ຫລາຍສາຍການບິນຫລຸດຖ້ຽວບິນທັງຂາເຂົ້າ ແລະ ຂາອອກຈາກຈີນເນື່ອງຈາກກັງວົນໄວຣັສ
ຫລາຍສາຍການບິນປະກາດຍົກເລີກບາງຖ້ຽວບິນ ທັງຂາເຂົ້າ ແລະ ຂາອອກຈາກຈີນ ເນື່ອງຈາກຄວາມຕ້ອງການຫລຸດລົງຫລາຍ ຈາກຄວາມກັງວົນຕໍ່ການແຜ່ລະບາດຂອງໄວຣັສ.
ໂດຍສາຍການບິນຢູໄນເຕັດ ແອລາຍ ຂອງອາເມລິກາ ປະກາດຢຸດຖ້ຽວບິນ 24 ຖ້ຽວ ໄປນະຄອນຫລວງປັກກິ່ງ, ຮົງກົງ ແລະ ນະຄອນຊຽງໄຮ້ ລະຫວ່າງວັນທີ 1-8 ກຸມພາ ເນື່ອງຈາກຄວາມຕ້ອງການຫລຸດລົງ.
ນອກຈາກຢູໄນເຕັດແລ້ວ ສາຍການບິນອື່ນກໍກຳລັງປັບຕາຕະລາງການບິນ ເພື່ອຕີລາຄາຄວາມສ່ຽງໃນການເດີນທາງໄປປະເທດຈີນເຊັ່ນກັນ ໂດຍ ແອ ເຊອຸນ ສາຍການບິນລາຄາປະຢັດຂອງ ສ.ເກົາຫລີ ເປີດເຜີຍວ່າ: ຈະຢຸດທຸກຖ້ຽວບິນໄປຈີນ. ຂະນະທີ່ ໄຊນ່າ ແອລາຍ ຂອງໄຕ້ຫວັນ ກຳນົດຕາຕະລາງບິນໃໝ່ ແລະ ຍົກເລີກບາງຖ້ຽວບິນ ໄປເຖິງວັນທີ 10 ກຸມພາ.
ສ່ວນອີວີເອແອຂອງໄຕ້ຫວັນເຊັ່ນກັນ ອາດຍົກເລີກບາງຖ້ຽວບິນ. ຂະນະທີ່ແອການາດາຍົກເລີກບາງຖ້ຽວບິນຈາກທີ່ເຄີຍບິນໄປກັບຈີນອາທິດລະ 33 ຖ້ຽວ, ສ່ວນຄາເທ ປາຊີຟິກ ຂອງຮົງກົງ ເປີດເຜີຍວ່າ: ຈະຫລຸດຖ້ຽວບິນທັງຂາເຂົ້າ ແລະ ຂາອອກຈາກຈີນແຜ່ນດິນໃຫຍ່ລົງ 50% ຫລື ຫລາຍກວ່າ ນັບແຕ່ວັນທີ 30 ມັງກອນ ເຖິງທ້າຍເດືອນມີນາ ຕາມຄຳສັ່ງຂອງລັດຖະບານ ແລະ ຄວາມຕ້ອງການຂອງຕະຫລາດ.
ກ່ອນໜ້ານີ້ ອາເມລິກາໄດ້ເຕືອນໃຫ້ຊາວອາເມລິກາທົບທວນໃຫ້ຮອບຄອບກ່ອນຈະໄປຈີນ. ຂະນະທີ່ອັງກິດໄດ້ແນະນຳປະຊາຊົນຢຸດການເດີນທາງໄປຈີນ ຍົກເວັ້ນຈະມີເຫດຈຳເປັນ, ສ່ວນ ສ.ເກົາຫລີ ໄດ້ແນະນຳໃຫ້ປະຊາຊົນຫລີກເວັ້ນການເດີນທາງໄປຈີນ.
