ພະຍາດອະຫິວາໝູອາຟຣິກາ ຍັງສືບຕໍ່ລະບາດ 170 ບ້ານໃນທົ່ວປະເທດ
ການລະບາດຂອງພະຍາດອະຫິວາໝູອາຟຣິກາ ໃນຂອບເຂດທົ່ວປະເທດເຮົາ ໄດ້ເລີ່ມມາແຕ່ຕົ້ນເດືອນ ມິຖຸນາ 2019 ແລະ ມາຮອດປັດຈຸບັນ ມີໝູຕາຍແລ້ວ 20 ພັນກວ່າໂຕ ແລະ ໝູຍັງມີຊີວິດທີ່ເປັນກຸ່ມສ່ຽງອີກ 20 ພັນກວ່າໂຕ. ການລະບາດຂອງພະຍາດສັດດັ່ງກ່າວ ຊຶ່ງໄດ້ພົບເຫັນຄັ້ງທໍາອິດໃນລາວມີຢູ່ 7 ບ້ານໃນເມືອງຕຸ້ມລານ ແຂວງສາລະວັນ ເຊັ່ນ: ບ້ານສາມັກຄີໄຊ, ດິນດາກ, ໂພນງາມ, ເກັງຣັງ, ນາລະຈາງ, ຫ້ວຍຫວ້າ ແລະ ບ້ານນາຮ່ອງໃຫຍ່, ເຊິ່ງເຮັດໃຫ້ມີໝູຕາຍ 973 ໂຕ, ຕໍ່ສະພາບດັ່ງກ່າວ ພາກສ່ວນກ່ຽວຂ້ອງໄດ້ລົງຕິດຕາມ ກວດສອບເພື່ອຕ້ານ, ສະກັດກັ້ນ ແລະ ຕອບໂຕ້ກັບການລະບາດຂອງພະຍາດໄດ້ຢຸດຕິລົງ, ແຕ່ມາຮອດປັດຈຸບັນ ເຫັນວ່າການລະບາດພະຍາດດັ່ງກ່າວ ຍັງສືບຕໍ່ຢູ່ໃນ 170 ບ້ານ, ຂອງ 57 ເມືອງໃນທົ່ວປະເທດ, ເຮັດໃຫ້ມີໝູຕາຍ ແລະໄດ້ຂ້າທໍາລາຍ ທັງໝົດ 20.425 ໂຕ ໃນນັ້ນ, (ໝູໃຫຍ່ 30%, ກາງ 15% ແລະ ໝູນ້ອຍ 55%) ແລະ ໝູຍັງມີຊີວິດທີ່ເປັນກຸ່ມສ່ຽງທັງໝົດ 20.378 ໂຕ. ຊຶ່ງປັດຈຸບັນຂະແໜງການກ່ຽວຂ້ອງ ໄດ້ດໍາເນີນມາດຕະການເຝົ້າລະວັງຢ່າງເຄັ່ງຄັດ ແລະ ເຂັ້ມງວດ.
