ລາວເຮົາມີໜໍ່ແໜງດ້ານການພັດທະນາພະລັງງານທົດແທນແຂງແຮງຂຶ້ນ
ສະຖາບັນສົ່ງເສີມພະລັງງານທົດແທນ ໃຫ້ຮູ້ວ່າ: ພາຍຫລັງພັກ-ລັດຖະ ບານໄດ້ມີແນວທາງໃນການພັດທະນາພະລັງງານທົດແທນເປັນແຕ່ລະໄລຍະ ໂດຍສະເພາະແຜນພັດທະນາແຕ່ 2016-2020, ຍຸດທະສາດ 2025 ແລະ ວິໄສທັດ 2030, ຂະແໜງການຂອງຕົນກໍໄດ້ສ້າງນິຕິກຳຕ່າງໆ ເພື່ອຄຸ້ມຄອງ ແລະ ສົ່ງເສີມການຜະລິດພະລັງງານທົດແທນປະເພດຕ່າງໆ ເປັນຕົ້ນເຊື້ອໄຟຊີວະພາບ, ການປະຢັດພະລັງງານ ແລະ ພະລັງງານທາງເລືອກອື່ນໆ. ມາຮອດປັດຈຸບັນມີການລົງທຶນເຂົ້າໃສ່ການພັດທະນາວຽກງານນີ້ຫລາຍກວ່າ 440 ໂຄງການ ລວມມີກຳລັງຕິດຕັ້ງ 9.720 ເມກາວັດ ໃນນີ້ສຳເລັດແລ້ວ 47 ໂຄງການ, ມີກຳລັງຕິດຕັ້ງ 306,29 ເມກາວັດ. ພ້ອມນີ້ ຍັງສາມາດຜະລິດນ້ຳມັນດິບ B100 ໄດ້ກວ່າ 8 ແສນລິດ, B5 ໄດ້ 15 ລ້ານລິດຕໍ່ປີ. ສ່ວນ 2 ໂຄງການຜະລິດນ້ຳມັນແອັດຊັງຊີວະພາບຈາກມັນຕົ້ນຂະໜາດ 10.000 ລິດຕໍ່ມື້ ແມ່ນພວມດຳເນີນການກໍ່ສ້າງ, ສ່ວນໂຄງການທີ່ພັດທະນາສຳເລັດ ແລະ ຂາຍເຂົ້າລະບົບໄຟຟ້າລາວແລ້ວນັ້ນປະກອບມີ ໂຄງການພະລັງງານຊີວະພາບຈາກຂີ້ອ້ອຍ 5 ເມກາວັດ ຢູ່ໂຮງງານນ້ຳຕານແຂວງສະຫວັນນະເຂດ, ຈາກເສດໄມ້ 60 ເມກາວັດ ຢູ່ໂຮງງານຝຸ່ນເຈ້ຍເຊໂປນ, ໂຄງການພະລັງງານໄຟຟ້າແສງຕາເວັນ 32 ເມກາວັດ ຢູ່ນະຄອນຫລວງວຽງຈັນ, ໂຄງການພະລັງງານໄຟຟ້າແສງຕາເວັນເທິງໜ້ານ້ຳ 14,2 ເມກາວັດ.
ຂະນະດຽວກັນ ຍັງມີໂຄງການໄຟຟ້າແສງຕາເວັນທີ່ມີການອະນຸມັດລາຄາຊື້-ຂາຍ ແລະ ຄາດວ່າຈະກໍ່ສ້າງສຳເລັດໃນກາງປີ 2020 ນີ້ ປະກອບມີ ບໍລິສັດ EDL Gew SoLar ຈຳກັດ ມີກຳລັງຜະລິດ 68 ເມກາວັດ, ບໍລິສັດ ສຸວະດີ ພະລັງງານສະອາດ ຈຳກັດ ແຂວງບໍລິຄຳໄຊ ມີກຳລັງຜະລິດ 7,5 ເມກາວັດ ແລະ ບໍລິສັດ ລາວແກລນ ເອັນເນີຈີ ຈຳກັດ ແຂວງສະຫວັນນະເຂດ ທີ່ມີກຳລັງຕິດຕັ້ງ 15 ເມກາວັດ. ນອກນີ້ ຍັງມີຫລາຍໂຄງການພັດທະນາຂະໜາດໃຫຍ່ທີ່ສຳເລັດການສຶກສາບົດວິພາກເສດຖະກິດເຕັກນິກແລ້ວເຊັ່ນ: ໂຄງການພັດທະນານ້ຳມັນກາຊວນຊີວະພາບຈາກປາມນ້ຳມັນ, ໂຄງການພັດທະນານ້ຳມັນແອັດຊັງຊີວະພາບຈາກມັນຕົ້ນ, ໂຄງການພັດທະນາພະລັງງານລົມ ຢູ່ແຂວງບໍລິຄຳໄຊ, ຄຳມ່ວນ ແລະ ແຂວງເຊກອງ.
ສະຖາບັນດັ່ງກ່າວ ໃຫ້ຮູ້ວ່າ: ປັດຈຸບັນ ຫລາຍປະເທດໃນໂລກໄດ້ໃຫ້ຄວາມສຳຄັນຕໍ່ການພັດທະນາພະລັງງານທົດແທນ ແລະ ນຳໃຊ້ພະລັງງານສະອາດໃຫ້ຫລາຍຂຶ້ນ ເພື່ອຫລຸດຜ່ອນມົນລະພິດ, ບັນຫາອາຍພິດເຮືອນແກ້ວ ທັງເປັນການນຳໃຊ້ຊັບພະຍາກອນທຳມະຊາດພາຍໃນແບບປະຢັດ ແລະ ຍືນຍົງ. ສຳລັບຢູ່ປະເທດເຮົາ ວຽກງານນີ້ຍັງເປັນວຽກງານໃໝ່ ນັບທັງດ້ານເຕັກນິກ, ບຸກຄະລາກອນ, ວັດຖຸດິບ, ຕະຫລາດ ແລະ ການຄຸ້ມຄອງຊຶ່ງຈະຕ້ອງໄດ້ລົງເລິກສຶກສາຮໍ່າຮຽນຕື່ມ.
