ການຄ້ານະຄອນຫລວງກໍານົດລາຄາຊີ້ນໝູຄືນໃໝ່ບໍໃຫ້ເກີນ 40.000 ກີບຕໍ່ກິໂລ

ພະແນກອຸດສາຫະກໍາ ແລະ ການຄ້ານະຄອນຫລວງວຽງຈັນໄດ້ອອກແຈ້ງການເຖິງຫ້ອງການອຸດສາຫະກໍາ ແລະການຄ້າ 9 ເມືອງໃນນະຄອນຫລວງ, ບັນດາຟາມລ້ຽງໝູ,  ໂຮງງານຂ້າສັດ, ຜູ້ຂາຍຊີ້ນຍົກ-ຍ່ອຍໃນທ້ອງຕະຫລາດໃຫ້ປະຕິບັດລາຄາຂາຍຊີ້ນໝູປະເພດຕ່າງໆ ດັ່ງນີ້: ໝູເປັນໂຕລາຄາສູງສຸດບໍ່ເກີນ 23.000 ກີບ. ໝູເປັນໂຕທີ່ຂ້າ, ຄົວແລະຊໍາແຫລະເປັນຊີ້ນລວມບໍ່ໃຫ້ເກີນ 28.500 ກີບ. ຊີ້ນໝູປະເພດໜຶ່ງບໍ່ໃຫ້ເກີນ 40.000 ກີບແລະປະເພດສອງບໍ່ໃຫ້ເກີນ 38.000 ກີບຕໍ່ກິໂລແລະລາຄາໃໝ່ນີ້ໃຫ້ເລີ່ມປະຕິບັດແຕ່ວັນທີ 3 ກຸມພານີ້ ເປັນຕົ້ນໄປຈົນກວ່າຈະມີແຈ້ງການໃໝ່ປ່ຽນແທນ.

ພະແນກດັ່ງກ່າວໃຫ້ຮູ້ວ່າ: ການກໍານົດລາຄາຊີ້ນໝູໃໝ່ນີ້, ຍ້ອນສະພາບຕົ້ນທຶນການຜະລິດໝູເພີ່ມຂຶ້ນຈາກມາດຕະການປ້ອງກັນພະຍາດໝູລະບາດ, ບັນຫາອັດຕາແລກປ່ຽນເງິນຕາຕ່າງປະເທດເໜັງຕິງ ແລະ ອື່ນໆ.ທັງນີ້ກໍເພື່ອຊຸກຍູ້ສົ່ງເສີມຜູ້ດໍາເນີນທຸລະກິດການຜະລິດ, ຜູ້ຄ້າຂາຍແລະເປັນການປົກປ້ອງສິດຜົນປະໂຫຍດຜູ້ບໍລິໂພກ, ຜູ້ຂາຍໃຫ້ຍຸຕິທໍາບົນພື້ນຖານກົນໄກຕະຫລາດແລະຮັບປະກັນຄວາມສະຫງົບໃນສັງຄົມ.