ຟີລິບປິນປະກາດສະຖານະການໄພພິບັດຫລັງພູໄຟຕາອັລພົ່ນລາວາ
ຟີລິບປິນປະກາດສະຖານະການໄພພິບັດ ຫລັງການພົ່ນລາວາຂອງພູໄຟຕາອັລ ຢູ່ເກາະລູຊອນ ເພື່ອໃຫ້ການຈັດສັນງົບປະມານຊ່ວຍເຫລືອເປັນໄປຢ່າງສະດວກວ່ອງໄວ.
ທາງການທ້ອງຖິ່ນແຂວງບາຕັງກັລຂອງຟີລິບປິນ ປະກາດສະຖານະການໄພພິບັດ ຫລັງການພົ່ນລາວາຂອງພູໄຟຕາອັລ ຢູ່ເກາະລູຊອນ ແຕ່ວັນທີ 12 ມັງກອນ ເພື່ອໃຫ້ການຈັດສັນງົບປະມານຊ່ວຍເຫລືອເປັນໄປຢ່າງສະດວກວ່ອງໄວ, ມາຮອດປັດຈຸບັນປະຊາຊົນຫລາຍກວ່າ 30.000 ຄົນ ຕ້ອງອົບພະຍົບໄປຢູ່ບ່ອນປອດໄພ, ຫລາຍພື້ນທີ່ໄດ້ຮັບຜົນກະທົບຈາກຂີ້ເຖົ່າຂອງພູໄຟທີ່ປົກຄຸມເປັນບໍລິເວນກວ້າງ.
ຫລັງຈາກມີການປະກາດສະຖານະການໄພພິບັດ, ລັດຖະບານໄດ້ຈັດສົ່ງທະຫານ ແລະ ເຈົ້າໜ້າທີ່ທາງການແພດລົງໄປຊ່ວຍເຫລືອຜູ້ປະສົບໄພ, ພ້ອມທັງມີຄຳສັ່ງໃຫ້ໜ່ວຍງານລັດ ແລະ ໂຮງຮຽນປິດເຮັດວຽກໃນຫລາຍເມືອງ ລວມທັງຢູ່ນະຄອນຫລວງມະນິລາ ແລະ ມີລາຍງານຄົນຂັບລົດເສຍຊີວິດ ຈາກອຸປະຕິເຫດ ເນື່ອງຈາກຖະໜົນມື່ນ ເພາະຖືກປົກຄຸມດ້ວຍຂີ້ເຖົ່າຈາກພູໄຟ.
