ປີ 2020 ສສ ຫວຽດນາມ ໃຫ້ທຶນການສຶກສາແກ່ລາວຫຼາຍກວ່າ 1 ພັນທຶນ
ພິທີເຊັນລົງນາມແຜນການຮ່ວມມືປະຈໍາປີ 2020 ລະຫວ່າງກະຊວງສຶກສາທິການ ແລະ ກິລາ ສປປ ລາວ ແລະ ກະຊວງສຶກສາ ແລະ ກໍ່ສ້າງ ສສ ຫວຽດນາມ ໄດ້ມີຂຶ້ນໃນກອງປະຊຸມຄັ້ງທີ 42 ປະຈໍາ 2020 ຂອງຄະນະກໍາມະການຮ່ວມທະວີພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ສສ ຫວຽດນາມ ທີ່ໄດ້ຈັດຂຶ້ນໃນວັນທີ 4 ມັງກອນ ນີ້, ທີ່ນະຄອນຫຼວງຮ່າໂນ້ຍ ສສ ຫວຽດນາມ ພາຍໃຕ້ການເປັນປະທານຮ່ວມຂອງສອງນາຍົກລັດຖະມົນຕີ ລາວ-ຫວຽດນາມ.
ໃນປີ 2020 ລັດຖະບານ ສສ ຫວຽດນາມ ໄດ້ຕົກລົງໃຫ້ທຶນການສຶກສາແກ່ລາວ ຈໍານວນ 1.213 ທຶນ (ລວມທັງຂົງເຂດປ້ອງກັນຊາດ-ປ້ອງກັນ ຄວາມສະຫງົບ) ໃນນັ້ນ, ທຶນຈາກກະຊວງສຶກສາ ສສ ຫວຽດນາມ ໃຫ້ແກ່ກະຊວງສຶກສາທິການ ແລະ ກິລາ ສປປ ລາວ ຈໍານວນ 508 ທຶນ, ລວມມີທຶນການສຶກສາໄລຍະຍາວ 413 ທຶນ, ໃນນັ້ນ, ປະລິນຍາຕີ 161 ທຶນ, ປະລິນຍາໂທ 237 ທຶນ ແລະ ປະລິນຍາເອກ 13 ທຶນ, ບໍາລຸງໄລຍະສັ້ນ 95 ທຶນ ແລະ ຝ່າຍລາວໃຫ້ທຶນການສຶກສາແກ່ ສສ ຫວຽດນາມ ຈໍານວນ 60 ທຶນ ໃນນັ້ນ, ມີໂທ 5 ທຶນ, ສ່ວນເຫຼືອແມ່ນຮຽນປະລິນຍາຕີ ແລະ ຮຽນພາສາລາວ.
ໃນໂອກາດລົງນາມລົງນາມດັ່ງກ່າວ, ການນໍາຂອງສອງກະຊວງສຶກສາ ລາວ-ຫວຽດນາມ ໄດ້ຮ່ວມກັນຕີລາຄາ ທົບທວນຄືນສະພາບການຮ່ວມມືໃນປີ 2019 ກໍຄືຊຸມປີຜ່ານມາ ທີ່ສອງຝ່າຍໄດ້ຮ່ວມກັນປະຕິບັດ “ໂຄງການຍົກສູງຄຸນນະພາບ ແລະ ປະສິດທິຜົນການຮ່ວມມືດ້ານການສຶກສາ ລາວ-ຫວຽດນາມ ໄລຍະ 2011-2020” ເຫັນວ່າມີຜົນສໍາເລັດໃນຫຼາຍດ້ານ ແລະ ສອງຝ່າຍເຫັນດີເປັນເອກະພາບສືບຕໍ່ຊຸກຍູ້ບາງວຽກງານ ໂດຍສະເພາະ ຈະຄົ້ນຄວ້ານໍາເອົາເນື້ອໃນປະຫວັດສາດຂອງສາຍພົວພັນມິດຕະພາບແບບພິເສດລາວ-ຫວຽດນາມ ເຂົ້າໃນຫຼັກສູດການສິດສອນຢູ່ບັນດາໂຮງຮຽນສາມັນຂອງສອງປະເທດ, ພ້ອມທັງສືບຕໍ່ການຮຽນ-ການສອນກຽມພາສາຫວຽດຂັ້ນພື້ນຖານ ໄລຍະ 4 ເດືອນໃຫ້ພະນັກງານ ແລະ ນັກສຶກສາລາວທີ່ຈະໄປສຶກສາຕໍ່ທີ່ ສສ ຫວຽດນາມ. ພ້ອມນີ້ສອງຝ່າຍຈະສືບຕໍ່ສ້າງສໍາເລັດຫຼັກສູດສອນສອງພາສາລາວ-ຫວຽດ ເພື່ອມອບຮັບ ແລະ ສະເໜີວິທີການຜັນຂະຫຍາຍການສອນສອງພາສາ ຢູ່ບາງໂຮງຮຽນສາມັນຂອງລາວທີ່ມີເງື່ອນໄຂ ແລະ ຄວາມຕ້ອງການ. ສອງຝ່າຍຊຸກຍູ້ອໍານວຍຄວາມສະດວກໃຫ້ບັນດາສະຖານສຶກສາຂອງສອງປະເທດມີເງື່ອນໄຂໃນການຮ່ວມມື ແລກປ່ຽນບົດຮຽນ ແລະ ຮ່ວມມືກໍ່ສ້າງຊັບພະຍາກອນະນຸດໃນລະດັບປະລິນຍາຕີ ແລະ ເໜືອປະລິນຍາຕີ, ພ້ອມທັງຊຸກຍູ້ສ້າງປຶ້ມຄູ່ມືການສອນພາສາຫວຽດ ເພື່ອມອບ-ຮັບ ແລະ ນໍາມາສິດສອນຢູ່ບາງໂຮງຮຽນສາມັນທີ່ມີເງື່ອນໄຂ ແລະ ຄວາມຕ້ອງການຢູ່ ລາວ. ພິເສດໃນປີ 2020 ສອງຝ່າຍຈະຈັດກອງປະຊຸມສະຫຼຸບຕີລາຄາ “ໂຄງການຍົກສູງຄຸນນະພາບ ແລະ ປະສິດທິຜົນການຮ່ວມມືດ້ານການສຶກສາລາວ-ຫວຽດນາມ ໄລຍະ 2011-2020” ແລະ ສ້າງແແຜນການຮ່ວມມືໄລຍະ 2021-2030 ໃຫ້ມີປະສິດທິຜົນສູງຂຶ້ນ.
