ນຽວ ໂຣເບີດສັນ ນັກສອຍຄິວມາແຮງຕໍ່ເນື່ອງຄວ້າແຊ້ມລາຍການທີ 2 ຈາກເຂົ້າຊິງ 3 ລາຍການຕິດຕໍ່ກັນ..!

ນຽວ ໂຣເບີດສັນ ນັກສະນຸກເກີຊາວອົດສະຕຣາລີ ອາຍຸ 37 ປີ ສືບຕໍ່ສ້າງຜົນງານ ແລະ ສ້າງປະຫວັດສາດຕໍ່ເນື່ອງ ຫລ້າສຸດໄດ້ແຊ້ມລາຍການທີ 2 ຈາກເຂົ້າຊິງ 3 ລາຍການຕິດຕໍ່ກັນ ລາຍການຫລ້າສຸດຄື: World Grand Prix 2020 ໃນທ້າຍອາທິດຜ່ານມາ ທີ່ເຊວເທັນແຮມ ປະເທດອັງກິດ ຊິງເງິນລາງວັນລວມ £380,000 ປອນ ຫຼື ປະມານ 4 ຕື້ 298 ລ້ານກວ່າກີບ.

ຮອບຊິງຊະນະເລີດ ໂຣເບີດສັນ ມື 2 ຂອງໂລກ ພົບກັບ ແກຣມດັອດ ມື 21 ຂອງໂລກ ຈາກສະກັອດແລນ ທັງສອງເຂົ້າຊິງລາຍການນີ້ ເປັນຄັ້ງທຳອິດ ຜົນການແຂ່ງຂັນປະກົດວ່າ: ໂຣເບີດສັນ ເອົາຊະນະ ແກຣມດັອດ 10-8 ເຟຣມ ສ້າງປະຫວັດສາດ ເປັນຊາວອົດສະຕຣາລີ ຄົນທຳອິດໄດ້ແຊ້ມລາຍການນີ້ ຮັບຂັນແຊ້ມພ້ອມເງິນລາງວັນ £100,000 ປອນ ຫຼື ປະມານ 1 ຕື້ກວ່າກີບ ແລະ ໃນການແຂ່ງຂັນລາຍການນີ້ ໂຣເບີດສັນ ເກັບໄດ້ 9 ເຊັນເທີຣີ້ ເບຣກ ລວມ 699 ຄັ້ງ ສູງສຸດເປັນອັນດັບ 4 ຮອງຈາກ ຣອນນີ້ ໂອຊຸນລີແວນ ນັກສອຍຄິວ ຊາວອັງກິດ ທີ່ເຮັດໄດ້ 1040 ຄັ້ງ, ຈ໋ອນ ຮິກກິ້ນ ຊາວສະກັອດແລນ 782 ຄັ້ງ ແລະ ສະຕີເຟັນ ເຮັນຣີ້ ຊາວສະກັອດແລນ 775 ຄັ້ງ.

ນອກຈາກນີ້ ນຽວ ໂຣເບີດສັນ ໄດ້ແຊ້ມເປັນລາຍການທີ 2 ຈາກເຂົ້າຊິງ 3 ລາຍການຕິດຕໍ່ກັນ: ກ່ອນໜ້ານີ້ ໄດ້ແຊ້ມ European Masters 2020 ເປັນນັກສະນຸກເກີອົດສະຕຣາລີຄົນທຳອິດທີ່ເຮັດໄດ້ ແລະ ໄດ້ຮອງແຊ້ມລາຍການ German Masters 2020.

ລາຍການຕໍ່ໄປ ນຽວ ໂຣເບີດສັນ ຈະເຂົ້າຮ່ວມປ້ອງກັນແຊ້ມ ລາຍການ Welsh Open 2020 ທີ່ຄາຣດິຟ ປະເທດເວວ ໃນວັນທີ 10–16 ກຸມພານີ້ ຊິງເງິນລາງວັນລວມ £405,000 ປອນ.