ໂນວັກ ບຽດເອົາຊະນະ ໂດມີນິກ 3-2 ເຊັດ..! ຄວ້າແຊ້ມເທັນນິສ ອັອສສະເຕຣລ້ຽນ ໂອເພັນ ສູງສຸດສະໄໝທີ 8
ການແຂ່ງຂັນເທັນນີສ ແກນສະແລມທຳອິດຂອງປີ ລາຍການ ອັອສສະເຕຣລ້ຽນ ໂອເພັນ 2020 ໃນລະຫວ່າງວັນທີ
20 ມັງກອນ ຫາວັນທີ 2 ກຸມພານີ້ ທີ່ນະຄອນເມວເບິນ ປະເທດອົດສະຕຣາລີ ຊິງເງິນລາງວັນລວມ
71 ລ້ານໂດລາອົດສະຕາລີ ຫຼື ເກືອບ 435 ຕື້ກວ່າກີບ
ການແຂ່ງຂັນວັນສຸດທ້າຍຄືຮອບຊິງຊະນະເລີດປະເພດຊາຍດ່ຽວ ໂນວັກ ໂຢໂຄວິກ ມື 2 ຂອງລາຍການ ແຊ້ມເກົ່າ ແລະ ເປັນແຊ້ມສູງສຸດ 7 ສະໄໝ ຈາກເຊີເບຍ (ແຊກບີ້) ເອົາຊະນະ ໂດມີນິກ ທິ່ມ ມື 5 ຂອງລາຍການຈາກໂອຕຣິດ (ອັອສເຕຣຍ) ທີ່ເຂົ້າຊິງລາຍການນີ້ ຄັ້ງທຳອິດ 3-1 ເຊັດ: 6–4, 4–6, 2–6, 6–3 ແລະ 6–4.
ໂນວັກ ໂຢໂຄວິກ ໄດ້ເພີ່ມສະຖິຕິຄວ້າແຊ້ມ ອັອສສະເຕຣລ້ຽນ ໂອເພັນ ສູງສຸດສະໄໝທີ 8 ແລະ ເປັນແຊ້ມແກຣນສະແລມລາຍການທີ 17 ໃນຊີວິດ ຮອງຈາກ ໂຣເຈີ ເຟດເດີເຣີ ແຊ້ມສູງສຸດ 3 ສະໄໝ ແລະ ຣາຟາເອວ ນາດາວ 2 ສະໄໝ, ໂນວັກ ຮັບຂັນແຊ້ມພ້ອມເງິນລາງວັນ 4,120,000 ໂດລາອົດສະຕຣາລີ ຫລື ປະມານ 24 ຕື້ກວ່າກີບ, ພ້ອມນີ້ຍັງແຊງ ນາດາວ ຂຶ້ນເປັນມື 1 ຂອງໂລກອີກຄັ້ງ, ສ່ວນຮອງແຊ້ມໄດ້ເງິນລາງວັນປະມານເຄິ່ງໜຶ່ງຂອງແຊ້ມ.
ຂະນະທີ່ການແຂ່ງເທນນິສ ປະເພດຍິງໃນລາຍການດຽວກັນ ແຊ້ມຕົກເປັນຂອງ ໂຊເຟຍ ເຄນິນ
ດາວຮຸ່ງອານາຄົດໄກອາຍຸພຽງ 21 ປີ ຊາວສະຫະລັດອາເມຣິກາ ມື 14 ຂອງລາຍການ ທີ່ເຂົ້າຮອບຮອງຊະນະເລີດ ລະດັບແກຣນສະແລມ ເປັນຄັ້ງທຳອິດ
ພິຊິດແຊ້ມມາຄອງຢ່າງສະຫງ່າງາມ ຮອບຊິງຊະນະ ກາບິນ ມູກູລູຊ້າ ມື 32 ຂອງໂລກ ຊາວແອັສປາຍ
ແຊ້ມເຟັນໂອເພັນ ແລະ ວິມເບີດັນ ປີ 2016 ແລະ 2017: 2-1 ເຊັດ: 4–6, 6–2, 6–2. ກາຍເປັນນັກເທັນນິສຍິງຊາວອາເມຣິກາຄົນທີ
14 ທີ່ໄດ້ແຊ້ມລາຍການນີ້ ຕໍ່ຈາກ ເຊເຣນ້າ ວິນລ້ຽມສ໌.
