ນະຄອນຫຼວງວຽງຈັນສົ່ງທັບນັກກກິລາ 600 ກວ່າຄົນ ຫວັງຈະທວງຄືນເຈົ້າຫຼຽນຄໍາ ໃນງານມະຫາກຳກີລາແຫ່ງຊາດຄັ້ງທີ່ 11

ທີມທັບນັກກີລາ ນະຄອນຫຼວງວຽງຈັນ ຈະສົ່ງຄະນະ, ຄູຝຶກ ແລະ ນັກກິລາເຂົ້າຮ່ວມ 600 ກວ່າຄົນ ຈາກ 28 ປະເພດກິລາ ເພື່ອຫວັງທວງຄືນຕໍາແໜ່ງເຈົ້າຫຼຽນຄໍາ ໃນງານມະຫະກໍາກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຫຼື ຊຽງຂວາງເກມ ລະຫວ່າງວັນທີ 22 ມີນາ – 1 ເມສາ 2020 ໃນງານພິທີໂອລົມຕໍ່ທັບນັກກີລາ ນະຄອນຫຼວງວຽງຈັນ ຊຸດກຽມໄປແຂ່ງຂັນງານມະຫະກໍາກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໃນອາທິດທີ່ຜ່ານມາ ທີ່ສະໂມສອນໃນຮົ່ມ ບຶງຂະຫຍອງ ໃຫ້ກຽດໂອ້ລົມນັກກີລາໂດຍ ທ່ານ ສີຫຸນ ສິດທິລືໄຊ ຮອງເລຂາພັກ, ຮອງເຈົ້າຄອງນະຄອນຫຼວງວຽງຈັນ ທັງເປັນຫົວໜ້າທັບນັກກີລາ ນະຄອນຫຼວງວຽງຈັນ ເຂົ້າຮ່ວມຊຽງຂວາງ ເກມ ພ້ອມນັ້ນຍັງມີບັນດາການນໍານະຄອນຫຼວງວຽງຈັນ, ບັນດາສະຫະພັນຕ່າງໆ, ຄະນະຮັບຜິດຊອບເຕັກນິກ, ຄູຝຶກ ແລະ ນັກກີລາເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກີລານະຄອນຫຼວງວຽງຈັນ, ທັງເປັນຫົວໜ້າອານຸກໍາມະການເຕັກນິກ ຂຶ້ນກ່າວລາຍງານໃຫ້ຮູ້ວ່າ: ມາຮອດປັດຈຸບັນ ຄູຝຶກ – ນັກກິລາ ໄດ້ເລັ່ງຊ້ອມຢ່າງໜັກ ບໍ່ວ່າຈະເປັນດ້ານເຕັກນິດ ແລະ ຍຸດທະວິທີຕ່າງໆຂອງແຕ່ລະປະເພດກີລາ ເພື່ອກຽມພ້ອມໃຈກັນສູ້ຊົນໃນ ງານມະຫາກໍາກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ນໍາເອົາກຽດ ແລະ ສັກສີມາສູ່ຊາວນະຄອນຫຼວງວຽງຈັນຢ່າງແທ້ຈິງ, ເຊິ່ງຄັ້ງນີ້ ນະຄອນຫຼວງວຽງຈັນ ສົ່ງເຂົ້າຮ່ວມ 669 ຄົນ ແບ່ງເປັນຄະນະນໍາ 112 ຄົນ, ຄູຝຶກ 88 ຄົນ ແລະ ນັກກີລາ 469 ຄົນ ຮ່ວມຊີງໄຊຄົບ 28 ປະເພດກິລາ ເພື່ອຫວັງທວງຄືນຕໍາແໜ່ງເຈົ້າຫຼຽນຄໍາມາໃຫ້ໄດ້

ສືບເນື່ອງມາຈາກ ທັບນັກກີລາ ນະຄອນຫຼວງວຽງຈັນ ເຂົ້າຮ່ວມງານມະຫະກໍາກີລາແຫ່ງຊາດ ຄັ້ງທີ 10 ທີ່ແຂວງ ອຸດົມໄຊ ໃນປີ 2014 ສາມາດຍາດໄດ້ 55 ຫຼຽນຄໍາ, 31 ຫຼຽນເງິນ ແລະ 49 ຫຼຽນທອງ ຈັດຢູ່ອັນດັບ 2 ຂອງຕາຕະລາງສະຫຼຸບຫຼຽນຈາກ 25 ປະເພດກີລາ, ສ່ວນອັນດັບ 1 ເປັນຂອງ ກະຊວງປ້ອງກັນປະເທດ ຍາດໄດ້ 61 ຫຼຽນຄໍາ, 29 ຫຼຽນເງິນ ແລະ 38 ຫຼຽນທອງ ພ້ອມນີ້ ຊຽງຂວາງ ເກມ 2020 ຈະມີການຊີງຫຼຽນຄໍາຫຼາຍເພີ່ມຂຶ້ນ ຈາກ 28 ປະເພດກິລາ. ດັ່ງນັ້ນ ຄະນະນໍານະຄອນຫຼວງວຽງຈັນ ຈື່ງເນັ້ນໃຫ້ທັບນັກກິລາຕ້ອງເອົາໃຈໃສ່ ເພື່ອຍາດຫຼຽນໃຫ້ໄດ້ 80 ຫຼຽນຄໍາຂຶ້ນໄປ ເພື່ອຮັບປະກັນການເປັນເຈົ້າຫຼຽນຄໍາ.