ຫລວງນ້ຳທາປຶກສາຫາລືວຽກງານຄຸ້ມຄອງທຸລະກິດການທ່ອງທ່ຽວລະຫວ່າງພາກລັດ ແລະ ພາກທຸລະກິດ
ກອງປະຊຸມປຶກສາຫາລືວຽກງານຄຸ້ມຄອງການທ່ອງທ່ຽວແຂວງຫລວງນ້ຳທາ ລະຫວ່າງພາກລັດ ແລະ ພາກທຸລະກິດ ໄດ້ຈັດຂຶ້ນຢູ່ແຂວງຫລວງນ້ຳທາ ໃນວັນທີ 8 ມັງກອນນີ້, ໂດຍການເຂົ້າຮ່ວມຂອງທ່ານ ສີວີໄລ ປັນແກ້ວ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ພັນໂທ ສຸກສະໝອນ ເພັດງ່າຄຳ ຫົວໜ້າພະແນກຕໍາຫຼວດທ່ອງທ່ຽວແຂວງເຂົ້າຮ່ວມນຳດ້ວຍ.
ທ່ານ ລິນທອນ ສຸວັນທອນ ຮອງຫົວໜ້າຂະແໜງທ່ອງທ່ຽວ ໄດ້ລາຍງານໃຫ້ຮູ້ວ່າ: ໃນຜ່ານມາ ການຄຸ້ມຄອງການທ່ອງທ່ຽວຢູ່ຫຼວງນໍ້າທາແມ່ນອີງໃສ່ວຽກງານ 3 ສ້າງ, ໄດ້ແບ່ງຂັ້ນຄຸ້ມຄອງລະຫວ່າງແຂວງ ແລະ ເມືອງ ເຊິ່ງປັດຈຸບັນທົ່ວແຂວງຫຼວງນໍ້າທາມີບໍລິສັດ, ສາຂາບໍລິສັດທ່ອງທ່ຽວ 8 ຫົວໜ່ວຍ, ໜ່ວຍບໍລິການນໍາທ່ຽວ 21 ຫົວໜ່ວຍ, ໂຮງແຮມ, ລີສອດ 10 ແຫ່ງແມ່ນແຂວງຄຸ້ມຄອງ, ເຮືອນພັກ 95 ແຫ່ງ, ພັດຕະຄານ, ຮ້ານອາຫານ, ສວນອາຫານ 97 ແຫ່ງ, ຮ້ານບັນເທີງ 9 ແຫ່ງ ແລະ ຮ້ານກິນດື່ມ 81 ແຫ່ງແມ່ນເມືອງຄຸ້ມຄອງ ລວມມູນຄ່າການລົງທຶນທັງໝົດ 181 ຕື້ກວ່າກີບ, ຜ່ານມາໄດ້ສົມ ທົບພາກສ່ວນກ່ຽວຂ້ອງລົງກວດກາ, ຕິດຕາມ ແລະ ຊຸກຍູ້ພາກທຸລະກິດທ່ອງທ່ຽວປັບປຸງຂອດບໍລິການ, ຄຸນນະພາບຂອງຜະລິດຕະພັນ, ເອົາໃຈໃສ່ເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍທີຕິດພັນກັບການຄຸ້ມຄອງວຽກງານທ່ອງທ່ຽວ, ປັບປຸງ, ສ້າງນິຕິກໍາທີຈໍາເປັນເພື່ອເປັນເຄື່ອງມືໃນການຄຸ້ມຄອງວຽກງານທ່ອງທ່ຽວໃຫ້ສອດຄອງກັບສະພາບການພັດທະນາເສດຖະກິດ-ສັງຄົມປັດຈຸບັນເປັນຕົ້ນແມ່ນລະບຽບການຄຸ້ມຄອງໂຮງແຮມ, ເຮືອນພັກ, ລີສອດ ແລະ ລະ ບຽບການຄຸ້ມຄອງຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ຄາຣາໂອເກະ, ລະບຽບການຄຸ້ມຄອງສາມະຄົມທຸລະກິດທ່ອງທ່ຽວ, ລະບຽບການຄຸ້ມຄອງພະນັກງານນໍາທ່ຽວ, ມາດຕະຖານພະນັກງານນໍາທ່ຽວ, ລະບຽບການຄຸ້ມຄອງການຍ່າງປ່າ, ການລ່ອງເຮືອ ແລະ ອື່ນໆ.
ທ່ານຍັງໃຫ້ຮູ້ຕື່ມວ່າ: ການຄຸ້ມຄອງການບໍລິການຮ້ານອາຫານ, ຮ້ານກິນດື່ມ ແລະ ຮ້ານບັນເທີງຍັງບໍ່ທັນໄດ້ມາດຖານ, ລະດັບຄຸນນະພາບ ເປັນຕົ້ນມົນລະພິດທາງດ້ານສຽງລົບກວນສັງຄົມອ້ອມຂ້າງ ຍ້ອນຫຼາຍສາເຫດເຊັ່ນວ່າ: ການອອກແບບອາຄານບໍ່ໄດ້ມາດຖານ, ບໍ່ຖືກຕ້ອງຕາມປະເພດທຸລະກິດ ເຮັດຮ້ານອາຫານພັດບໍລິການຮ້ອງເພັງເປີດສຽງດັງເກີນກໍານົດ, ສະຖານທີ່ບໍ່ເໝາະສົມ, ບໍລິການກາຍໂມງ ແລະ ອື່ນໆ.
ຈາກນັ້ນຜູ້ເຂົ້າຮ່ວມກອງປະຊຸມກໍໄດ້ປຶກສາຫາລືກັນຢ່າງກົງໄປກົງມາເພື່ອຊອກຫາວີແກ້ໄຂບັນຫາຫາງສຽງສັງຄົມກ່ຽວກັບວຽກງານຄຸ້ມຄອງການບໍລິການດ້ານຕ່າງໆໃຫ້ຖືກຕ້ອງສອດຄອງກັບຄວາມເປັນຈິງ ແລະ ສາມາດສ້າງຄວາມດຶງດູດໃຈໃຫ້ແກ່ນັກທ່ອງທ່ຽວເຂົ້າມາທ່ຽວຊົມແຂວງຫຼວງນໍ້າທາໃຫ້ຫຼານຂຶ້ນ.
