ນາຍົກສັ່ງໃຫ້ທຸກຂະແໜງການຮີບຮ້ອນສ້າງຕັ້ງໜ່ວຍປະສານງານບໍລິການລົງທຶນປະຕູດຽວ

ນາຍົກລັດຖະມົນຕີແຫ່ງ ສປປ ລາວ, ໄດ້ສັ່ງໃຫ້ບັນດາກະຊວງ, ອົງການທຽບເທົ່າ, ແຂວງ ແລະ ນະຄອນຫລວງວຽງຈັນສ້າງຕັ້ງຫນ່ວຍປະສານງານບໍລິການການລົງທຶນປະຕູດຽວປະຈໍາຂະແຫນງການຂອງຕົນຂຶ້ນ,ໂດຍພາຍໃຕ້ການຊີ້ນໍາຂອງລັດຖະມົນຕີ, ຫົວຫນ້າອົງການທຽບເທົ່າກະຊວງ, ເຈົ້າແຂວງ, ເຈົ້າຄອງນະຄອນຫລວງວຽງຈັນເພື່ອຮັບປະກັນໃຫ້ການຄົ້ນຄວ້າ, ພິຈາລະນາແລະອະນຸມັດການລົງທຶນໃນປະເທດໄວຂຶ້ນ.

ການຊີ້ນໍາຕໍ່ບັນຫາດັ່ງກ່າວ, ໄດ້ກໍານົດໃນຄໍາສັ່ງຂອງນາຍົກລັດຖະມົນຕີວ່າດ້ວຍົການປັບປຸງວຽກງານການບໍລິການອອກໃບອະນຸຍາດລົງທຶນແລະການອອກໃບອະນຸຍາດດໍາເນີນທຸລະກິດສະບັບເລກທີ 03/ນຍລົງວັນທີ 21 ມັງກອນ 2020 ແລະ ໃນຄໍາສັ່ງນີ້, ຍັງໄດ້ກໍານົດໃຫ້ໜ່ວຍງານດັ່ງກ່າວໃນແຕ່ລະຂະແໜງການຕ້ອງຄົ້ນຄ້ວາເອກະສານການລົງທຶນໃຫ້ວ່ອງໄວ ແລະ ສົ່ງຄໍາເຫັນຫລືຄໍາຕອບໃຫ້ຫ້ອງການບໍລິການລົງທຶນປະຕູດຽວພາຍໃນ 30 ວັນລັດຖະການ. ສໍາລັບກິດຈະການໃນບັນຊີຄວບຄຸມແມ່ນບໍ່ໃຫ້ເກີນ 8 ວັນລັດຖະການ, ສ່ວນການອອກອະນຸຍາດດໍາເນີນທຸລະກິດແມ່ນໃຫ້ປະຕິບັດຕາມກົດຫມາຍຂອງຂະແຫນງການກ່ຽວຂ້ອງພາຍຫລັງໄດ້ຮັບໃບອະນຸຍາດລົງທຶນແລ້ວ.

ພ້ອມນີ້, ກໍໃຫ້ສ້າງບັນຊີຮຽກການລົງທຶນທີ່ປະກອບດ້ວຍຂໍ້ມູນພື້ນຖານສໍາຄັນຕ່າງໆ ເຊັ່ນ: ຊື່ແລະຈຸດປະສົງໂຄງການ, ທີ່ຕັ້ງ, ມູນຄ່າການລົງທຶນ, ການປະເມີນຄວາມເປັນໄປໄດ້ທາງດ້ານເສດຖະກິດ-ເຕັກນິກ, ນະໂຍບາຍດ້ານພາສີ-ອາກອນ ແລະ ຕະຫລາດຈໍາຫນ່າຍ ເພື່ອດຶງດູດການລົງທຶນ ແລະ ອໍານວຍ ຄວາມສະດວກໃຫ້ແກ່ນັກລົງທຶນໃນການສຶກສາເບື້ອງຕົ້ນ. ຊຶ່ງບັນຊີຮຽກການລົງທຶນນີ້ຕ້ອງສັງລວມເປັນໄລຍະ 6 ເດືອນ ແລະ 1 ປີ ແລ້ວສົ່ງມາລວມສູນຢູ່ຫ້ອງການບໍລິການລົງທຶນປະຕູດຽວຂັ້ນສູນກາງ ແລະ ທ້ອງຖິ່ນ ລວມທັງສະຫນອງໃຫ້ບັນດາສະຖານທູດ ແລະ ສະຖານກົງສູນຂອງ ສປປລາວ ທີ່ຢູ່ຕ່າງປະເທດ ເພື່ອນໍາໃຊ້ເປັນຂໍ້ມູນໂຄສະນາດຶງດູດການລົງທຶນ,ສ້າງລາຍົການເອກະສານທີ່ຕ້ອງການໃຫ້ນັກລົງທຶນປະກອບໃນເວລາຍື່ນຄໍາຮ້ອງຂໍລົງທຶນໃນກິດຈະການຄວບຄຸມ ແລະ ກິດຈະການສໍາປະທານ ແລ້ວສະຫນອງໃຫ້ຫ້ອງການບໍລິການລົງທຶນປະຕູດຽວຂັ້ນສູນກາງ ແລະ ທ້ອງຖິ່ນຫລື ກໍານົດລາຍົການເອກະສານດັ່ງກ່າວໄວ້ໃນເວບໄຊຂອງຂະແຫນງການກ່ຽວຂ້ອງແລະເວບໄຊ ຂອງຫ້ອງການບໍລິການລົງທຶນປະຕູດຽວ ເພື່ອເປັນຂໍ້ມູນແນະນໍານັກລົງທຶນໃນເວລາປະກອບຄໍາຮ້ອງຂໍລົງທຶນຕ່າງໆ.