ເຈົ້າຄອງນະຄອນຫຼວງເນັ້ນໃຫ້ພະແນກສາທາລະນະສຸກຄົ້ນຄວ້າມາດຕະການ ກັດກັ້ນ ແລະ ປ້ອງກັນການລະບາດຂອງເຊື້ອໄວຣັສ ໂຄໂລນາ
ໃນໂອກາດເຂົ້າຮ່ວມກອງປະຊຸມ ເຜີຍແຜ່ຂໍ້ມູນຂ່າວສານ ແລະ ປຸກລະດົມ ຂໍຄວາມຮ່ວມມື ເພື່ອເຝົ້າລະວັງພະຍາດເຊື້ອພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ (Novel Corona Virus), ທີ່ໄດ້ຈັດຂຶ້ນໃນວັນທີ 5 ກຸມພາ ນີ້, ທີ່ນະຄອນຫຼວງວຽງຈັນ.
ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ໄດ້ເນັ້ນໃຫ້ພະນແນກສາທາລະນະສຸກ ເອົາໃຈໃສ່ຄື: ໃຫ້ເປັນເຈົ້າການເຜີຍແຜ່ ແລະ ແນະນໍາທີ່ກະຊວງສາທາໄດ້ມອບໝາຍໃຫ້ປະຕິບັດ ແລະ ນໍາພາສາທາລະນະສຸກ 9 ຕົວເມືອງເປັນຈຸດປະສານງານ ແລະ ເຜີຍແຜ່ແນະນໍາຕາມຂໍ້ມູນຄວາມຈິງໃຫ້ຖືກຕ້ອງ ແລະ ກົງກັບຫຼັກການຂອງສາທາລະນະສຸກ ເພື່ອໃຫ້ປະຊາຊົນໄດ້ ຮັບຮູ້ ແລະ ເຂົ້າໃຈ ກ່ຽວກັບເຊື້ອພະຍາດດັ່ງກ່າວໃຫ້ຈະແຈ້ງ, ພ້ອມທັງຄົ້ນຄວ້າເຕັກນິກ, ມາດຕະການ ແລະ ວິທີການ ການສະກັດກັ້ນ ແລະ ປ້ອງກັນໃຫ້ດີທີ່ສຸດ ຕາມຜົນສໍາເລັດຂອງຂະແໜງສາທາລະນະສຸກຂອງໂລກ ໃຫ້ຮີບຮ້ອນນໍາມາໃຊ້ ເພື່ອບັນລຸເປົ້າໝາຍບໍ່ໃຫ້ມີພະຍາດດັ່ງກ່າວລະບາດມາສູ່ປະເທດເຮົາ. ນອກນີ້, ໃຫ້ປຸກລະດົມນໍ້າໃຈຂອງທົ່ວສັງຄົມເປັນເຈົ້າການຊ່ວຍເຫຼືອເຊິ່ງກັນ ແລະ ກັນໃນການປ້ອງກັນພະຍາດຮ້າຍດັ່ງກ່າວໃຫ້ມີປະສິດທິຜົນ. ສໍາລັບຫ້ອງການປົກຄອງນະຄອນຫຼວງວຽງຈັນ ແມ່ນໃຫ້ນໍາເອົາເງິນແຮ່ຂອງນະຄອນຫຼວງທີ່ມີໄວ້ນັ້ນຈໍານວນໃດໜຶ່ງໄປມອບໃຫ້ຂະແໜງສາທາລະນະສຸກ ເພື່ອຊີ້ອຸປະກອບຕ່າງໆ ທີ່ຈຳເປັນໄວ້ຮັບມືກັບເຊື້ອພະຍາດດັ່ງກ່າວໃຫ້ພຽງພໍ, ພ້ອມທັງຄົ້ນຄວ້າເອົາໂຮງງານໃດໜຶ່ງທີ່ມີຄວາມອາດສາມາດຜະລິດຜ້າອັດປາກຮັບໃຊ້ພາຍໃນປະເທດໃຫ້ພຽງພໍ ແລະ ພ້ອມນີ້ກໍໃຫ້ແຕ່ງຕັ້ງເອົາຂະແໜງກ່ຽວຂ້ອງເປັນຈຸດປະສານງານໃຫ້ຮັດກຸມ.
