ເລຂາ ສປຊ ເປັນຫ່ວງການເລືອກປະຕິບັດບາງເຊື້ອຊາດໃນສະຖານະການໂຄໂຣນາ
ເລຂາທິການ ສປຊ ສະແດງຄວາມກັງວົນຕໍ່ການເລືອກປະຕິບັດຕໍ່ບາງເຊື້ອຊາດ ມາຈາກການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່.
ທ່ານ ອັນໂຕນິໂອ ກູເຕີເຣັສ ເລຂາທິການອົງການສະຫະປະຊາຊາດ (UN) ສະແດງຄວາມກັງວົນຕໍ່ການເລືອກປະຕິບັດຕໍ່ປະຊາຊົນບາງເຊື້ອຊາດ ອັນເນື່ອງມາຈາກການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່.
ທ່ານ ກູເຕີເຣັສ ຮຽກຮ້ອງໃຫ້ນາໆຊາດສະແດງຄວາມເປັນປຶກແຜ່ນ ໃຫ້ການສະໜັບສະໜູນຢ່າງເຕັມທີ່ກັບຈີນໃນສະຖານະການທີ່ຍາກລຳບາກເຊັ່ນນີ້ ລວມທັງປະເທດອື່ນໆທີ່ອາດໄດ້ຮັບຜົນກະທົບ ຕະຫລອດຈົນຫລີກເວັ້ນການເລືອກຜູ້ບໍລິສຸດທີ່ອາດຕົກເປັນເຫຍື່ອຂອງສະຖານະການນີ້.
ເມື່ອຖາມເຖິງຄວາມພະຍາຍາມຂອງຈີນໃນການຄວບຄຸມການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ນັ້ນ, ທ່ານ ກູເຕີເຣັສ ລະບຸວ່າ: ຈີນໄດ້ລະດົມຊັບພະຍາກອນ ແລະ ຂີດຄວາມສາມາດມະຫາສານເພື່ອຮັບມືກັບໂຣກລະບາດ ເຊິ່ງເປັນສິ່ງທີ່ທາງ UN ໃຫ້ການຍອມຮັບຢ່າງເຕັມທີ່.
ນອກຈາກນີ້, ເລຂາທິການ ສປຊ ຍັງເນັ້ນເຖິງການສະໜັບສະໜູນຂອງໜ່ວຍງານ UN ສຳລັບການຕໍ່ສູ້ຂອງຈີນຕໍ່ໂຣກລະບາດດັ່ງກ່າວ, ພ້ອມທັງບົ່ງຊີ້ໃຫ້ເຫັນເຖິງການເຮັດວຽກຂອງອົງການອະນາໄມໂລກ (WHO) ນຳ ໂດຍທ່ານ ກູເຕີເຣັສ ລະບຸວ່າ: WHO ໄດ້ພະຍາຍາມຢ່າງແຂງຂັນໃນການສະໜັບສະໜູນຈີນ ແລະ ປະເທດອື່ນທີ່ພົບຜູ້ຕິດເຊື້ອໄວຣັສໂຄໂຣນາ.
