ລັດຖະບານກຳປູເຈຍເຫັນພ້ອມສ້າງໂຮງງານໄຟຟ້າຖ່ານຫີນ 2 ແຫ່ງ
ທ່ານ ພາຍ ສີພັນ (Phay Siphan) ຫົວໜ້າໂຄສົກລັດຖະບານກຳປູເຈຍ ເປີດເຜີຍວ່າ: ລັດຖະບານກຳປູເຈຍໄດ້ອະນຸມັດໂຄງການກໍ່ສ້າງໂຮງງານໄຟຟ້າຖ່ານຫີນ 2 ແຫ່ງ ທີ່ມີຂີດຄວາມສາມາດໃນການຜະລິດໄຟຟ້າລວມກັນ 965 ເມກາວັດ.
ທ່ານ ສີພັນ ກ່າວວ່າ: ການອະນຸມັດຄັ້ງນີ້ເກີດຂຶ້ນລະຫວ່າງກອງປະຊຸມຄະນະລັດຖະບານປະຈຳອາທິດ ທີ່ມີສົມເດັດ ອັກຄະມະຫາເສນາບໍດີ ເຕໂຊ ຮຸນເຊນ ນາຍົກລັດຖະມົນຕີກຳປູເຈຍ ເປັນປະທານ. ບໍລິສັດຖ່ານຫີນຫັນເສັງ (Han Seng Coal Mines) ເຊິ່ງເປັນບໍລິສັດທ້ອງຖິ່ນ ໄດ້ຮັບສຳປະທານການກໍ່ສ້າງໂຮງງານໄຟຟ້າຂະໜາດ 265 ເມກາວັດ ຢູ່ແຂວງ Oddar Meanchey ທາງຕາເວັນຕົກສຽງເໜືອຂອງປະເທດ ດ້ວຍເງິນລົງທຶນ 294 ລ້ານໂດລາສະຫະລັດ ໂດຍໂຄງການນີ້ມີກຳນົດເວລາສຳເລັດໃນທ້າຍປີ 2021.
ສ່ວນໂຄງການທີ 2 ບໍລິສັດໂຣຢໍ ກຣຸບ (Royal Group) ຂອງກຳປູເຈຍ ແລະ ບໍລິສັດຊິໂນສະຕີລ ອີກວິບເມນ ແອນ ເອັນຈິເນຍຣິງ (Sinosteel Equipment & Engineering) ຂອງຈີນ ໄດ້ຮັບສິດໃຫ້ຮ່ວມກັນກໍ່ສ້າງໂຮງງານໄຟຟ້າຂະໜາດ 700 ເມກາວັດ ຢູ່ແຂວງເກາະກົງ ທາງຕາເວັນຕົກສຽງໃຕ້ຂອງປະເທດ ດ້ວຍເງິນລົງທຶນ 1,34 ພັນລ້ານໂດລາສະຫະລັດ ໂດຍຄາດວ່າໂຄງການຈະສຳເລັດໃນປີ 2024.
ທ່ານ ສີພັນ ກ່າວອີກວ່າ: ການກໍ່ສ້າງໂຮງງານໄຟຟ້າທັງສອງແຫ່ງເປັນໂຄງການທີ່ຈຳເປັນ ເພື່ອຕອບສະໜອງຄວາມຕ້ອງການໃຊ້ໄຟຟ້າທີ່ເພີ່ມຂຶ້ນ ລວມທັງເພື່ອໃຫ້ກຳປູເຈຍມີຄວາມປອດໄພ ແລະ ຄວາມໝັ້ນຄົງທາງພະລັງງານລະຫວ່າງປີ 2021-2021 ໂດຍສະເພາະໃນລະດູແລ້ງ ເຊິ່ງໂຮງງານໄຟຟ້າພະລັງງານນ້ຳບໍ່ສາມາດຜະລິດໄຟຟ້າໄດ້ຢ່າງເຕັມປະສິດທິພາບ.
