ການພັດທະນາອົງກອນ
ລູກເມືອງພວນ
ສະບາຍດີ ເພື່ອນຜູ້ອ່ານທີ່ຮັກແພງ, ພວກເຮົາມາເຂົ້າໃຈກັນຕື່ມວ່າ: ອົງກອນແມ່ນຫຍັງ ? ແລະ ຄວນເອົາໃຈໃສ່ຫຍັງແດ່ຕໍ່ການພັດທະນາອົງກອນ ? ດັ່ງນິຍາມໃຫ້ຮູ້ວ່າ: ອົງກອນແມ່ນການຈັດຕັ້ງໃດໜຶ່ງຂອງພາກລັດ ຫຼື ເອກະຊົນ ເຮັດໜ້າທີ່ຕາມພາລະບົດບາດ, ສິດ, ໜ້າທີ່ ແລະ ທີ່ຕັ້ງຂອງຕົນ. ອົງກອນມີສັກກາຍະພາບ ຄືອົງກອນທີ່ເຕີບໂຕຂຶ້ນເລື້ອຍໆ ແລະ ພັດທະນາໂຕເອງຢູ່ສະເໝີ. ອົງກອນທີ່ມີຄວາມເຂັ້ມແຂງ ຄືອົງກອນທີ່ມີການປັບຕົວ ຈົນພັດທະນາໃຫ້ກ້າວທັນໂລກທີ່ປ່ຽນແປງໄປແຕ່ລະຍຸກແຕ່ລະສະໄໝ. ດັ່ງນັ້ນ, ເປົ້າໝາຍໜຶ່ງຂອງອົງກອນກໍຄືການການມຸ່ງ “ພັດທະນາຕົນເອງ” ເພື່ອໃຫ້ເກີດການປ່ຽນແປງທີ່ດີຂຶ້ນຢູ່ສະເໝີ.
ການພັດທະນາອົງກອນຄືການເຮັດໃຫ້ອົງກອນຂອງຕົນດີຂຶ້ນ ແລະ ເກີດການປ່ຽນແປງໄປໃນທາງທີ່ດີ. ການພັດທະນາອົງກອນຍັງໝາຍເຖິງການຍົກລະດັບອົງກອນຢ່າງສ້າງສັນ ແລະ ເກີດປະສິດທິຜົນສຸງສຸດ ນັບທັງການພັດທະນາບຸກຄະລາກອນ ເຊິ່ງການພັດທະນານັ້ນຕ້ອງມີເປົ້າໝາຍທີ່ຊັດເຈນ, ມີປະເດັນທີ່ສຳຄັນທີ່ສຸດຄື:
- ມີເປົ້າໝາຍທີ່ຊັດເຈນຈະເຮັດໃຫ້ທິດທາງຂອງອົງກອນຈະແຈ້ງຂຶ້ນ, ມີນະໂຍບາຍທີ່ແນວແນ່ ຈະຊ່ວຍໃຫ້ການຈັດຕັ້ງປະຕິບັດ ລາບລື່ນ, ວ່ອງໄວ ແລະ ກ້າວໄກຢ່າງບໍ່ຢຸດຢັ້ງ.
- ປັດໄຈທີ່ສຳຄັນໃນການພັດທະນາອົງກອນໃຫ້ມີສັກກາຍະພາບ ກໍຄືຊັບພະຍາກອນມະນຸດທີ່ມີຄຸນນະພາບຂອງອົງກອນນັ້ນເອງ.
- ເສດຖະກິດ ແລະ ເທັກໂນໂລຢີເປັນປັດໄຈສຳຄັນໃນຍຸດປັດຈຸບັນຂອງການພັດທະນາອົງກອນໃຫ້ປະສົບຄວາມສຳເລັດ.
ແຕ່ໃນນັ້ນມີຢູ່ 3 ປັດໄຈຫຼັກຄືື: ມີໂຄງສ້າງພື້ນຖານຂອງອົງກອນໃນຮູບແບບຕ່າງໆ ເຊິ່ງລວມມີ: ອຸປະກອນເຄື່ອງມືທີ່ຈຳເປັນໄປຈົນເຖິງເຕັກໂນໂລຢີ, ຂໍ້ມູນຕ່າງໆ ພ້ອມທີ່ຈະຊ່ວຍສົ່ງເສີມໃຫ້ການເຮັດວຽກມີປະສິດທິພາບ; ມີຂະບວນການເຮັດວຽກທີ່ເປັນລະບົບ ລະບຽບ: ລະບົບການເຮັດວຽກທີ່ມີມາດຕະຖານ ຊັດເຈນ ມີລະບົບລະບຽບ, ມີຂັ້ນຕອນທີ່ເໝາະສົມ, ມີການປະເມີນຜົນລວມເຖິງມີການແກ້ໄຂຈຸດບົກຜ່ອງ ໄດ້ຢ່າງທັນການຈະເຮັດໃຫ້ອົງກອນມີປະສິດທິພາບຫຼາຍຂຶ້ນ; ມີຊັບພະຍາກອນມະນຸດ ນີ້ຄືປັດໄຈສຳຄັນທີ່ສຸດຂອງອົງກອນ. ຊັບພະຍາກອນມະນຸດທີ່ມີຄຸນນະພາບເປັນປັດໄຈຕັດສິນຂອງອົງກອນ, ເຖິງແມ່ນວ່າຈະມີໂຄງສ້າງພື້ນຖານພຽບພ້ອມປານໃດກໍຕາມ ຖ້າຫາກຂາດປັດໄຈຊັບພະຍາກອນມະນຸດທີ່ມີສັກກາຍະພາບແລ້ວ ອົງກອນນັ້ນຈະບໍ່ມີຄວາມກ້າວໜ້າ.
ຖ້າຜູ້ບໍລິຫານຫາກຮູ້ເສີມສ້າງ 3 ຄວາມສຳຄັນ ແລະ 3 ປັດໄຈຕົ້ນຕໍທີ່ກ່າວມານັ້ນ ເປັນທີ່ແນ່ນອນວ່າ ອົງກອນນັ້ນຈະມີບາດກ້າວເດີນທີ່ໜັກແໜ້ນເຂັ້ມແຂງ ແລະ ມີປະສິດທິຜົນຢ່າງແນ່ນອນ.
