ປະຊາຊົນຍັງຄອງຄອຍເງີນໜີ້ຈາກໂຮງງານແປ້ງມັນຕົ້ນລາວອິນໂດໄຊນາ ເປັນຈຳນວນຫລາຍ
ໃນກອງປະຊຸມສະໄໝສາມັນເທື່ອທີ 8 ສະພາປະຊາຊົນ ນະຄອນຫລວງວຽງຈັນ ທີ່ພວມດຳເນີນຢູ່ນີ້, ທ່ານ ເບີລິນ ເພັດຈັນທະລາດ ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ, ໄດ້ອອກມາຕອບຄຳຊັກຖາມຂອງສະມາຊິກສະພາປະຊາຊົນ ກ່ຽວກັບ ໂຮງງານແປ້ງມັນຕົ້ນລາວອິນໂດໄຊນາຍັງມີການສົ່ງເສີມໃຫ້ປະຊາຊົນປູກມັນຕົ້ນຢູ່ ແລະ ມີຄວາມເປັນຫ່ວງວ່າ: ໜີ້ສິນຂອງໂຮງງານຕໍ່ຜູ້ປູກນັ້ນຈະເພີ່ມຂຶ້ນຕື່ມ, ພາຍຫລັງທີ່ໂຮງງານຜະລິດແປ້ງມັນຕົ້ນລາວອິນໂດໄຊນາທີ່ຕັ້ງຢູ່ບ້ານ ນາຊອນ , ເມືອງ ປາກງື່ມ, ນະຄອນຫລວງວຽງຈັນ, ໄດ້ຜະເຊີນວິກິດທາງດ້ານການເງິນຢ່າງໜັກໜ່ວງນັບແຕ່ທ້າຍປີ 2013 ເປັນຕົ້ນມາ, ເຮັດໃຫ້ເຈົ້າຂອງໂຮງງານຕັດສີນໃຈຢຸດຕິ ການເຄື່ອນໄຫວພາຍນັບຕັ້ງແຕ່ນັ້ນມາ ແລະ ມີໜີ້ຄ້າງຂອງປະຊາຊົນຜູ້ປູກມັນຕົ້ນເປັນຈຳນວນຫລາຍ, ຊຶ່ງທາງພາກລັດກໍໄດ້ມີການເຂົ້າໄປໄກ່ເກ່ຍ ແລະ ຊີ້ນຳໃຫ້ໂຮງງານແກ້ໄຂໜີ້ສິນທີ່ຕ້ອງຈ່າຍໃຫ້ຫລາຍເຖິງ 295,26 ຕື້ກີບ, 25,42 ລ້ານບາດ ແລະ 31,80 ລ້ານໂດລາສະຫະລັດ, ອີງໃສ່ບົດບັນທຶກ ໃນວັນທີ 22 ເມສາ 2019, ໂຮງງານໄດ້ຊຳລະໃຫ້ແກ່ປະຊາຊົນແລ້ວ ງວດທີ I ໄດ້ຊຳລະໃນປີ 2018 ໃນວົງເງີນ 425 ລ້ານກີບ ປະກອບມີ 174 ຄອບຄົວ, ງວດທີ II ໄດ້ຊຳລະໃນປີ 2019 ໃນວົງເງີນ 700 ລ້ານກີບປະກອບມີ 196 ຄອບຄົວ ແລະ ປັດຈຸບັນ ເຈົ້າຂອງກິດຈະການ, ໄດ້ສະເຫນີຂໍສືບຕໍ່ດຳເນີນການຜະລິດແປ້ງມັນຕົ້ນຄືນໃໝ່ ແລະ ປ່ຽນຊື່ຜູ້ອຳນວຍການ ໂຮງງານເພື່ອດຳເນີນການຜະລິດໃຫ້ມີລາຍໄດ້ ແລະ ຈະຊຳລະໜີ້ໃຫ້ປະຊາຊົນ ແລະ ລູກໜີ້ອື່ນໆ, ຊຶ່ງລັດຖະບານໄດ້ມອບໃຫ້ກະຊວງແຜນການ ແລະ ການລົງທຶນ ສົມທົບກັບທະນາຄານແຫ່ງ ສປປ ລາວ ລົງສົມທົບກັບບໍລິສັດ ໃນການຫາທາງອອກຂອງການສືບຕໍ່ດຳເນີນທຸລະກິດຂອງບໍລິສັດ, ພາຍ ຫລັງໄດ້ລາຍລະອຽດໃຫ້ສະເໜີແຜນການແກ້ໄຂໃຫ້ລັດຖະບານເພື່ອພິຈາ ລະນາ.
ປັດຈຸບັນ, ຍັງມີປະຊາຊົນຢູ່ເຂດເມືອງ ປາກງື່ມ ແລະ ເມືອງ ທ່າພະບາດ ຍັງຄອງຄອຍການທົດແທນໜີ້ສິນຂອງໂຮງງານມີ ຫລາຍກ່ວາ 200 ຄອບຄົວ, ລວມມີເງີນຫລາຍກ່ວາ 1 ຕື້ກີບ, ເພື່ອຊອກຫາວິທີແກ້ໄຂ, ກະຊວງອຸດສາຫະກຳ ແລະ ການຄ້າ ກໍຈະພົວພັນກັບພາກ ສ່ວນທີ່ກ່ຽວຂ້ອງຕື່ມອີກ.
