ່າງຖືກຕ້ອງ, ຄົບຖ້ວນທັນຕາມກໍານົດເວລາ, ມີຄວາມໂປ່ງໃສ ແລະສາມາດເອົາຂໍ້ມູນຈາກການກວດກາສາງສິນຄ້າເປັນຂໍ້ມູນຮັບໃຊ້ການກວດກາຄືນຄວາມຖືກຕ້ອງໃນການແຈ້ງເສຍພາສີ, ກວດກາບົດສະຫລຸບບັນຊີປະຈໍາປີ ແລະ ການກວດກາການຂໍຫັກ ຫລືຂໍຄືນອາກອນມູນຄ່າເພີ່ມໃຫ້ຖືກຕ້ອງຕາມລະບຽບກົດໝາຍ.
ອັນສໍາຄັນເປັນການປ້ອງກັນບໍ່ໃຫ້ເຈົ້າໜ້າທີ່ສ່ວຍສາອາກອນ, ພາສີແລະ ຫົວໜ່ວຍທຸລະກິດສວຍໃຊ້ໜ້າທີ່ ແລະ ຊ່ອງຫວ່າງຕ່າງໆເພື່ອສ້າງຄວາມເສຍຫາຍໃຫ້ແກ່ລາຍຮັບງົບປະມານແຫ່ງລັດ, ພ້ອມທັງສາມາດໃຊ້ມາດຕະການຕ່າງໆຕໍ່ຜູ້ລະເມີດລະບຽບກົດໝາຍ ແລະທັງເປັນບ່ອນອີງໃນການດໍາເນີນຄະດີຕາມຂະບວນການຍຸຕິທໍາອີກດ້ວຍ.ດັ່ງນັ້ນບັນດາຫົວໜ່ວຍທຸລະກິດພາຍໃນປະເທດທີ່ນໍາເຂົ້າສິນຄ້າ, ນໍ້າມັນເຊື້ອໄຟ ແລະ ອາຍແກັສເພື່ອຈໍາໜ່າຍຂາຍຍົກຂາຍຍ່ອຍ ລວມທັງບັນດາຫົວໜ່ວຍທຸລະກິດທີ່ດໍາເນີນການຜະລິດປຸງແຕ່ງຕ່າງໆຕ້ອງໄດ້ມີລະບົບສາງສິນຄ້າເປັນຂອງຕົນເອງ, ສິນຄ້າໄດ້ກວດນັບຢູ່ໃນສາງຢ່າງເປັນປົກກະຕິ ແລະຕ້ອງໄດ້ຖືບັນຊີສາງດ້ວຍລະບົບບັນທຶກດ້ວຍມື ຫລືລະບົບອີເລັກໂຕຣນິກ ທີ່ສາມາດກວດສອບໄດ້ທຸກເວລາ. ທັງໝົດນັ້ນກໍເພື່ອເຮັດໃຫ້ການຄຸ້ມຄອງຕິດຕາມ ແລະ ການກວດກາສາງສິນຄ້າ, ນໍ້າມັນເຊື້ອໄຟ ແລະ ອາຍແກັສ ຖືກຕ້ອງຕາມລະບຽບກົດໝາຍ ແລະເປັນເງື່ອນໄຂສະດວກໃນການດໍາເນີນທຸລະກິດ, ການເກັບພັນທະພາສີອາກອນປະເພດຕ່າງໆ ເຂົ້າງົບປະມານໃຫ້ຖືກຕ້ອງ, ຄົບຖ້ວນ ແລະ ທ່ວງທັນເວລາທີ່ກົດໝາຍກໍານົດໄວ້.
