ດ່ານສາກົນຂົວມິດຕະພາບລາວ-ໄທ 1 ຍັງຂາດເຄື່ອງກວດກາຜູ້ໂດຍສານເພື່ອບົ່ງບອກຜູ້ສົງໄສຕິດເຊື້ອໄວຣັດ ໂຄໂຣນາ.
ພາຍຫລັງທີ່ທ່ານລັດຖະມົນຕີກະຊວງສາທາລະນະສຸກ ອອກມາຢືນຢັນວ່າ: ສປປ ລາວ ຍັງບໍ່ທັນພົບຜູ້ຕິດເຊື້ອໄວຣັສສາຍພັນໃໝ່ (ໂຄໂລນາ) ແລະ ກະຊວງສາທາລະນະສຸກກໍໄດ້ມີການເພີ່ມທະວີຕິດຕາມເຝົ້າລະວັງສະຖາ ນະການຢ່າງໃກ້ຊິດ, ໂດຍການກຳນົດຈຸດປະສານງານໃນການຈັດຕັ້ງປະຕິບັດມາດຕະການກະກຽມຄວາມພ້ອມຮັບມືຢູ່ຕາມດ່ານສາກົນຕ່າງໆໃນທົ່ວປະເທດ, ພ້ອມໄດ້ໃຫ້ຂໍ້ມູນຂ່າວສານແກ່ຜູ້ໂດຍສານຂາເຂົ້າ ແລະ ມີການກຽມພ້ອມໃນການຄັດກອງຜູ້ໂດຍສານທີ່ເດີນທາງມາຈາກປະເທດທີ່ມີລາຍງານການລະບາດ, ບັນດາໂຮງໝໍໄດ້ມີການກະກຽມຫ້ອງແຍກດ່ຽວ, ອຸປະກອນປ້ອງກັນຕົນເອງ ແລະ ລົດຮັບ-ສົ່ງຄົນເຈັບ ແລະ ມີການກຽມຄວາມພ້ອມໃຫ້ແກ່ພະນັກງານແພດໝໍດ້ານການປິ່ນປົວສະກັດກັ້ນ ແລະ ຄວບຄຸມການຕິດເຊື້ອ, ຍົກລະດັບການກະກຽມຫ້ອງວິເຄາະທີ່ສາມາດກວດຫາເຊື້ອຈຸລະໂລກດັ່ງກ່າວໄດ້ໃນ ສປປ ລາວ ຕະຫລອດ 24 ຊົ່ວໂມງ.
ແຕ່ໃນຄວາມເປັນຈິງ ຍັງມີບັນດາດ່ານຍັງບໍ່ທັນມີເຄື່ອງກວດເຊື້ອພະຍາດດັ່ງກ່າວ ແລະ ມີຄວາມສ່ຽງທີ່ຈະມີການແຜ່ລະບາດຕິດເຊື້ຶອເຂົ້າມາໄດ້, ດັ່ງໃນວັນທີ 28 ມັງກອນນີ້, ໜັງສືພິມລາວພັດທະນາໄດ້ລົງໄປສຳພາດ ທ່ານ ຫົວໜ້າກົມ ຕມ ຄຸ້ມຄອງດ່່ານດັ່ງກ່າວໃຫ້ຮູ້ວ່າ: ມາດຮອດປັດຈຸບັນ, ດ່ານຂອງພວກເຮົາຍັງບໍ່ທັນມີເຄື່ອງມືອຸປະກອນໃນການກວດກາຜູ້ໂດຍສານຂາເຂົ້າ ເພື່ອບົ່ງບອກຜູ້ຕິດເຊື້ອໄວຣັດຮ້າຍແຮງນີ້ໄດ້, ແລະ ຍັງຂາດພະນັກງານແພດລົງປະຈຳການກວດກາຕິດຕາມ, ເຮັດໃຫ້ອາດມີຄວາມສ່ຽງໃນການສະກັດກັ້ນເຊື້ອພະຍາດນີ້, ເນື່ອງຈາກມີປະຊາຊົນເຂົ້າ-ອອກ ດ່ານເປັນຈຳນວນຫລາຍໃນແຕ່ລະມື້, ແຕ່ປັດຈຸບັນ ທາງດ່ານຜ່ານແດນດັ່ງກ່າວ ກໍໄດ້ເພີ່ມທະວີເອົາໃຈໃສ່ເປັນຕົ້ນແມ່ນໃຫ້ພະນັກແນະນຳໃຫ້ນັກທ່ອທ່ຽວ ແລະ ມວນຊົນເຂົ້າ-ອອກດ່ານ ໃນເບື້ອງຕົ້ນ.
ເຈົ້າໜ້າທີ່ແພດ ທີ່ປະຈຳດ່ານດັ່ງກ່າວໃຫ້ຮູ້ວ່າ: ປັດຈຸບັນ, ດ່ານສາກົນແຫ່ງນີ້, ແມ່ນມີມວນຊົນເຂົ້າ-ອອກ ຢູ່ດ່ານເປັນຈຳນວນຫລາຍ, ໂດຍສະເພາະແມ່ນ ການທາງໄປມາລະຫວ່າງປະຊາຊົນ ລາວ-ໄທ ແລະ ນັກທ່ອງທ່ຽວຕ່າງປະເທດຈຳນວນໜຶ່ງ, ແຕ່ກໍພົບມີຂໍ້ຫຍຸ້ງຍາກໃນການກວດກາ ເນື່ອງຈາກຂາດເຄື່ອງກວດທີ່ທັນສະໄໝ, ພ້ອມນັ້ນ ພະນັກງານແພດປະຈຳກໍມີພຽງຄົນດຽວ, ສະນັ້ນ ການສະກັດກັ້ນ ຍິ່ງລຳບາກໃນການກວດກາ, ສະກັດກັ້ນ ແລະ ປ້ອງກັນໄວຣັດຮ້າຍແຮງນີ້, ແຕ່ພວກເຮົາກໍຈະເລັ່ງປະສານສົມທົບ ກະຊວງສາທາລະນະສຸກ ເພື່ອຮ່ວມກັນສະກັດກັ້ນໃຫ້ມີຜົນ.
