ໜ້າເປັນຫ່ວງ ໄພແຫ້ງແລ້ງປີນີ້

ລູກເມືອງພວນ

ເລີ່ມຢ່າງເຂົ້າປີ 2020 ບໍ່ທັນໝົດເດືອນ ມັງກອນ ໄພແຫ້ງແລ້ງ ກໍມາທັກທາຍເຮົາແຕ່ຫົວປີແລ້ວ, ແຕ່ໃນຕົວຈິງ ໄພແຫ້ງແລ້ງປີນີ້ ແມ່ນເລີ່ມຕົ້ນມາແຕ່ເດືອນ ພະຈິດປີ 2019 ພຸ້ນ. ອີງຕາມການໃຫ້ການຂອງພາກສ່ວນອຸຕຸນິຍົມໃຫ້ຮູ້ວ່າ ປີນີ້ ໄພແຫ້ງແລ້ງຈະໜັກໜ່ວງກ່ວາທຸກປີ ທີ່ຜ່ານມາ ອັນເນື່ອງມາຈາກປີ 2919  ຟ້າຂາດຝົນໄວຜິດປົກະຕິເຖິງ 3 ເດືອນ ແລະ ສາເຫດເລິກໆກໍຄືການປ່ຽນແປງຂອງດິນຟ້າອາກາດໃນທົ່ວໂລກນັ້ນເອງ.

ໃນລະດູຝົນປີ 2019 ລະຫ່ວາງເດືອນ ກໍລະກົດຫາ ກັນຍາ ຟ້າຝົນຊົນລະທາ ໄດ້ພາໃຫ້ເກີດນໍ້າຖ້ວມຫຼາຍແຂວງຢູ່ທາງພາກໃຕ້ ແລະ ພາກກາງຂອງລາວ ອັນໄດ້ສ້າງຄວາມເສຍຫາຍຕໍ່ຊີວິດ ແລະຊັບສິນຂອງລັດຖະການ ແລະ ປະຊາຊົນ ຢ່າງຫຼວງຫຼາຍ. ຊຶ່ງວິກິດການໃນຄັ້ງນັ້ນ ລັດຖະບານລາວໄດ້ເລັ່ງໃຫ້ການຊ່ວຍເຫຼືອຢ່າງເຕັມທີ່ ແລະ ສຸດຄວາມສາມາດ, ປະຊາຊົນຊາວພາກໃຕ້ ແລະ ພາກກາງຫາກໍມືນຕາອ້າປາກໄດ້ ບັດນີ້ຊໍ້າພັດຈະມາເຈິະກັບໄພແຫ້ງແລ້ງຊໍ້າເຕີມ.

ໄພແຫ້ງແລ້ງເປັນໄພທຳມະຊາດອີກປະເພດໜຶ່ງ ຊຶ່ງບໍ່ຕ່າງຫຍັງກັບໄພນໍ້າຖ້ວມ ແລະ ໄພອື່ນໆ ເພາະມັນຈະສ້າງຄວາມເສຍຫາຍຕໍ່ຊີວິດອິນຊີ ແລະ ຊັບສິນເຊັ່ນດຽວກັນ ເປັນຕົ້ນແມ່ນຂາດນໍ້າກິນ, ນໍ້າໃຊ້, ນໍ້າທຳການຜະລິດ, ນໍ້າຮັບໃຊ້ໃຫ້ໂຮງຈັກໂຮງງານ, ນໍ້າໃຫ້ແຮງປັ່ນຈັກໄຟຟ້າ…

ປັດຈຸບັນ ພວກເຮົາຈະເຫັນແມ່ນໍ້າແຕ່ລະສາຍມີຄວາມບົກແຫ້ງຢ່າງຮ້າຍແຮງ ຈາກແມ່ນໍ້າໃຫ່ຍສາຍຫຼັກຕ່າງໆ ໃນປະເທດລາວເຊັ່ນ: ແມ່ນໍ້າຂອງ, ແມ່ນໍ້າງື່ມ, ເຊບັ້ງຫຽງ, ເຊບັ້ງໄຟ… ລ້ວນແຕ່ແຫ້ງຂອດຜິດປົກະຕິ ທີ່ບໍ່ເຄີຍເຫັນມາກ່ອນຕະຫຼອດໄລຍະ 50 ປີຜ່ານມາ.

ຕໍ່ໜ້າສະພາບການຄວາມແຫ້ງແລ້ງດັ່ງກ່າວ ມັນໄດ້ໃຫ້ສັນຍາເຕືອນຢ່າງໃດຢ່າງໜຶ່ງວ່າ ສະພາບດິນຟ້າອາກາດ ກຳລັງຂົ່ມຂູ່ມະນຸດຊາດໃນທົ່ວໂລກຢ່າງຮ້າຍແຮງ. ມັນຕັ້ງໂຈດໃຫ້ພວກເຮົາວ່າ ມະນຸດຄວນຮ່ວມມືກັນແນວໃດ ເພື່ອບໍ່ໃຫ້ທຳມະຊາດຂົ່ມຂູ່ອີກຕໍ່ໄປ. ເຖິງເວລາແລ້ວບໍ ທີ່ພວກເຮົາຈະຕ້ອງໄດ້ພ້ອມກັນປົກປັກຮັກສາສິ່ງແວດລ້ອມ ທີ່ດີ.

ເປັນທີ່ແນ່ນອນວ່າ ລັດຖະບານລາວອາດຈະມີແຜນຮັບມືກັບໄພແຫ້ງແລ້ວນີ້ໄວ້ແລ້ວ, ແຕ່ເຖິງຢ່າງໃດກໍດີ ພວກເຮົາທຸກຄົນຕ້ອງຮູ້ຈັກປະຍັດມັດທະຍັດຢອດນໍ້າທຸກຢອດໃຫ້ມີຄຸນຄ່າ ໃຊ້ນໍ້າບໍ່ຟູມເຟືອຍ ປະຢັດ ຮັກເມັດນໍ້າໃຫ້ສຸດໃຈ. ເຊັ່ນຕົວຢ່າງ: ລ້າງລົດ ກໍບໍ່ຄວນຕໍ່ນໍ້າໃສ່ທໍ່ຢາງລ້າງຈະເປັນການສິ້ນເປືອງ ເຮົາອາດ ອາດຈະ ໂຕ່ງໃສ່ຊາມ ຫຼື ຄຸ ເອົາແພຈຸບແລ້ວເຊັດເອົາ, ຊັກເຄື່ອງກໍບໍ່ຄວນປ່ອຍນໍ້າໄວ້, ອາບນໍ້າກໍໃຫ້ພໍພຽງ ຄວນໂຕ່ງໃສ່ຄຸ ຫຼື ຊາມເພື່ອອາບ, ຖູແຂ້ວ ບໍ່ຄວນປ່ອຍນໍ້າກອ໊ກໄວ້…ຖ້າເປັນຊາວກະສິກອນທຳການຜະລິດກໍຄວນປູກພືດທີ່ກິນນໍ້າໜ້ອຍໃນລະດູແລ້ງ…

ພວກເຮົາຈົ່ງພ້ອມຈິດພ້ອມໃຈກັນປະຢັດນໍ້າໄວ້ເພື່ອບໍ່ໃຫ້ລຳບາກ ໃນການດຳລົງຊີວິດ. ປະຢັດນໍ້າແຕ່ລະຢອດຄືການປະຢັດເງິນແຕ່ລະກີບ, ຊີວິດຈະໄດ້ສົດໃສ.

—————————————