ລັດຖະມົນຕີກະຊວງແຮງງານ ເນັ້ນໃຫ້ກົມແຜນການ ແລະ ການຮ່ວມມືເອົາໃຈໃສ່ 5 ບັນຫາຫລັກ

ໃນໂອກາດ, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ( ຮສສ ) ເຂົ້າຮ່ວມ ແລະ ໂອ້ລົມຕໍ່ກອງປະຊຸມວຽກແຜນການ ແລະ ການຮ່ວມມືສາກົນ ປະຈໍາປີ 2019 ໃນວັນທີ 9 ມັງກອນ 2ນີ້, ທີ່ ນະຄອນຫລວງວຽງຈັນ, ເຊິ່ງ ທ່ານລັດຖະມົນຕີ, ໄດ້ເນັ້ນໃຫ້ກົມດັ່ງກ່າວເອົາໃຈໃສ່ 5 ບັນຫາຫລັກຄື:

1. ເອົາໃຈໃສ່ສຶກສາອົບຮົມການເມືອງ ນຳພາແນວຄິດ ຂອງພະນັກງານ-ລັດຖະກອນ ໃຫ້ມີຄວາມໜັກແໜ້ນ, ປັບປຸງແບບແຜນການນຳພາ, ການບໍລິຫານ ແລະ ວິທີເຮັດວຽກ ໃຫ້ຖືືກຕ້ອງຕາມກົດໝາຍ ແລະ ລະບຽບການ ໂດຍມີການແບ່ງງານ, ແບ່ງຄວາມຮັບຜິດຊອບ ຢ່າງຈະແຈ້ງ, ສ້າງຄວາມເຂັ້ມແຂງດ້ານວິຊາການ, ການປະດິດຄິດສ້າງ ແລະ ຄວາມສາມາດ ໃນການປະຕິບັດໜ້າທີ່ຕາມພາລະບົດບາດ ໃຫ້ມີປະສິດທິຜົນ ແລະ ປະສິດທິພາບ, ປະຕິບັດການປະສານງານໃຫ້ມີຄວາມຄ່ອງຕົວ, ສະຫຼຸບຕີລາຄາ, ລາຍງານ ແລະ ສະເໜີຂໍທິດຊີ້ນໍາ ເປັນປົກກະຕິ ເພື່ອໃຫ້ການບໍລິຫານວຽກງານ ເປັນໄປຕາມແຜນການ ແລະ ມີຜົນສຳເລັດດີຂຶ້ນ.

2. ໃຫ້ສືບຕໍ່ສ້າງຂີດຄວາມສາມາດໃນການວາງແຜນການ, ການປະເມີນຜົນ ແລະ ໃນການຂຽນໂຄງການຕ່າງໆ ເພື່ອເຮັດໃຫ້ການຈັດຕັ້ງປະຕິບັດແຜນພັດທະນາແຮງງານ ແລະ ສະຫວັດດີການສັງຄົມ ໃນແຕ່ລະປີ ມີເນື້່ອໃນເລິກເຊິ່ງ, ໄປລວງດຽວກັນ, ມີຄວາມສອດຄ່ອງກັນລະຫວ່າງແຜນການຂອງບັນດາກົມ, ຫົວໜ່ວຍວິຊາການ ແລະ ພະແນກ ຮສສ ແຂວງ-ນະຄອນຫຼວງ ໃຫ້ຕິດພັນກັບ ແຜນພັດທະນາເສດຖະກິດ-ສັງຄົມແຫ່ງຊາດ ແລະ ຂອງແຕ່ລະທ້ອງຖິ່ນ ແນໃສ່ຊຸກຍູ້ການພັດທະນາວຽກແຮງງານ ແລະ ສະຫວດດີການສັງຄົມ ຢູ່ສູນກາງ ແລະ ທ້ອງຖິ່ນ ໃຫ້ມີຜົນສຳເລັດດີຂຶ້ນ ແລະ ບັນລຸຕົວເລກຄາດໝາຍຕ່າງໆ ຕາມທີ່ໄດ້ກຳນົດໄວ້;

3. ເອົາໃຈໃສ່ຈັດຕັ້ງປະຕິບັດວຽກແຜນການ ແລະ ການຮ່ວມມືສາກົນ ໃຫ້ຕິດພັນກັບແຜນພັດທະນາແຮງງານ ແລະ ສະຫວັດດີການສັງຄົມ ໃນປີ 2020 ໃຫ້ມີຜົນສຳເລັດດີຂຶ້ນ ພ້ອມທັງສືບຕໍ່ຄົ້ນຄ້ວາເນື້ອໃນຮ່າງແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ V ໃຫ້ສອດຄ່ອງກັບການສ້າງຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໂດຍໃຫ້ມີການຄົ້ນຄ້ວາ, ວິໄຈດ້ານວິຊາການຕ່າງໆ ໃຫ້ມີລັກສະນະວິທະຍາສາດ, ມີຄວາມຖືກຕ້ອງ ແລະ ສາມາດນຳໃຊ້ເປັນຂໍ້ມູນໃນການພັດທະນາແຮງງານ ແລະ ສະຫວັດດີການສັງຄົມ ໃນແຕ່ລະໄລຍະ ໃຫ້ມີປະສິດທິຜົນດີກ່ວາເກົ່າ;

4. ສຸມໃສ່ຄົ້ນຄ້ວາ, ຈັດສັນ ແລະ ປະເມີນຜົນບັນດາໂຄງລົງທຶນຂອງລັດ ແລະ ໂຄງການສົ່ງເສີມວິຊາການ ໃຫ້ຖືກຕ້ອງ ແລະ ສອດຄ່ອງກັບກົດໝາຍ ວ່າດ້ວຍການລົງທຶນ ເພື່ອໃຫ້ສາມາດນຳໃຊ້ງົບປະມານການລົງທຶນ ຢ່າງມີຈຸດສຸມ ແລະ ຊຸກຍູ້ການບັນລຸຄາດໝາຍສູ້ຊົນຕ່າງໆ ທັງຢູ່ສູນກາງ ແລະ ທ້ອງຖິ່ນ ໃຫ້ມີປະສິດທິຜົນດີຂຶ້ນ. ພ້ອມທັງເອົາໃຈໃສ່ພັດທະນາລະບົບສະຖິຕິ ດ້ານແຮງງານ ແລະ ສະຫວັດດີການສັງຄົມ ໃຫ້ໄດ້ຮັບການຄຸ້ມຄອງ ແລະ ນຳໃຊ້ ຢ່າງລວມສູນ ໃນຂອບເຂດທົ່ວປະເທດ ໂດຍສ້າງ ແລະ ປັບປຸງຖານຂໍ້ມູນອອນລາຍ ເພື່ອໃຫ້ສາມາດເກັບກຳ, ສັງລວມ, ຄົ້ນຄ້ວາ ວິໄຈ, ສະໜອງ ແລະ ລາຍງານຕົວຊີ້ວັດຕ່າງໆໃຫ້ເປັນປົກກະຕິ ຊຶ່ງຖືເປັນການຊີ້ບອກເຖິງຜົນສຳເລັດ ໃນການພັດທະນາວຽກແຮງງານ ແລະ ສະຫວັດດີການສັງຄົມ ໃນແຕ່ລະປີ;

5. ຕັ້ງໜ້າປະຕິບັດການພົວພັນຮ່ວມມືກັບ ອາຊຽນ, ສອງຝ່າຍ, ຫຼາຍຝ່າຍ ແລະ ອົງການ ຈັດຕັ້ງສາກົນ ໃຫ້ກ້ວາງຂວາງກ່ວາເກົ່າ ໂດຍສຸມໃສ່ການຈັດຕັ້ງຜັນຂະຫຍາຍ ເປົ້າໝາຍການພັດທະນາແບບຍືນຍົງ SDG ຕາມຕົວຊີ້ວັດຕ່າງໆ ທີ່ຕິດພັນກັບວຽກແຮງງານ ແລະ ສະຫວັດ ດີການສັງຄົມ; ເປັນໃຈກາງປະສານງານ ໃນການຈັດຕັ້ງຜັນຂະຫຍາຍ ແຜນຍຸດທະສາດ, ຖະແຫຼງການ ແລະ ສົນທິສັນຍາຕ່າງໆ ໃຫ້ມີປະສິດທິຜົນກ່ວາເກົ່າ, ຍາດແຍ່ງແຫຼ່ງທຶນ ແລະ ເຕັກນິກວິຊາການໃຫ້ຫຼາຍຂຶ້ນ.