ຜົນສຳຫລວດຊີ້ຄົນສ່ວນຫລາຍທົ່ວໂລກບໍ່ເຊື່ອໝັ້ນທ່ານ ທຣຳ
ຜົນການສຳຫລວດຂອງສູນວິໄຈພິວ ລະບຸວ່າ: ຄົນສ່ວນຫລາຍທົ່ວໂລກມີມຸມມອງໃນແງ່ລົບຕໍ່ປະທານາທິບໍດີ ໂດນັລ ທຣຳ ຂອງອາເມລິກາ ແລະ ບໍ່ເຊື່ອໝັ້ນໃນຕົວທ່ານ.
ສູນວິໄຈພິວເປີດເຜີຍວ່າ: ຈາກການສຳຫລວດ “ທັດສະນະຄະຕິໃນລະດັບໂລກ” ຕໍ່ປະຊາຊົນໃນ 32 ປະເທດທົ່ວໂລກ ພົບວ່າ: ຜູ້ຖືກສຳຫລວດ 64% ລະບຸວ່າ: ພວກເຂົາບໍ່ມີຄວາມເຊື່ອໝັ້ນວ່າປະທານາທິບໍດີ ທຣຳ ຈະເຮັດໃນສິ່ງທີ່ຖືກຕ້ອງກ່ຽວກັບບັນຫາຕ່າງໆໃນລະດັບໂລກ ແລະ ມີພຽງ 29% ທີ່ສະແດງຄວາມເຊື່ອໝັ້ນຕໍ່ປະທານາທິບໍດີ ທຣຳ.
ປະຊາຊົນປະມານ 3 ໃນ 4 ຢູ່ເຢຍລະມັນ, ຊູແອດ, ຝຣັ່ງ ແລະ ແອັດສະປາຍ ຕ່າງລະບຸວ່າ: ບໍ່ມີຄວາມເຊື່ອໝັ້ນປະທານາທິບໍດີ ທຣຳ. ຂະນະທີ່ຕົວເລກດັ່ງກ່າວສູງເຖິງ 89% ຢູ່ເມັກຊິກ.
ຜູ້ຖືກສຳຫລວດ 68% ສະແດງຄວາມບໍ່ພໍໃຈຕໍ່ນະໂຍບາຍເສດຖະກິດຂອງອາເມລິກາໃນການເກັບພາສີຕໍ່ສິນຄ້ານຳເຂົ້າ, ຂະນະທີ່ 66% ບໍ່ພໍໃຈທີ່ອາເມລິກາຖອນຕົວຈາກຂໍ້ຕົກລົງໃນການແກ້ໄຂບັນຫາໂລກຮ້ອນ ແລະ 60% ບໍ່ມັກການສ້າງກຳແພງກັ້ນຊາຍແດນ ອາເມລິກາ-ເມັກຊິກ, ສ່ວນ 55% ບໍ່ມັກນະໂຍບາຍຈຳກັດຈຳນວນຄົນຕ່າງປະເທດທີ່ເດີນທາງເຂົ້າສູ່ອາເມລິກາ ແລະ 52% ບໍ່ເຫັນພ້ອມຕໍ່ການທີ່ອາເມລິກາຖອນຕົວຈາກຂໍ້ຕົກລົງນິວເຄຼຍອີຣານ.
ເຖິງຢ່າງໃດກໍດີ, ປະທານາທິບໍດີ ທຣຳ ຍັງໄດ້ຮັບຄວາມຊື່ນຊົມຈາກປະຊາຊົນຢູ່ຟີລິບປິນ, ອິດສະລາແອນ, ເກນຢາ, ນີເຊຣີ ແລະ ອິນເດຍ.
ຂະນະດຽວກັນ ເຖິງວ່າຜົນສຳຫລວດບົ່ງບອກວ່າ: ຜູ້ຖືກສຳຫລວດສ່ວນຫລາຍບໍ່ມີຄວາມເຊື່ອໝັ້ນຕໍ່ປະທານາທິບໍດີ ທຣຳ, ແຕ່ການສຳຫລວດພົບວ່າ: ຜູ້ຖືກສຳຫລວດທົ່ວໂລກຍັງມີມຸມມອງເປັນບວກຕໍ່ປະເທດອາເມລິກາ ໂດຍມີຈຳນວນສູງເຖິງ 54%, ຂະນະທີ່ 38% ມີມຸມມອງໃນທາງລົບ.
ທັງນີ້ ສູນວິໄຈພິວມີການສຳຫລວດດັ່ງກ່າວຕໍ່ປະຊາຊົນ 36.923 ຄົນໃນ 32 ປະເທດທົ່ວໂລກ ນັບແຕ່ວັນທີ 18 ພຶດສະພາ – 2 ຕຸລາ 2019.
