ຈະແກ້ໄຂບັນຫາຄົນຂໍທານ ແນວໃດດີ?
ສະບາຍດີ, ເພື່ອຜູ້ອ່ານທີ່ຮັກແພງ, ຄຳຕອບກໍຍັງເປີດປິດສະໜາຢູ່ຄືກ່ອນໜ້ານີ້, ໜັງສືພິມລາວພັດທະນາ ໄດ້ນຳສະເຫນີຂ່າວກ່ຽວກັບສະພາບຄົນຂໍທານ, ຊື່ງພົບເຫັນຫລາຍ ຢູ່ ນະຄອນຫລວງວຽງຈັນ, ບາງກຸ່ມເປັນຄົນທີ່ມີຮ່າງກາຍສົມບູນ, ແຕ່ກໍມາຍ່າງເລາະຂໍທານຕາມຖະໜົນ ແລະ ສະຖານທີ່ບໍລິການຕ່າງໆ, ໂດຍສະເພາະແມ່ນ ຢູ່ເຂດ ແຄມຂອງ ຊຶ່ງເປັນເຂດຈຸດສຸມຂອງນັກທ່ອງທ່ຽວ, ຊຶ່ງ ຮ້ານອາຫານ ແລະ ການບໍລິການຕ່າງໆ ຊຶ່ງພົບເຫັນກຸ່ມຄົນດັ່ງກ່າວເປັນຈຳນວນຫລາຍ, ພວກເຂົາຈະພາຍຖົງ, ອຸ້ມເດັກນ້ອຍມາເລາະຂໍເງີນ, ນຳແຂກຄົນຕ່າງໆຢ່າງບໍ່ໄວ້ໜ້າ, ອັນສ້າງພາບພົດບໍ່ດີໃຫ້ແກ່ ນະຄອນຫລວງເຮົາ ແລະ ຕໍ່ສະພາບດັ່ງກ່າວ.
ນັກຂ່າວໜັງສືພິມພວກເຮົາໄດ້ສຳພາດ ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມ ວ່າຈະແກ້ໄຂບັນຫານີ້ແນວໃດ? ແລະ ໄດ້ຮັບຄຳຕອບວ່າ: ບັນຫາຄົນຂໍທານ ນີ້ ເປັນປະກົດການຫຍໍ້ທໍ້ໜຶ່ງໃນສັງຄົມ, ຜ່ານມາພວກເຮົາກໍໄດ້ເອົາໃຈໃສ່ແກ້ໄຂ, ແຕ່ກໍປາກົດວ່າຍັງເຮັດບໍ່ທັນໄດ້, ເນື່ອງຈາກສະພາບເສດຖະກິດ ແລະ ບັນຫາວຽກເຮັດງານທຳ, ໂດຍສະເພາະໃນກຸ່ມຊາວໜຸ່ມ ທີ່ຢູ່ເຂດຫ່າງໄກສອກຫລີກ, ຈຳເປັນຕ້ອງເຂົ້າມາຕົວເມືອງ, ເພື່ອຂໍທານ, ເນື່ອງຈາກວ່າເຂົາເຈົ້າບໍ່ມີລາຍຮັບ, ຜົນກະທົບຈາກໄພທຳມະຊາດ, ແຕ່ອີກສ່ວໜຶ່ງແມ່ນຕັ້ງແກ້ງເຂົ້າມາຂໍທານກິນ, ເພື່ອບໍ່ຢາກອອກແຮງງານກໍມີ.
ດັ່ງປັດຈຸບັນ, ສະພາບຄົນຂໍທານໃນຕົວເມືອງແມ່ນພົບເຫັນຫລາຍຂຶ້ນ, ຊຶ່ງມີທັງຄົນ ໃບ້ບ້າເສຍຈິດ, ພິການ, ຊຶ່ງນອກຈາກຈະເປັນພາບພົດທີ່ ບໍ່ຈົບງາມຕໍ່ສາຍຕານັກທ່ອງທ່ຽວແລ້ວ, ມັນຍັງສ້າງຄວາມລໍາຄານໃຫ້ປະຊາຊົນກໍຄືຜູ້ປະ ກອບການຕ່າງໆ, ເນື່ອງຈາກວ່າຄົນຂໍທານສ່ວນຫລາຍຈະບຸກເຂົ້າໄປໃນຮ້ານເພື່ອຂໍເງິນນໍາແຂກ ຫລື ລູກຄ້າທີ່ມາໃຊ້ບໍລິການໂດຍກົງ, ຈາກບັນຫາທີ່ບໍ່ຈົບງາມດັ່ງກ່າວ, ບາງຮ້ານເຖິງຂັ້ນໄດ້ຂຽນປ້າຍເຕືອນລູກຄ້າບໍ່ໃຫ້ເອົາເງິນໃຫ້ຄົນຂໍທານ ກໍມີ, ແນວໃດກໍຕາມ, ໃນໄລຍະຜ່ານມານີ້, ເຖິງວ່າເຈົ້າໜ້າທີ່ກ່ຽວຂ້ອງໄດ້ມີການແກ້ໄຂບັນຫາດັ່ງກ່າວດ້ວຍຫລາຍຮູບການເຊັ່ນ: ຜູ້ຂໍທານປະເພດໃບ້ບ້າເສຍຈິດ ຫລື ພິການຖ້າຫາກມີຄອບຄົວ ຫລື ຜູ້ປົກຄອງກໍສົ່ງກັບຄືນສູ່ຄອບຄົວເບິ່ງແຍງ, ຖ້າບໍ່ມີກໍແມ່ນຈັດສັນເຂົ້າໄປຢູ່ສູນບໍາບັດ, ສ່ວນຜູ້ທີ່ມີຮ່າງກາຍແຂງ ແຮງມາຈາກຕ່າງແຂວງກໍແມ່ນໄດ້ສົ່ງກັບຄືນທ້ອງຖິ່ນ, ພ້ອມທັງມອບໃຫ້ອໍານາດການປົກຄອງທ້ອງຖິ່ນສຶກສາອົບຮົມບໍ່ໃຫ້ເຂົາເຈົ້າກັບຄືນມາຂໍທານອີກ. ແຕ່ປາກົດວ່າຄົນຂໍທານປະເພດທີ່ຮ່າງກາຍແຂງແຮງນີ້ແມ່ນຍັງສືບຕໍ່ກັບຄືນມາເລາະຂໍທານໃນຕົວເມືອງອີກ, ໂດຍສະເພາະຢູ່ນະຄອນຫຼວງຈັນ, ເຊິ່ງບັນຫາດັ່ງກ່າວເຫັນວ່າຍັງບໍ່ສາມາດແກ້ໄຂໄດ້ຢ່າງຂາດຕົວ, ເນື່ອງຈາກພວກກ່ຽວມີຄວາມກຽດຄ້ານ ແລະ ບໍ່ມັກອອກແຮງງານ, ເພື່ອເຮັດການຜະລິດພັດທະນາຄອບຄົວ, ຄົນຂໍທານ ປະເພດນີສ່ວນໃຫ່ຍແມ່ນເຂົ້າມາເປັນຄອບຄົວ ແລະ ບາງຄົນເຈ່ຍລູກເຈ່ຍຫລານ, ມີທັງ ແມ່ຍິງ ແລະ ເດັກນ້ອຍ ພາກັນຍ່າງເລາະຂໍທານຕາມຖະໜົນຫົນທາງຕ່າງໆໃນຕົວເມືອງ, ຕົກແລງມາກໍກັນໄປເຕົ້າໂຮມຢູ່ຕາມສວນສາທາລະນະ, ວັດວາຕ່າງໆ, ບາງຄັ້ງມີການຊື້ເຫຼົ້າເບຍມາດຶ່ມຢ່າງເມົາມັນໂດຍບໍ່ສົນໃຈຕໍ່ສາຍຕາຊຸມຊົນທີ່ຜ່ານໄປມາ.
ຕໍ່ສະພາບການດັ່ງກ່າວ, ສະມາຊິກສະພາປະຊາຊົນ ນະຄອນຫລວງວຽງຈັນ ໄດ້ສະເຫນີໃຫ້ ເຈົ້າໜ້າທີ່ ແລະ ໜ່ວຍງານກ່ຽວຂ້ອງຄວນນຳໃຊ້ມາດຕະການເດັດຂາດຕໍ່ພວກກ່ຽວເພື່ອໃຫ້ກັບຄືນສູ່ທ້ອງຖິ່ນ, ພ້ອມທັງມອບໃຫ້ອຳນາດການປົກຄອງເຂົາເຈົ້າເອົາໃຈໃສ່ສຶກສາອົບຮົມ ແລະ ຊ່ວຍສ້າງວຽກເຮັດງານທຳໃຫ້ເຂົາເຈົ້າຫລາຍຂຶ້ນ, ພ້ອມທັງປຸກລະດົມໃຫ້ເຂົາຮູ້ຈັກການອອກແຮງງານເພີ່ມພູນຜະລິດຜົນ, ເພື່ອແກ້ໄຂຄວາມທຸກຍາກ, ພ້ອມພັດທະນາຄອບຄົວໃຫ້ມີຢູ່ມີກິນຮັ່ງມີຂຶ້ນ.
