ປກສ ນະຄອນຫລວງວຽງຈັນ ຈະເຂັ້ມງວດຕໍ່ເຈົ້າໜ້າທີ່ ເມີນເສີຍການປະຕິບັດວຽກງານ

    ຫົວໜ້າກອງບັນຊາການ ປກສ ນະຄອນຫລວງວຽງຈັນ ໄດ້ຊີ້ແຈງກ່ຽວກັບບັນຫາພະນັກງານເຈົ້າໜ້າທີ່ປະພຶດບໍ່ເໝາະສົມຕໍ່ກອງປະຊຸມສະພາປະຊາຊົນນະຄອນຫລວງວຽງຈັນວ່າ: ໃນຜ່ານມາມີເຈົ້າໜ້າທີ່ ປກສ ຈຳນວນໜຶ່ງຍັງເມີນເສີຍຕໍ່ການປະຕິບັດວຽກງານ, ລະເມີດລະບຽບວິໄນ ແລະ ອື່ນໆ ຊຶ່ງພາໃຫ້ເກີດມີຫາງສຽງບໍ່ດີຂອງສັງຄົມ, ເປັນຕົ້ນແມ່ນການຂາດສະຕິໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍຄື: ເຫດການປະປ່ອຍນັກໂທດໂຕນຄຸກ, ເຈົ້າໜ້າທີ່ສວຍໃຊ້ຕຳແຫນ່ງປະພຶດທຸຈະລິດ ແລະ ອື່ນໆ, ຕໍ່ສະພາບດັ່ງກ່າວ ກອງບັນຊາການ ປກສ ນະຄອນຫລວງວຽງຈັນ ກໍມີການສືບສວນ-ສອບສວນ ແລະ ລົງວິໄນຕໍ່ເຈົ້າໜ້າທີ່ດັ່ງກ່າວຕາມແຕ່ລະສະຖານຄື: ໂຈະການເລື່ອນຊັ້ນ, ຍົກຍ້າຍໄປບ່ອນເຮັດວຽກໃໝ່ ບາງກໍລະນີຮ້າຍແຮງກໍສັ່ງໃຫ້ປົດອອກຈາກກຳລັງກໍມີ.

    ຫົວໜ້າກອງບັນຊາການ ປກສ ນະຄອນຫລວງວຽງຈັນ ໃຫ້ຮູ້ວ່າ: ໃນຜ່ານມາ ພວກເຮົາໄດ້ເພີ່ມທະວີເອົາໃຈໃສ່ສຶກສາອົບຮົມການເມືອງແນວຄິດ, ໃຫ້ພະນັກງານນັກຮົບໄດ້ເປັນປະຈຳ ແລະ ໄດ້ເອົາໃຈໃສ່ແກ້ໄຂຄວາມບໍ່ສະຫງົບ, ຊຶ່ງທຽບໃສ່ປີຜ່ານມາເຫັນວ່າ ສະພາບປະກົດການຫຍໍ້ທໍ້ຕ່າງໆໄດ້ຫລຸດລົງຄື: ໃນປີຜ່ານມາ ຢູ່ ນະຄອນຫລວງວຽງຈັນ ມີປະກົດການຫຍໍ້ທໍ້ເກີດຂຶ້ນ 2 ພັນກ່ວາເລື່ອງ, ໃນນີ້ ເປັນຄະດີ 1.600 ກ່ວາເລື່ອງ

ຫົວໜ້າອົງການໄອຍະການ ປະຊາຊົນ ນະຄອນຫລວງວຽງຈັນ ໃຫ້ຮູ້ວ່າ: ໃນຜ່ານມາ ພົບການປະຕິບັດວຽກງານຂອງເຈົ້າໜ້າທີ່ສືບສວນ-ສອບສວນ ປະພຶດບໍ່ຖືກຕ້ອງ, ເປັນຕົ້ນແມ່ນການຄວບຄຸມຕົວຜູ້ຕ້ອງຫາບໍ່ຖືກລະບຽບ, ສະຖານທີ່ຄ້າຍຄຸມຂັງຄັບແຄບ, ພົບມີຜູ້ຖືກຫາກັກເກີນ ແລະ ການອະນຸຍາດໃຫ້ຜູ້ຖືກຫາ-ນັກໂທດປະກັນຕົວໂດຍບໍ່ຖືກຕ້ອງຕາມກົດໝາຍ. ຊຶ່ງທາງອົງການພວກເຮົາກໍມີໄດ້ແຈ້ງໃຫ້ພາກສ່ວນກ່ຽວຂ້ອງແກ້ໄຂໂດຍໄວ.